تازه خبرونه
د جاپان سفیر د ښځو پر حقونو له اسلامي امارت سره خبرې کړي

په افغانستان کې د جاپان سفیر ويلي، د اسلامي امارت له مشرانو سره یې په لیدنو کې د ښځو پر حقونو د محدودیتونو په اړه اندېښنې راپورته کړې دي.
په افغانستان کې د جاپان سفارت د تېر کال د سپتمبر په میاشت کې د پخواني حکومت له ړنګېدو وروسته د لنډمهال لپاره قطر ته له لېږدو وروسته په کابل کې خپل څه نا څه کارونه پیل کړل.
سفیر اوکادا تاکاشي، چې د افغانستان له خلکو او اسلامي امارت له مشرانو سره یې لیده کاته کړي؛ په دې وروستیو کې یې له NHK سره آنلاین خبرې وکړې.
اوکادا تاکاشي ویلي: دوه کاله وروسته له هغې، چې طالبان ( اسلامي امارت) په کابل کې بیا واکمن شول ښارونه بېرته عادي حالت ته راګرځي؛ خو خلک اوس هم د ژوندي پاتې کېدو لپاره هڅې کوي.
هغه ویلي، چې دا خلک د خوراکي توکو له کمښت سره مخ دي؛ ځکه، چې بهرنۍ مرستې پر ټپه ولاړې دي او اقتصاد یې پر ټپه ولاړ دی.
NHK راپور ورکړی؛ اوکادا د ښځو او نجونو د حقونو په اړه پراخې خبرې کړي، چې په تېرو دوه کلونو کې له منځه تللي دي.
هغه وایي، چې څو – څو ځله یې د اسلامي امارت مشرانو ته ویلي، چې د هېواد د ثبات لپاره د ښځو ملاتړ اړین دی.
د یاد راپور له مخې؛ هغه هیله څرګنده کړې، چې بدلون په راتلونکي کې واقع کیدی شي؛ ځکه داسې ښکاري، چې د اسلامي امارت یو شمېر غړي د ښځو په اړه د یوې ډاډمنې پالیسۍ له معرفي کولو ملاتړ کوي.
تازه خبرونه
د افغانستان له هوايي پوهنتون څخه ۱۰ پیلوټان فارغ شول
له دې پیلوټانو څخه ۶ د سیسنا-۲۰۸ الوتکې د الوتلو مسلکي روزنه ترلاسه کړه او ۴ نورو په هوايي پوهنتون کې د ام – ۱۷ چورلکو د الوتلو درې کلنه روزنه ترلاسه کړې ده.

د افغانستان هوايي پوهنتون ۱۰ پیلوټانو د مسلکي، نظري او علمي زدهکړو له بشپړولو وروسته په فراغت غونډه کې د فراغت سندونه ترلاسه کړل.
له دې پیلوټانو څخه ۶ د سیسنا-۲۰۸ الوتکې د الوتلو مسلکي روزنه ترلاسه کړه او ۴ نورو په هوايي پوهنتون کې د ام – ۱۷ چورلکو د الوتلو درې کلنه روزنه ترلاسه کړې ده.
د فراغت په دې مراسمو کې نویو فارغ شویو پیلوټانو ته لارښوونه وشوه، چې خپلې روزنې ته دوام ورکړي او د مسلکي کیدو لپاره خبلې هڅې روانې وساتي.
د هوايي ځواک رییس ارکان نقیب الله مقیم وویل: “د پیلوټۍ مسلک یو پېچلی مسلک دی، چې هوښیارۍ ته اړتیا لري.” د پیلوټانو درسونه او لوست پای نلري. “تاسې باید شپه او ورځ کوښښ وکړئ او خپلې زدهکړې روانې وساتئ.”
د دفاع وزارت مرستیال باز محمد ویلي: “له مشرانو څخه تر ټیټ پوړو پورې که له خپلې لارې لږ هم منحرف شوو؛ ځان ته به زیان ورسوو. که تاسې په خپلو خبرو او کړنو سره ځان ته زیان ونهرسوئ؛ بل څوک تاسې ته زیان نشي رسولی.”
نوي فارغ شوي پیلوټان وايي، چې دوی خپله روزنه په سمه توګه ترلاسه کړې او چمتو دي، چې د افغانستان له خاورې دفاع او خلکو ته خدمت وکړي.
جمعه خان صلاح الدین نومی پیلوټ وايي: “مونږ درې کاله زدهکړه وکړه؛ په هوايي پوهنتون کې مو نظري درسونه بشپړ کړل. وروسته د هوايي ځواک ډګر ته لاړو او هلته مو روزنیزې الوتنې ترسره کړې.”
د هاوايي پوهنتون د څرګندونو له مخې؛ د اسلامي امارت له بیا واک ته رسیدو وروسته پوهنتون ۸۴ روزنیز کورسونه ترسره کړي دي، چې په کې ۱۱۸۲ کسان له بېلابېلو څانګو فارغ شوي دي.
تازه خبرونه
د سراج الدین حقاني پر مشرۍ په کورنیو چارو وزارت کې ناسته ترسره شوه
په دې ناسته کې، چې نن (یکشنبه د وري یودېرشمه) جوړه شوه؛ د وزارت مرستیالانو او عمومي رییسانو ګډون کړی و.

د کورنیو چارو وزارت د چارسمبالي( سرپرست) سراج الدین حقاني پر مشرۍ دې وزارت د یوې ناستې له جوړېدا خبر ورکړی دی.
په دې ناسته کې، چې نن (یکشنبه د وري یودېرشمه) جوړه شوه؛ د وزارت مرستیالانو او عمومي رییسانو ګډون کړی و.
د کورنیو چارو وزارت د رسنیزې خبرپاڼې له مخې؛ سراج الدین حقاني په دې ناسته کې ویلي: “تاسې او زه د خلکو د خادمان یوو؛ د خپلو خلکو د خدمت لپاره ګمارل شوي یوو. د کورنیو چارو وزارت پولیس او ټول کارمندان باید د خلکو کراري او امنیت خپل لومړیتوب وګرځوي. دوی باید ډېره هڅه وکړي، چې له خلکو سره په مثبت ډول تعامل وکړي او خپلې دندې په غوره او ممکنه لار له هغو سره د همغږۍ له لارې ترسره کړي.”
نوموړي په کوچني اختر کې د امنیت په برابرولو کې د امنیتي ځواکونو له رول او هڅو ستاینه وکړه.
دا په داسې حال کې، چې د کورنیو چارو وزارت چارسمبالی له څو میاشتني «استراحت» وروسته خپل کاري دفتر ته تللی دی.
تازه خبرونه
پاکستان له ۲۰۲۳ کال راپدېخوا نږدې یومیلیون افغان کډوال جبري ایستلي
د پاکستان د کورنیو چارو وزارت ویلي، چې د افغان کډوالو د جبري ایستلو لامل امنیتي اندېښنې دي.

د پاکستان رسنیو راپور ورکړی، چې د بې اسنادو کډوالو او افغان تابعیت لرونکو د جبري ایستلو بهیر اوس هم چټک روان دی او له دوه میلیون ډېر افغان کډوال یې اندېښمن کړي دي.
د پاکستان د کورنیو چارو وزارت ویلي، چې د افغان کډوالو د جبري ایستلو لامل امنیتي اندېښنې دي.
د پاکستان رسنیو څرګنده کړې، چې یوازې د شنبې پر ورځ له ۵۰۰۰ څخه ډېر افغان کډوال له سرحدي لارو جبري ایستل شوي دي.
د راډیو پاکستان د څرګندونو له مخې؛ د هغو خلکو ټولټال شمېر، چې د دې پالیسۍ له مخې له پاکستان څخه وتلي ۹۷۱ زره ۹۶۹ ته رسیدلی دی.
دغه راز د پاکستان کورنیو چارو وزارت مرستیال طلال چوهدري په یوه وروستۍ مرکه کې ویلي، چې له پاکستان څخه د ایستلو وروستۍ نېټه به د اپریل له ۳۰ ونه غځول شي.
هغه زیاته کړې، چې امنیتي اندېښنې او په پاکستان کې د مخدره توکو د قاچاق زیاتوالی د اخراج د لویې څپې له لاملونو څخه دي.
د پاکستان کورنیو چارو وزارت مرستیال طلال چودري وایي: ” په دې برخه کې درې مسلې مهمې وې؛ له ترهګرۍ سره اړیکه، په لویو جرمي ډلو کې د یو شمېر افغان کډوالو ګډون او د مخدره توکو په قاچاق کې د ګڼ شمېر افغان وګړو د ښکېلتیا شتون.”
له پاکستان څخه د راستنېدونکي کډوال عزیزالله د څرګندونو له مخې؛ پاکستاني پولیسو هغه کسان نیولي او شړلي، چې په پاکستان کې یې په ناکراریو کې هیڅ ونډه نه درلوده او ځینو یې حتا د سبزیو په بازار کې کار کاوه.
ځینو رسنیو دا راپور هم ورکړی، چې د پاکستان حکومت غریب کډوال نیولي او شړلي دي، نه شتمن کسان.
دا په داسې حال کې ده، چې د شنبې پر ورځ ۶۲۳ افغان کورنۍ له پاکستان او ایران څخه هېواد ته راستنې شوې دي. دغو کورنیو هېواد ته د بېرته راستنېدو سره سم هم مرستې ترلاسه کړي؛ خو راستنیدونکي ځمکه، د کار فرصتونه او د ژوند کولو لپاره سرپناه غواړي.
-
تازه خبرونه4 days ago
اروپايي ټولنې د کډوالو د ایستلو لپاره د خوندي هېوادونو نوملړ اعلان کړ
-
سیمه ییز خبرونه4 days ago
ټرمپ د ایران پر اټومي تاسیساتو د اسرائیلو د پلان شوي برید مخه ونیوله
-
تازه خبرونه4 days ago
اسلامآباد له بل څه ناراضه دی خو له افغان کډوالو غچ اخلي – مولانا فضل الرحمن
-
تازه خبرونه5 days ago
د پاکستان ځانګړی استازی کابل ته راغی
-
سیمه ییز خبرونه5 days ago
د بل اړخ په اړه ډېر خوشبین نهیم – آیتالله خامنهیي
-
لوبی5 days ago
له ۱۹ کلنو ټیټ عمره ملي لوبډلې اماراتو ته ماتې ورکړه
-
تازه خبرونه4 days ago
د افغانستان او پاکستان استازو په اسلام آباد کې پر سوداګرۍ خبرې وکړې
-
تازه خبرونه5 days ago
پاکستان ممکن د داعش د نفوذ لپاره افغانستان ته د مهاجرو له شړلو کار واخلي – خلیلزاد