د افغانستان اسلامي امارت بهرنیو چارو وزارت د یکشنبې پر ورځ( د کب درېیمه ) په کابل کې د پاکستان سفیر نظاماني احضار کړ او پر رسمي بنه یې ورته پر افغانستان د پاکستان د هوایي بریدونو په غبرګون کې خپل سخت اعتراض او یادښت وسپاره.

د بهرنیو چارو وزارت د څرګندونو له مخې؛ په دې بریدونو کې د ننګرهار او پکتیکا ځینې برخې پر نښه شوي، چې له کبله یې لسګونه ملکي وګړي شهیدان او ټپیان شول.

د افغانستان اسلامي امارت بهرنیو چارو وزارت د هېواد د هوایي حریم د تکراري سرغړونو او د استوګنې سیمو بمبارډ سخت غندلې او دا عمل یې د افغانستان له ځمکني بشپړتیا څخه ښکاره سرغړونه او پاروونکی عمل وباله.

افغان چارواکو همدارنګه ټینګار کړی، چې د هېواد د ملي حاکمیت او هوایي حریم ساتنه د اسلامي امارت دیني او ملي مسوولیت دی او د ورته هر ډول عمل پایلې به بل لوري ته متوجه وي.

د افغانستان اسلامي امارت بهرنیو چارو وزیر امیر خان متقي د ازبکستان جمهوریت له بهرنیو چارو وزیر بختیار سعیدوف سره په ټیلیفوني اړیکه کې د دوه اړخیزو اړیکو پر پرمختګونو او سیمه‌ییزې همکارۍ فرصتونو بحث او خبرې وکړې.

د هېواد بهرنیو چارو وزارت د رسنیزې خبرپاڼې له مخې؛ په دې خبرو اترو کې دواړو خواوو د افغانستان او ازبکستان ترمنځ د اړیکو پرمختګ ارزولی او د سیاسي، اقتصادي او ډیپلوماټیکو تعاملاتو د پیاوړتیا پر لارو چارو یې بحث کړی دی.

امیر خان متقي ټینګار کړی، چې افغانستان او ازبکستان  ګاونډ او وروڼه هېوادونه دي، چې په دوه اړخیزو او سیمه‌ییزو چارو کې ګڼ‌شمېر ګډې ګټې او فرصتونه لري.

هغه له دې فرصتونو څخه د ګټې اخیستنې لپاره د ګډو هڅو پر اړتیا ټینګار د ټینګار ترڅنګ هیله من شو، چې سږکال به په بېلابېلو کچو کې مشورې، اقتصادي همکارۍ او ګډ نوښتونه نور هم پراخه شي.

بختیار سعیدوف د کابل او تاشکند ترمنځ د اړیکو له پرمختګ هرکلی وکړ.

هغه له افغانستان سره د اړیکو د ژورولو لپاره د ازبکستان پر ژمنې ټینګار څرګند کړ او د سوداګریزو اړیکو په برخه کې یې له پام وړ پرمختګ څخه یادونه وکړه.

سعیدوف ویلي؛ تمه ده، چې د افغان ټرانس اوسپنې‌پټلۍ پروژې د امکان سنجۍ مطالعات ډېر ژر پیل شي.

د ننګرهار سیمه‌ییزو چارواکو ويلي، چې د دې ولایت د استخباراتو ریاست په تورخم کې له پاکستان څخه د راستنېدونکو کډوالو په یوه موټر کې پټې شوې ډېر شمېر وسلې او مهمات نیولي دي.

د ننګرهار مرستیال والي غلام رحمان حیدري ویلي، چې له دې موټر څخه ۵۲۵ وسلې او ۲۷ زره مرمۍ کشف او نیولي دي.

د نوموړي د څرګندونو له مخې؛ دا وسلې او مرمۍ پر ډېر مهارت د موټر په بېلابېلو برخو کې پټې شوې وې، چې پر تړاو یې دوه کسان نیول شوي هم دي.

په نیول شویو وسلو کې ۴۹۷ ټومانچې، یو کلکوف، ۱۰ ام فور او ۱۷ ټیټکو ټوپکونه دي.

د ننګرهار مرستیال والي دا عمل د “ځینو مغرضو کړیو” کار وباله او ټینګار یې کړی؛ امنیتي ځواکونه به اجازه ورنکړي، چې په دې ولایت کې امنیت ګډوډ شي.

ویل کیږي، چې له دې وروسته به هیڅ پاکستاني موټر ته اجازه ورنکړ شي، چې له عمري کمپ څخه بل لور ته حرکت وکړي او راستنېدونکي به د اسلامي امارت له‌خوا خپلو اصلي سیمو ته لیږدول کیږي.