د قطر په پلازمېنه دوحه کې د دوحې دوه‌ویشتمه غونډه د څه باندې ۱۰۰ هېوادونو د استازو، ډیپلوماټانو او لوړ پوړو چارواکو په ګډون پیل شوه.

د هېوادونو یو شمېر چارواکو په خپلو ویناوو کې د افغانستان یادونه وکړه او ټینګار وشو، چې له دې هېواد سره باید د سوله‌ییزې حل لارې  او د ثبات پر لور له حرکته ملاتړ وشي.

د دې غونډې لوی هدف د نړۍ د پرمختګونو او بحرانونو په ځانګړي توګه په منځني ختیځ کې د جګړې په اړه خبرې کول دي.

د روسیې بهرنیو چارو وزیر امریکا پر دوه مخي چلند تورنه کړه او له افغانستان څخه یې د دې هېواد وتل د شرم وړ وبلل.

سرګي لاروف ویلي: مونږ هیڅکله په کابل کې خپل سفارت ندی پریښی. په کابل کې زمونږ سفارت د امریکايي اشغال او د هغوی د شرموونکي وتلو پر مهال خلاص ساتل شوی و. طالبان د یوې ډلې په توګه د ملګرو ملتونو د ترهګرو په ډله کې ندي؛ خو مشران یې په انفرادي ډول په دې نوملړ کې دي.

له بلې خوا د ناروې بهرنیو چارو وزیر ویلي، چې د داخلي کړکېچونو په ګډون د ډېرو شخړو حل د خلکو او توکمونو په خبرو کې راځي او ناروې هم د افغانستان د ستونزو د اواري لپاره هڅې کړې دي.

سپین بارټ ایډ ویلي؛ ناروې د خبرو اترو د منځګړیتوب او اسانتیاوو رامنځته کولو اوږد تاریخ لري. مونږ باور لرو، چې د کار سرته رسولو او بحرانونو حل کولو لپاره تاسې اړتیا لرئ له خلکو سره خبرې وکړئ. هرڅوک، چې په کې ښکېل دي؛ حتا هغه څوک، چې تاسې ورسره موافق یاست او په ډېري شیانو کې موافق یاست. د داسې ډلو سره خبرې کول به ستاسې کار اسانه کړي. مونږ له دې مخکې د منځني ختیځ، وینزویلا او افغانستان په اړه د خبرو اترو زمینه برابره کړې ده.

له دې مخکې د بهرنیو موسسو یو شمېر چارواکو او استازیو د افغانستان پر وضعیت خبرې وکړې او د افغانستان له خلکو سره یې پر ملاتړ ټینګار وکړ.

د افغانستان بهرنیو چارو وزارت په یوه خپرپاڼه کې لیکلي؛د سوریې  تحریر الشام اسلامي غورځنګ پر مشري د اسلامي ګروپونو لخوا د سوریې د نیول کېدو د مبارکۍ تر څنګ هیله څرګنده کړې، چې په دې هېواد کې د پاتې پرمختیاوو پړاوونه ښه مدیریت شي.

 یاد وزارت دا هیله هم ښودلې، چې په دې هېواد کې د واک لېږد په سوله‌ییزه توګه ترسره، له غچ اخیستلو څخه ډډه وشي او د عمومي عفوې د تګلارې له پلي کولو سره د یوه خپلواک او خدمتګار اسلامي نظام د بنسټ ډبره کېښودل شي.

د یادونې ده، چې په سوریه کې د آزادي غوښتونکي غورځنګ (تحریر الشام) پر مشري د بېلا بېلو اسلامي ګروپونو لخوا په تېرو څو ورځو کې د بشار الاسد د نظام پر وړاندې عملیات پیل شول او نن سهار د دغه هېواد د پلازمېنې دمشق له نیولو  او بیا د نوموړي له تېښتې سره یاد نظام راوپرځېد.

د بدخشان ولايت د اطلاعاتو او کلتور رياست د دغه ولايت په يمګان ولسوالۍ کې د حکيم ناصر خسرو د زیارت د رغولو د پروژې له بشپړېدو خبر ورکوي.

د بدخشان د اطلاعاتو او فرهنګ رييس ذبيح الله اميري په دې اړه ويلي: د يمګان ولسوالۍ د حضرت سيد په سيمه کې د ناصر خسرو تاريخي زیارت، چې د طبيعي او غير طبيعي پېښو له کبله د ويجاړېدو په حال کې و؛ پر معیاري ډول بیا ورغول شو.

هغه زياته کړې؛ د دې زیارت د بيارغونې چارې د اغا خان بنسټ پر مالي او تخنيکي مرسته په ۴ مياشتو کې ترسره شوې دي.

ذبیح الله امیري زیاته کړې: په دې بنسټیزه رغونه کې د زیارت بېلابېلې برخې لکه کړکۍ، دروازې، دیوالونه، ستنې، پلسترونه، غالۍ، پلچکونه، د لنګر خانې په نامه خونې، تشنابونه او ستونونه د ځایي موادواو  نیزوړي پر کارولو ورغول شوې.

د بدخشان د اطلاعاتو او کلتور رييس د دغې ولسوالۍ له خلکو او مسوولينو وغوښتل، چې د تاريخي ابداتو په ساتنه کې له دغه رياست سره همکاري وکړي.

نوموړي زیاته کړې؛ په دې ولايت کې يو شمېر نورې تاریخي سیمې هم ويجاړې شوې؛ خو د بيارغونې او د ويجاړيدو د مخنيوي لپاره يې عملي کار روان دى.

حکیم ناصر خسرو په پېنځمه لېږدیزه پېړۍ کې د سلجوقی دورې یو نامتو شاعر او لیکوال و.