د کندهار د عینو مېنې روغتون د ۴۵ میلیون افغانیو پر لګښت د MRI او X-ray عصري وسایلو د لېږد او نصبولو چارې پیل کړې.

د کندهاردعينو مېنې په ۳۵۰ بستريز دولتي روغتون کې د MRI او اکسرې پر مختللي ماشينونه نصب او پر فعاليت يې پيل وکړ .

د عامې روغتيا وزارت د چارواکو د څرګندونو له مخې؛ دا پرمختللي ماشينونه د دې وزارت په بودجه د ۴۵ ميليون افغانيو پر لګښت ګټې اخستنې ته سپارل شوي دي.

دوی ویلي؛ له دې سره به تر دېره د افغانانو هغه ستونزې، چې مخکې به د خپلو روغتيايي معايناتو لپاره له هېواده بهر ته په ډېرو ستونزو تلل؛ حل شي .

دغه راز د کندهار سيمه‌یيز مشران د دې ماشينانو نصب او فعاليت يو ښه زېری بولي او له طبي داکترانو غواړي، چې د خپلو ناروغو هېوادوالو رښتینی خدمت وکړي .

دعامې روغتيا وزارت اداري مرستيال محمد اسحق صاحبزاده وایي؛ د ټول زون لپاره دا يو ښه زيری دی. نن مونږ الحمدالله د عينو مېنې په روغتون کې د ام آر آی پرانسته کوو، چې د ۴۰ ميلیون افغانیو پر ارزښت د دې وزارت له بودجې اخیستل شوی دی. دغه راز ورسره یو اکسرې هم شته، چې د ۵ ميلیون افغانيو پر ارزښت رانيول شوې، چې دواړه ډېره پرمختللې او عصري دي.

هغه په اوسنيو سختو اقتصادي حالاتو کې د روغتيايي آسانتياوو رامنځته کول د افغانانو لپاره ستونزمن بولي او وايي هڅه کوي يو په بل پسې دا ستونزې حل کړي .

د کندهار سيمه‌یيز چارواکي بيا له داکترانو غواړي، چې د خپلو ربړېدلو افغانانو روغتيايي ستونزې پر پوره اخلاص او ایماندارې  تر سره کړي .

د کندهار والي مرستيال حيات الله مبارک وایي: داکتر صاحب محترمه! که مشر تا ته مراجعه کوي؛ د الله پاک په خاطر ورته د خپل پلار پر سترګه وګورئ، عزيزانو خدمت يې وکړې او که کشر درته مراجعه کوله د الله پاک په خاطر درته وايم له خپل اولاد او خپل بچي یېکم مه بولئ. ما په داکتر صاحبانو کې په ډېرو ځايو کې دا اخلاص ليدلی دي؛ دا ستاسې لپاره نه‌وايم دا ما باالمشاهده ليدلی دي.

د يادونې ده، چې د هېواد د لرې پرتو سيمو ډېري اوسيدونکي، چې نالوستي او د خپلې مورنې ژبې ماسيوا پر بله ژبه نه پوهيږي د خپلو روغتيايي ستونزو د حل لپاره ګاونډ  هېوادونو لکه ايران او پاکستان ته ځي، چې هلته د نابلدۍ او د پوليسو د ناوړه چلند له کبله د ښځو او ماشومانو په ګډون زندانونو ته اچول کيږي.

 د بلخ ولایت روغتیايي مسوولین وايي، له تېرې یوې اوونۍ راپدیخوا په دې ولایت کې د کانګو پر ناروغۍ دوه کسان مړه شوي دي.

د بلخ د عامې روغتیا رییس په خلکو کې د دغې ناروغۍ د خپرېدو په اړه د اندېښنې پر څرګندولو ويلي، چې په تېره یوه اوونۍ کې د دغې ناروغۍ لس مثبتې پېښې ثبت شوې دي.

د دې ولایت د عامې روغتیا رییس نجيب الله توانا د کانګو تبې پر وړاندې د همغږۍ په غونډه کې وويل، چې تر اوسه په‌دې ناروغۍ دوه کسان مړه شوي دي.

د بلخ ولایت د پېنځه سوه بستریز روغتون رییس داکتر نبی الله امیري ویلي؛ دغه ناروغي خطرناکه او وژونکې ده او له هېوادوالو یې غوښتي، چې له څارویو سره له اړیکو ډډه وکړي.

دغه راز د بلخ سیمه‌ییزو چارواکو له رسنیو او د دغه ولایت د حج او اوقافو له ریاست څخه غوښتي، چې له عامې روغتیا ریاست سره دې د خبرتیا په برخه کې مرسته او همکاري وکړي.

د بلخ ولایت د کورنیو غړي، چې خپلوان یې په‌دې ناروغۍ اخته شوي، له نورو ښاریانو غوښتنه کوي، چې د داکترانو لارښوونې دې جدي ونیسي.

د بلخ ولایت د اطلاعاتو او فرهنګ ریيس مولوي ذبيح الله نوراني له رسنيو وغوښتل، چې د دغې ناروغۍ د مخنيوي په اړه خلکو ته معلومات ورکړي، چې د دغې وژونکې ناروغۍ له زيانونو ځانونه خبر کړي.

د بلخ د عامې روغتیا ریاست چارواکي د کانګو تبې د خپرېدو په اړه اندېښنه څرګندوي او وايي، د لوی اختر له رارسېدو سره به د څارویو د پیر او پلور په بازارونو کې نوره ګڼه ګوڼه هم پیدا شي.

د ملګرو ملتونو د بشري چارو د همغږۍ دفتر (اوچا) څرګنده کړې؛ په افغانستان کې سږ کال د روغتیايي خدمتونو د وړاندې کولو لپاره شاوخوا ۵۰۰ میلیون دالرو ته اړتیا ده.

دغې ادارې د پنجشنبې پر ورځ ( د غبرګولي څلورمه ) په ډاګه کړې، چې څو بېلابېلو پېښو د افغانستان روغتیايي اړتیاوې رامنځته کړې دي.

د ملګروملتونو دغې ادارې ټینګار کړی، چې د ژوند ژغورونکیو روغتیايي خدمتونو په برخه کې د پانګونې کمښت به په دغه هېواد کې د ډېرو زیانمنونکیو کسانو د مړینې د زیاتېدو سبب شي.

اوچا لیکلي؛ سږ کال ۱۵ اعشاریه ۶ میلیون خلکو ته د روغتیا پاملرنې د وړاندې کولو او مرستې رسولو لپاره ۴۴۹ اعشاریه ۹ میلیون دالرو ته اړتیا ده.

د دغې ادارې د اټکل له مخې؛ په افغانستان کې د هغو کسانو شمېر، چې روغتیايي خدمتونو ته اړتیا لري ۱۷ اعشاریه ۶ میلیون کسانو ته رسېږي.

په همدې حال کې د روغتیا نړیوالې ټولنې له دې مخکې ویلي وه، چې افغانستان په آسیا کې د میندو د مړینې تر ټولو لوړه کچه لري، چې په هرو سل زره زیږونونو کې ۶۳۸ مړینې رامنځته شوې دي.