په لغمان ولایت کې د ۱۰ میګاواټه لمریزې برښنا د تولید پروژې عملي کار نن (پنجشنبه د غبرګولي لومړۍ) د ریاست الوزراء د اقتصادي مرستیال ملا عبدالغني برادر لخوا پرانیستل شوه.

ملا برادر د دې پروژې پیل د پاکې انرژۍ د تولید په برخه کې یو مهم ګام وباله او وایي، چې د اقلیمي بدلون پر وړاندې به د دې سیمې مقاومت نور هم زیات شي.

نوموړي ويلي، چې د افغانستان اسلامي امارت د برښنا په سکتور کې د ځان‌بسیاینې ترلاسه کولو لپاره دې طرحې ته ورته اړینې پروژې تر کارلاندې نیولي دي.

هغه وایی؛ دا پروژې به نه يوازې د برښنا په توليد کې اغېزمنې وي، بلکې د ملي اقتصاد په پياوړتيا، کار پيدا کولو، پانګونې راجلبولو او خلکو ته خدمات وړاندې کولو او ښه کولو کې هم ډېر اهميت ولري.

اقتصادي مرستیال دا هم ویلي، چې له څه وخت راپدېخوا په ټول هېواد کې د ۲۲۸ میګاواټو څخه ډېر ظرفیت لرونکو اووه مهمو برښنایي پروژو قراردادونه لاسلیک شوي، چې د لغمان لمریزه برښنا پروژه یې هم یوه برخه ده.

ملا برادر د اسلامي امارت اقتصادي سټراټیژي په بهرنیو سرچینو د تکیه کمولو او له کورنیو ظرفیتونو څخه د ګټې اخیستنې پر بنسټ ولاړه وګڼله او ټینګار یې وکړ، چې افغانستان اوسمهال پر وارداتي برښنا ډېره تکیه کوي، چې له کبله یې له هېواده د پام وړ اسعار بهر ته ځي.

هغه همدارنګه امنیت د اقتصادي پروژو د پیل او بریالیتوب لپاره تر ټولو مهم عامل وباله او دا ډاډ یې هم څرګند کړ، چې اسلامي امارت د کورنیو او بهرنیو پانګوالو بشپړ ملاتړ کوي.

اقتصادي مرستیال د افغانستان د برښنا په سکټور کې پانګوالو ته د پانګونې بلنه ورکړه او زیاته یې کړه، چې اسلامي امارت اړینې آسانتیاوې برابرې کړي او هر اړخیزه همکاري به هم ورسره وشي.

د افغانستان اسلامي امارت رهبر شیخ هبة‌الله آخوندزاده د ښاروالیو لپاره په یوه ځانګړي سیمینار کې له خلکو سره د ښه چلند او د زور او فشار له کارولو څخه د ډډه کولو پر اړتیا ټینګار وکړ.

د اسلامي امارت رهبر ویلي، چې د افغانستان خلک له کلونو جګړو او تاوتریخوالي څخه ځوریدلي دي او اوس د شفقت، مهربانۍ او ښه چلند مستحق دي.

هغه د خلکو پر وړاندې د زور یا جبر کارولو پر مخنیوي ټینګار وکړ.

د اسلامي امارت رهبر دغه راز ویلي، چې مسوولیت کوم عزت او غوره والی ندی، بلکې یو امانت دی، چې له مخې یې باید خلکو ته خدمت وشي.

شیخ هبة‌الله آخوندزاده دا هم روښانه کړه، چې مسوولیت امتیاز ندی، بلکې د خلکو د خدمت لپاره یو امانت دی.

هغه ټینګار وکړ، چې د ښاروالیو مالي سرچینې په حقیقت کې د خلکو شتمني ده، چې د عامه خدماتو د وړاندې کولو لپاره ورکول کیږي او باید د خلکو د رضایت او هوساینې سره سم مصرف شي.

د اسلامي امارت رهبر همدارنګه له ښاروالیو وغوښتل، چې د ښارونو د پاکوالي، د عامه ګټو او عامه شتمنیو د ساتنې او د خپلو دندو په ترسره کولو کې له غفلت او بې‌پروایۍ څخه ډډه وکړي.

دا په داسې حال کې ده، چې د کورنیو چارو وزارت چارسمبالي سراج الدین حقاني له پکتیکا والي سره په لیدنه کې ویلي، چې د اسلامي امارت اصلي هدف د خلکو خدمت کول دي او د هغو د استازو له لارې د ولایتونو د ستونزو د حل لپاره هڅې روانې دي.