رویټرز راپور ورکړی، چې د امریکا او بریټانیا د بهرنیو چارو وزیرانو د چارشنبې پر ورځ له ولسمشر ولادیمیر زیلینسکي سره په لیدنه کې د غرب د ملاتړ پر څرنګوالي خبرې کړې دي.

د رویټرز د څرګندونو له مخې؛ د امریکا بهرنیو چارو وزیر انټوني بلینکن او د بریټانیا بهرنیو چارو وزیر ډیویډ لمی پرون د اوکراین پلازمېنې ته رسېدلي، چې د اوکراین د حکومت له لوړ پوړو چارواکو سره وګوري او د غرب پر پوځي مرستو بحث او خبرې وکړي.

بلینکن ویلي؛ غواړي د اوکراین له ولسمشر ولادیمیر زیلینسکي او نورو څخه واوري، چې له روسیې سره په جګړه د کییف موخې څه دي او واشنګټن او ورسره څه مرستې کولی شي.

شونې ده، چې زیلینسکي خپلو متحدینو ته خپلې غوښتنې تکرار کړي او اوکراین ته د روسیې پر خاوره د امریکا اتکمز او د انګلستان سټورم لرې ویشتونکي توغنديو د کارولو اجازه ورکړي.

په واشنګټن او ځینو اروپايي پلازمېنو کې اندېښنه شته، چې د دې جواز صادرول به د لویدیځ او روسیې ترمنځ د مستقیمې جګړې شونتیا ډېره کړي.

بلینکن په دې اړه له څه ویلو ډډه کړې، چې آیا واشنګټن به د لرې واټن ویشتونکیو وسلو د کارولو اجازه ورکړي او که نه؛ خو وایي، چې هره پرېکړه څو عوامل لري.

هغه زیاته کړې، چې دا یوازې سیسټم ندی، چې مهم دی. تاسې باید پوښتنه وکړئ: آیا اوکراینیان کولی شي دا په اغېزمنه توګه وکاروي او د ساتلو وړتیا یې لري؟

د ایرنا د راپور له مخې، زیلینسکي پر ځلونو له لویدیځ څخه غوښتي؛ خپلو ځواکونو ته اجازه ورکړي، چې د دوی له اوږده واټن وسلو څخه پر روسیې د برید لپاره کار واخلي.

د امریکا ولسمشر جو بایډن د سې شنبې پر ورځ د دې پوښتنې په ځواب کې، چې آیا هغه به د کیف لخوا د اوږد واټن وسلو لکه ATCMs کارولو محدودیتونه لرې کړي؛ وویل، چې د هغه اداره اوس پدې مسله غور کوي.

د کرملین ویاند دیمیتري پسکوف په یوه خبري کنفرانس کې خبریالانو ته ویلي؛ داسې ښکاري، چې واشنګټن اوکراین ته د دې وسلو د کارولو د اجازې پرېکړه کړې ده.

هغه دا هم ویلي، چې که داسې وشي؛ مسکو به مناسب ځواب ورکړي او زیاتوي، چې د اوس لپاره د روسیې ځانګړي پوځي عملیات د دې ټولو بریدونو د ځواب لپاره کافي دي.

د غزې ملکي بېړني ټولنې د سې شنبې پر ورځ اعلان کړی، چې د اسرئيلي توغنديو پر توغېدو په جنوبي غزه کې د فلسطيني کډوالو يو کمپ اور اخیستی او ٦٥ کسانو ته یې مرګ او ژوبله اړولې ده.

د اسرائیلو پوځ ویلي، د حماس مهم وسلوال یې پر نښه کړي، چې د خان یونس د بشري مرستو د اړوند سیمې د قومندې او کنټرول په مرکز کې یې فعالیت کاوه.

د رویټرز خبري سرچینې د راپور له مخې؛ د غزې د دولتي رسنیو دفتر، چې د حماس تر ادارې لاندې دی د وژل شویو کسانو شمېر له ۴۰ ډېر ښیي. دغه راز لږ تر لږه ۶۰ نور کسان په دغو بریدونو کې ټپیان او ګڼ نور ورک شوي دي.

د دې راپور له مخې؛ د مرستندویه ځواکونو لټون د سې شنبې تر سهاره روان و.

د رویټرز خبري سرچینې د راپور له مخې؛ د دې کمپ اوسیدونکیو او ډاکټرانو ویلي، چې په المواسې سیمه کې خان یونس ته نږدې د خیمو یو کمپ، چې اسرائیلو د فلسطیني کډوالو لپاره بشري خوندي سیمې یاده کړې؛ لږ تر لږه څلور توغندي توغول شوي دي. دغه کمپ له هغو فلسطیني کورنیو څخه ډک دی، چې اسرائیلي پوځ ورته د غزې له نورو سیمو څخه د ورتګ امر کړی و.

ملکي بېړنۍ ټولنې ادعا کړې، چې په دې برید کې لږ تر لږه ۲۰ خیمې سوځول شوی دی.

په راپور کې راغلي، چې په ۶۵ قربانیانو کې ښځې او ماشومان هم شته دي؛ خو سمدلاسه د مړو او ټپیانو کره شمېره په لاس کې نشته.

د اسرائیلي ځواکونو په بیانیه کې راغلي دي: ترهګرو پرمختګ کړی و او د اسرائیلي ځواکونو او حکومت پر وړاندې یې وسلوال بریدونه کړي وه.

په اسرائیلو کې جګړه د تېر کال د اوکټوبر پر اوومه پیل شوه، چې د اسرائیلو د څرګندونو له مخې د حماس وسلوالو په برید کې ۱۲۰۰ کسان ووژل شول او شاوخوا ۲۵۰ نور یې یرغمل کړل. په داسې حال کې ، چې د غزې روغتیا وزارت ویلي، پر غزه د اسرائیلو په پوځي ځوابي بریدونو کې له ۴۰ زرو ډېر فلسطینیان وژل شوي دي.

 د سوریې دولتي رسنیو راپور ورکړی، چې د یکشنبې پر ورځ ناوخته د سوریې حما سیمې په یوه لوی پوځي څېړنیز مرکز کې د اسرائیلو د څو بریدونه له کبله لږ تر لږه څلور ملکي وګړي وژل ي.

رویټرز راپور ورکړ، چې د اوکټوبر پر اوومه د حماس لخوا پر اسرائیلي ملکي وګړو او سرتېرو له برید راپدېخوا اسرائیل، په سوریه کې پر ایراني ملاتړو ملیشو خپل بریدونه زیات کړي او د سوریې هوایي دفاع او ځواکونه یې هم پر نښه کړي دي.

د سوریې دولتي خبري سرچینې د یوه سیمه‌ییز روغتیايي چارواکي له قوله ویلي، چې د مصیاف ښار په شاوخوا کې یې د یکشنبې له بریدونو وروسته ۱۳ کسان ټپیان کړي هم دي، چې د ګڼو روغتیایي حالت د اندېښنې وړ دی.

دوه سیمه‌ییزو استخباراتي سرچینو ویلي؛ د کیمیاوي وسلو د تولید یو لوی پوځي مرکز، چې د مصیاف په سیمه کې موقعیت لري تر بریدونو لاندې راغلی.

په راپور کې ویل شوي؛ په دې برید کې د ایران د پوځي کارپوهانو یوه ډله، چې د وسلو د تولیدوونکیو ګومان پرې کېده تر برید لاندې راغلي.

د سوریې دولتي رسنیو هم راپور ورکړی، چې د بریدونو له کبله دوه ځایه اورلګېدنه رامنځته شوې، چې اور وژونکي یې د مهارولو هڅې کوي.

د اسرائیلو لخوا پر دې برید هم نورو بریدونو ته ورته کومه تبصره نده شوې.