تازه خبرونه
د ولسمشر لومړي مرستیال د پلازمېنې وضعیت غیرعادي اعلان کړ
د ولسمشر لومړي مرستیال امرالله صالح نن سهار (پنجشنبه د سلواغې ۲۳) د سهار د ۶:۳۰ په امنیتي ناسته کې ویلي، چې په پلازمېنه کابل کې وضعیت غیرعادي دی.
امرالله صالح د روغ پاتي ډریور د څرګندونو له مخې ويلي، چې د رابعه بلخي روغتون مخې ته په پرونۍ چاودنه کې، یو ماین په یوه ټکسي کې د دوه سپرلیو لخوا ځای پر ځای شوی و.
نوموړي زیاته کړې؛ حکومت اړ کیږي، چې له ټولو ټکسي چلوونکیو څخه د مسافرو د تلاشۍ غوښتنه وکړي.
د ولسمشر لومړي مرستیال ټینګار کړې؛ تر دې دمه حکومت د پېښو د کمولو لپاره محدودیتونه ندي لګولي.
د نومړي د څرګندونو له مخې؛ دا عادي خبره نده ، مونږ ممکن د ټولو ټکسي چلوونکیو څخه غوښتنه وکړو، چې لږ تر لږه خپلې سپرلۍ بدني تالاشي کړي او یا د هرې سپرلۍ له کښته کېدو وروسته خپل موټر لاندې باندې ښه وګوري.
امرالله صالح ویلي: په نورو هېوادونو کې پېښې د محدودیتونو پر پلي کولو کمېږي. دا هغه ګام دی، چې تر دې دمه مو پورته کړې ندی.
دا په داسې حال کې ده، چې د نښلیدونکیو ماینونو چاودنو د هېواد په ځانګړي توګه کابل ښاریان ډېر اندېښمن کړي؛ ځکه پرون په کابل کې څلور چاودنې رامنځته شوې، چې د پېنځمې امنیتې حوزې د مشر په ګډون یې ګڼو کسانو ته مرګ و ژوبله اړولې ده.