Connect with us

تازه خبرونه

د پیسو نړیوال صندوق په افغانستان کې له بشري ناورین خبرداری ورکړ

Published

 on

(Last Updated On: وږی ۲۷, ۱۴۰۰)

د پیسو نړیوال صندوق ( آی ام اف ) چارواکو ویلي، چې په افغانستان کې د نوي نظام له رامنځته کېدو سره د دوي اړیکې له دې حکومت سره ځنډېدلي او مرستې هم اوس نه کیږي.

په تېره یوه میاشت کې د افغانستان د پخواني حکومت له سقوط او د نوي نظام له رامنځته کېدو سره سم پر دې هېواد یولړ بندیزونه ولګېدل؛ اقتصادي ماشین درېدلی، کار روزګار اغېزمن شوی، د عامه خدمتونو بهیر ګډوډ او خلک تر فشار لاندې راغلي دي.

تازه د پیسو نړیوال صندوق تائیدوي، چې له نوي حکومت سره اړیکې پرې شوي او د دې ټولنې ویاند په دې اړه ویلي، چې په افغانستان کې انساني ناورین د را منځته کېدو په حال کې دی.

د پیسو نړیوال صندوق ویاند جیري رایس ویلي: له افغانستان سره زمونږ اړیکه تر هغې درېدلې، چې چې نړۍ  د دې هېواد نظام پر رسمیت نه وي پېژندلی؛ نو د پیسو نړیوال صندوق هغه مرستې، چې تاسې یې په اړه پوښتلي ورسره ځنډېدلي دي.

د ملګرو ملتونو د کډوالو ادارې مشر افغانستان ته په سفر کې له انساني ناورین سره د مقابلې وخت لنډمهاله بولي او څرګندوي؛ د خوراکي توکو، دارو درملو، او استوګنځیو کمی سترې ستونزې دي.

د ملګرو ملتونو د کډوالو ادارې کمېشنر فیلیپو ګراندی وایي: چټکتیا ډېره مهمه ده؛ ځکه په افغانستان کې ژمی راروان او ډېر سخت دی. مونږ یوازې څو اوونیز فرصت لرو، چې دا بېړنۍ اړتیاوې پوره کړو.

اسلامي امارت د حکومت د ستنو د پیاوړتیا لپاره بېلابېلې هڅې پیل کړي، چې په دې لړ کې د سپینو بیرغونو د چاپول بازار د چاپ خونو بازار تود کړی او یوشمېر خلکو ته یې د کار زمینه برابره کړې ده.

د چاپخونې کارکوونکی ویس الدین وايي: زمونږ ټولې هڅې د اسلامي امارت د بیرغ پر چاپولو راڅرخي. نور څه لکه پخوا نه چاپیږي.   

د کابل اوسېدونکی شکېب وایي: مونږ خوښ یوو، چې طالبانو مو امنیت رامنځته کړی؛ غلا او لوټ درېدلی. یوازنۍ ستونزه بېکاري ده، چې باید خلکو ته کاري زمینې رامنځته شي.  

د کابل اوسېدونکي احمد یوسف توحیدي ویلي: مونږ نن د اسلامي امارت بیرغ وپېره؛ ځکه، چې کلمه پرې لیکل شوې ده.          

نړۍ او د افغانستان خلکو د نوي نطام کړنو ته سترګې نیولي، چې څه ډول روانه ستونزه حلولی شي.

دا په داسې حال کې ده، چې د اسلامي امارت د بهرنیو چارو وزارت چارسمبالي اوړمه ورځ د امریکا لخوا د افغانستان د پیسو کنګلول ظالمانه عمل وباله او له دې هېواد سره یې د نړیوالې ټولنې د څه باندې یو اعشاریه دوه میلیارډ ډالرو پر ارزښت د بشري مرستې برابرولو ژمنه یې وستایله.

تازه خبرونه

د افغانستان دفاع وزیر د هېواد له پخوانیو جنرالانو سره وکتل

Published

on

(Last Updated On: سلواغه ۱۳, ۱۴۰۱)

د دفاع وزارت له لوري نن په یوه خپره شوې خبرپاڼه کې ویل شوي، چې د ملي دفاع وزیر او د وسلوال پوځ ستر درستیز له پخوانیو جنرالانو او افسرانو سره په لیدنه کې د هغو د هراړخیزو ستونزو د حل ډاډ څرګند کړ.

په دې کتنه کې، چې پرون (چارشنبه، د سلواغې ۱۲ ) ترسره شوې؛ دفاع وزیر محمد یعقوب مجاهد ویلي؛ اوس ټول هدف سوله، امنیت او له ځمکني بشپړتیا دفاع ده او مونږ به په هر قیمت د دې اسلامي نظام د ساتنې هڅه کوو.

دفاع وزیر او د پوځ ستر درستیز قاري فصیح الدین فطرت څرګنده کړې؛ اوس ټول هدف سوله، امنيت او د ځمکنۍ بشپړتيا دفاع ده او مونږ بايد په هر قيمت دا اسلامي نظام وساتو.

د یاد وزارت په خبرپاڼه کې راغلي، چې په يادو پخوانيو پوځيانو کې بريد جنرال افضل امان، ډګرجنرال محمد زمان احمدزي، تورنجنرال شهرګل، تورن جنرال نبي الله، بريد جنرال فريد، ډګروال افندي او يو شمېر نور جنرالان او د قول اردو پخواني قومندانانو نومونه د یادونې وړ دي.

په دې کتنه کې مجاهد وویل، چې د دوی یوازنۍ موخه په هېواد کې د سولې ټینګښت او د تېرو زخمونو مرهم کول دي.

هغه وایي، چې د تعصب د ختمولو لپاره اخلاص او مينې ته اړتيا ده.

دفاع وزير د پخوانيو پوځي افسرانو ستونزې او وړانديزونه هم واورېدل او ژمنه يې وکړه، چې د هغوى ستونزې به حل شي. نوموړي دوی ته د امنیت ډاډ هم ورکړ.

Continue Reading

تازه خبرونه

د امریکا استازي او پاکستانيو چارواکو د اسلامي امارت د ښځینه‌وو پر بندیزونو خبرې وکړې

Published

on

(Last Updated On: سلواغه ۱۲, ۱۴۰۱)

د افغانستان لپاره د امریکا ځانګړي استازي توماس ویست پاکستان ته په دوه ورځني ( د سلواغې ۱۰ – ۱۱ ) سفر کې د جنرال سید عاصم منیر په ګډون له لوړ پوړیو چارواکو سره د ترهګرۍ او د اسلامي امارت د ښخینه‌وو پر تعلیمي بندیزونو خبرې کړي دي.

د امریکا سفیر د سې شنبې پر ورځ تویت کړی او د افغانستان په اړه یې د دوه ورځنیو ګټورو غونډو په لړ کې د پاکستان میلمه پالنه ستایلې ده.

ویست څرګندوي؛ هغه د پاکستان د پوځ له مشر جنرال عاصم منیر، سفیر محمد صادق او د بهرنیو چارو له سکرتر اسد مجید خان سره لیده کاته کړي دي.

د دې لیدنو په لړ کې توماس ویست ویلي، چې دوی د تروریزم او امنیتي وضعیت، نړیوال یووالي اړتیا او د میلیونونو افغانانو حیاتي مرستو او تعلیم ته د لاسرسي په اړه د طالبانو ( اسلامي امارت) خطرناکو اغېزو په اړه خبرې وکړې.

د امریکا یاد استازي د ملګرو ملتونو دا کار مهم ګڼلی او له پلي کوونکیو څخه یې د ملاتړ غوښتنه هم کړې، چې د ښځینه مرستندویه کارکوونکیو او ښځینه زده‌کړې په اړه د اسلامي امارت د بندیزونو د لغو کولو غوښتنه وکړه.

هغه ټینګار کړی، چې: له زړورو افغان ښځو سره مې وکتل؛ هغوی مهمې غوښتنې او نیوکې وړاندې کړې. په افغانستان کې چارسمبالې ښځې له کړاوونو سره مخ دي او نړیواله ټولنه باید د هغو اړتیاوو ته لومړیتوب ورکړي.

ویست ویلي؛ ښځې او نجونې، چې په کورونو کې محدودې دي، له سختو ذهني او رواني فشارونو سره مخ دي.

ویست پر زده‌ګړو ‌او کار بندیزونه بې رحمانه برید ګڼلی او ډاډ ورکوي، چې د پاکستان ترڅنګ ولاړ یوو.

هغه دغه راز په پېښور کې د تروريستي بريد له کبله د زياتو بې ګناه خلکو پر وژل کيدو هم ژوره خواشيني څرګنده کړې ده.

دا په داسې حال کې ده، چې د اسلامي امارت د رسنیو پر خپرونو د څار مشر عبدالحق حماد ويلي، د نجونو د زده‌کړې مطلق بندول افراط دی او بې چوکاته بریښودل یې تفریط دی. د اسلامي امارت تګلاره د اعتدال پر بنسټ ولاړه ده او افراطیت نه مني.

Continue Reading

تازه خبرونه

د ټیټ کیفیت څلور تانکره دیزل بېرته ایران ته وروګرزول شول

Published

on

(Last Updated On: سلواغه ۱۲, ۱۴۰۱)

د افغانستان د ستندرد ملي ادارې د سې شنبې پر ورځ وویل، چې دې ادارې د ټیټ کیفیت څلور تانکرونه بېرته ایران ته مسترد کړل.

یادې ادارې په ډاګه کړې؛ دوی د هرات ولایت په اسلام‌کلا بندر کې د تېلو د کیفیت له کتنې وروسته څلور تانکره بېرته ایران ته ستانه کړي دي.

د دغې ادارې د څرګندونو له مخې؛ دوی د بې کيفيته تېلو د واردولو د مخنيوي لپاره عملي ګامونه پورته کړي دي.

سربېره پردې دغې ادارې له سوداګرو وغوښتل؛ د وارد شويو توکو پر کیفیت دې خانونه ډاډمن کړي، چې د دې ادارې له معیارونو سره سمون ولري. که نه؛ نو دوی به له ورته پایلو سره مخ شي.

دا لومړی ځل ندی، چې دې ادارې ټیټ کیفیت تیل بېرته مستردوي . د بېلګې په توګه د جنورۍ پر لومړیو کې یې ایران ته د بې کیفیته تېلو ۲۶ ټانکرونه بېرته واستول.

Continue Reading

Trending

Copyright © 2022 Ariana News. All rights reserved!