Connect with us

تازه خبرونه

د پاکستان لوی درستیز پر اووه ورځني سفر امریکا ته تللی

Published

 on

(Last Updated On: تله ۱۴, ۱۴۰۱)

د پاکستان د پوځ مشر جنرال قمر جاوید باجوه له متقاعد کېدو مخکې امریکا ته د خپل سفر پر مهال له لوړپوړیو دفاعي، استخباراتي او سياسي چارواکو سره کتلي او د افغانستان په اړه یې هم خبرې کړې دي.

له ترهګرۍ سره مبارزه، د سیمې امنیت په ځانګړي توګه افغانستان او د دواړو حکمتونو دفاعي همکاري د ده د سفر د اجنډا سرټکي دي.

قمر جاوید باجوه، چې تېره جمعه امريکا ته رسېدلی؛ تر دې دمه يې د دفاع وزير لويد آستن، د ملي امنيت سلاکار جيک سليوان، د بهرنيو چارو وزیر انتوني بلينکن، د ملي استخباراتو له رييس ارویل هينس او د سي آی اې له مشر ويليم برنز سره ليدلي دي.

په پاکستان کې د امریکا سفیر دونالد بلوم څرګنده کړې: پاکستان له امریکا سره د همکارۍ ډېر امکانات لري؛ دواړه هېوادونه کولی شي د سوداګرۍ او تکنالوژۍ په برخو کې ښې همکارۍ ولري، د دواړو هېوادونو ترمنځ د اقتصادي همکاریو د ودې زمینه شته، نو زه ډېر خوشبین یم.

له تېراګست راپدیخوا په کابل کې د امریکا د بې پیلوته الوتکې له برید وروسته د اسلامي امارت لوړپوړیو سیاسي او پوځي چارواکو په ډاګه کړه، چې د امریکا بې پیلوته الوتکې له پاکستان څخه افغانستان ته ننوتي دي.

هغه مهال پاکستان رد کړه؛ خو تېره اوونۍ د افغانستان د بهرنیو چارو وزارت سیاسي مرستیال شېر محمد عباس ستانکزي څرګنده کړه؛ کره شواهد لري، چې ښيي پاکستان له خپل فضايي حریم څخه افغانستان ته د امریکا د بې پیلوته الوتکو د ننوتو په معامله کې تجارت کړی او میلیونونه دالر تر لاسه کوي.

په هند کې د پاکستان پخواني سفیر عبدالباسط ویلي: دا ممکنه ده، چې امریکا د افغانستان او سیمې بدلونونو ته په پاملرنه یو ځل بیا پاکستان ته مخه کړې او غواړي د ګډې همکارۍ لپاره نوې تګلارې غوره کړي. زه فکر کړم، چې دواړه خواوې په بېلابېلو موضوعاتو خبرې کوي؛ خو دواړه لوري به هڅه وکړي، چې لاسته راوړنې ولري. د همکارۍ په صورت کې دواړه لوري هڅې کوې، چې ګټې یې خوندې شي.

د امریکا د بهرنیو چارو وزیر په دې وروستیو کې تائید کړې، چې واشنګتن به پاکستان ته لسګونه F-16 جنګي الوتکې ورکړي.

پاکستان ادعا کوي، چې یو شمېر ترهګرې ډلې لکه تحریک طالبان پاکستان، داعش او القاعده په افغانستان کې فعالې دي او د دوی امنیت او ثبات ګواښي. دا هغه څه دي، چې د اسلامي امارت لخوا په کلکه رد شوي دي.

د اسلام آباد د پالیسۍ د څېړنیز انستیتیوت اجرائیوي رییس حسین ندیم وایي: پاکستان امریکا ته له امنیت ورکولو پرته بل څه نلري. هغه څه، چې امریکا یې له پاکستان څخه تمه لري؛ د ترهګرۍ په برخه کې همکاري ده. پاکستان اوس هم د امریکا لپاره یو مهم حکومت دی او د هغو لس حکومتونو په ډله کې دی، چې امریکا ورته اړتیا لري. مونږ د ۲۲۰ میلیون ځوان نفوس له لرلو سره د امریکا لپاره خورا مهم خلک یوو، چې ځواکمنه وړتیا او په سیمه کې د یوې ګټورې پالیسۍ نظامي ځواک لرو او پاکستان کولی شي له دې دریځ څخه ښه ګټه پورته کړي.

پاکستانی سناتور مشاهد حسین څرګندوي: کله، چې امریکا د پاکستان همکارۍ ته اړتیا ولري؛ نو اسلام آباد ته مخ اړوي، خو کله، چې دا اړتیا پوره شي بیا پاکستان هیروي. مونږ په افغانستان کې له امریکا سره په بېلابېلو پړاوونو کې همکارۍ وکړې او په وروستۍ برخه کې مو د امریکا د ستراتیژیکو شتمنیو د ایستلو په عملیاتو کې له امریکا سره همکاري وکړه؛ خو یوه تشه مننه یې هم ونکړه. امریکايي چارواکي په ښکاره وايي، چې له پاکستان سره پراخې اړیکې نه غواړي، بلکې له دې هېواد سره یوازې د خپلو موخو لپاره اړیکې پالي.

قمرجاوید باجوه په داسې حال کې امریکا ته تللی، چې د لوی درستیز په توګه یې ماموریت د نومبر په میاشت کې پای ته رسيږي.عاصم منير، ساحر شمشاد مرزا، اظهر عباس، نعمان محمود، فيض حميد او محمد عامر په هغو کسانو کې دي، چې ښايي یو یې د پاکستان د پوځ مشري پر غاړه واخلي.

تازه خبرونه

پاکستان او روسیه به د اسلامي امارت د کړنو ارزونه وکړي

Published

on

(Last Updated On: سلواغه ۱۰, ۱۴۰۱)

د پاکستان بهرنیو چارو وزیر بلاول بوتو زرداري پر دوه ورځني رسمي سفر د روسیې پلازمېنې مسکو ته رسېدلی دی.

د پاکستان د سیمه ییزو رسنیو د راپور له مخې؛ زرداري به د دوشنبې پر ورځ په مسکو کې له خپل روسي سیال سرګي لاوروف سره وویني او خبرې به یې د افغانستان پر حالاتو راوڅرخیږي.

پاکستانيو رسنیو د رسمي سرچینو د څرګندونو له مخې په ډاګه کړې؛ پاکستان او روسیه به نه یوازې د یوه ټولګډونه حکومت د جوړولو لپاره پر نړیوالو ژمنو او له خپلې خاورې د ترهګرو ډلو د فعالیت پر مخنیوي خبرې وکړي، بلکې د اسلامي امارت پر پرمختګونو به هم بیاکتنه وکړي.

د تریبیون د راپور له مخې؛ د پاکستان د بهرنیو چارو وزیر بلاول بوتو زرداري به په مسکو کې د دوشنبې پر ورځ له خپل روسي سیال سرګي لاوروف سره وګوري او د دوی د اجنډا یوه اړینه موضوع به افغانستان وي.

زرداري د پاکستان د بهرنیو چارو د وزیر په توګه مسکو ته لومړنی سفر کوي. نوموړی اندېښمن دی، چې د تحریک طالبان پاکستان (TTP) وسلوالې ډلې په افغانستان کې پټنځایونه لري.

د روسیې د بهرنیو چارو وزارت تویت کړی، چې دواړه وزیران به له ترهګرۍ سره د مبارزې او د افغانستان، سوریې او اوکراین د وضعیت په ګډون پر یو شمېر سیمه ییزو موضوعاتو خبرې وکړي.

Continue Reading

تازه خبرونه

اسلامي امارت دې ښځو ته د زده‌کړو او کار اجازه ورکړي – د اسلامي همکاریو ټولنه

Published

on

(Last Updated On: سلواغه ۱۰, ۱۴۰۱)

د اسلامي همکاریو ټولنې (OIC) د یکشنبې پر ورځ د افغانستان اسلامي امارت له چارواکو وغوښتل، چې د نجونو لپاره دې د ښوونځیو او پوهنتونونو د بیا پرانستلو هلې ځلې وکړي، چې د زده‌کړو له ټولو کچو برخمنې شي.

د اسلامي همکاریو ټولنې عمومي سکرتریت د شنبې پر ورځ د اسلامي امارت د لوړو زدکړو وزارت ته د هغې پرېکړې په اړه خپله ناهیلي څرګنده کړه، چې د ټول هېواد په ټولو دولتي او خصوصي پوهنتونونو کې سږکال د ښځینه زده‌کړیالانو یا محصلینو د داخلیدو مخه نیسي.

د اسلامي همکاریو ټولنې تویت کړی؛ دا وروستی فرمان د کابل د رسمي چارواکو لخوا ښوونې، روزنې او عامه کارونو ته د نجونو او ښځو د لاسرسي په اړه اعلان شوي پراخ محدودیتونه نور هم سختوي.

یادې ټولنې د اسلامي امارت له چارواکو غوښتي، چې د نجونو لپاره د منځنیو ښوونځیو، لیسو او پوهنتونونو د بیا پرانستلو لپاره هڅې وکړي او دوی ته د زده‌کړو زمینه برابره او په ټولو هغو کچو اوتخصصونو کې، چې ورته اړتیا ده زده‌کړې او کار وکړي.

یادې ټولنې له اسلامي امارته وغوښتل، چې پر وروستۍ پرېکړه او پخوانیو فرمانونو له سره غور وکړي.

Continue Reading

تازه خبرونه

د امریکا ځانګړی استازی له بهرنیو همکارانو او افغان کډوالو سره د خبرو نیت لري

Published

on

(Last Updated On: سلواغه ۱۰, ۱۴۰۱)

د امریکا د بهرنیو چارو وزارت څرګنده کړې؛ د افغانستان لپاره د امریکا ځانګړی استازی توماس ویست په روانه اوونۍ کې پاکستان، جرمني او سویس ته له ملګرو، افغانانو او د بشري مرستو له موسسو سره د خبرو لپاره سفر کوي.

یاد  وزارت یکشنبه ناوخته (د سلواغې ۹ ) څرګنده کړه، چې توماس ویست به دغو هېوادونو ته په خپل څلور ورځني سفر کې له امریکايي همکارانو، افغانانو او مرستندویه بنسټونو سره پر سلا مشورو سربېره د افغانستان په اړه هم خبرې وکړي.

د یادې سرچینې د څرګندونو له مخې؛ پاکستان، جرمني او سویس ته د توماس ویست د څلورورځني سفر موخه دا ده، چې له شریکانو او افغان کډوالو سره د هغو د ګڼو ننګونو په اړه سلا مشورې وکړي، چې دمګړۍ د افغانستان خلک، ښځې او نجونې ورسره مخ دي.

توماس ویست تویت کړی: زه به د جنورۍ له ۲۹ څخه د فبرورۍ تر ۴ پورې پاکستان، جرمني او سویس ته سفر وکړم، چې له شریکانو، افغانانو او بشردوستانه مرستندویه موسسو سره د هغو غیر معمولي ننګونو په اړه مشوره وکړم، چې مونږ د افغانانو د ملاتړ په برخه کې ورسره مخ یوو.

بهرنیو حکومتونو او نړیوالو مرستندویه موسسو په وار وار د اسلامي امارت له چارواکو غوښتي، چې دا پرېکړه بېرته واخلي او افغان میرمنو او نجونو ته د زده‌کړو، کار، سپورت او عامه ژوند کولو اجازه ورکړي؛ خو تر اوسه کوم تعامل ته رسېدلي ندي.

Continue Reading

Trending

Copyright © 2022 Ariana News. All rights reserved!