په کابل کې د ایران سفارت نوي چارسمبالي علیرضا بیکدلي د بهرنیو چارو وزارت له چارسمبالي امیرخان متقي سره وکتل.

د بهرنیو چارو وزارت د خبرپاڼې له مخې: په دې کتنه کې، چې نن (دوشنبه د لیندۍ نولسمه) تر سره شوه؛ امیر خان متقي بېکډلي ته په دنده کې د بریالیتوب هیله وکړه او نوموړي ته یې د همکارۍ ډاډ ورکړ.

بیکدلي د ایران د خارجه وزیر د سلام او نیکو هیلو د وړاندې کولو ترڅنګ هیله څرګنده کړه، چې د خپل ماموریت په وخت کې به په بېلابېلو ډګرونو کې د دواړو هېوادونو د اړیکو د پراختیا لپاره زمینه برابره کړي.

هغه دا هم ویلي، چې ایران غواړي د دواړو هېوادونو لوړ پوړي پلاوي په نږدې راتلونکي کې له یو بل سره وګوري.

د افغانستان کرکټ بورډ د هېواد کرکټ ملي لوبډلې چې د مشر روزونکي جوناتان ټراټ تړون تر ۲۰۲۵ کال پورې غځولی دی.

دې بنسټ په یوه خبرپاڼه کې ویلي، چې د افغانستان کرکټ ملي لوبډلې د مشر روزونکي په توګه د ټرات دوه نیم کلنه دنده بریالۍ وه او د لوبډلې په پرمختګ او پیاوړتیا کې یې د پام وړ مرسته کړې ده.

د امریکا نړیوالې پراختیا ادارې او د زده ‌کړې قطري بنسټ هوکړه کړې، چې په افغانستان کې د ۱۰۰زره ماشومانو د زده‌کړې او له ښوونځیو څخه د پاتې ماشومانو د روزنې لپاره ۵۰ میلیون ډالر مرسته او ۲۰۰۰ تحصیلي بورسوړنه ورکړي.

دې دواړو بنسټونو په یوه خبرپاڼه کې لیکلي، چې دا تړون د ټولو لپاره په ځانګړي توګه د محرومو او له خطر سره مخ ټولنو ته د بنسټیزو زده‌کړو ګډه ژمنه پر ګوته کوي.

دغه هوکړه لیک د یکشنبې پر ورځ د دوحې د غونډې په څنډه کې د ټولو لپاره د زده‌کړې بنسټ او د امریکا د نړیوالې پراختیا ادارې ترمنځ لاسلیک شو.

دغه راز د قطر بهرنیو چارو وزارت استازي د دوحې د غونډې په څنډه کې د افغانستان لپاره د امریکا د ښځو او بشري حقونو له ځانګړې استازې سره هم خبرې کړې دي. په افغانستان کې د ثبات لپاره نړیوالې هڅې د دوی د بحث یوه برخه وه.