په افغانستان کې د یوناما مشرې او مل پلاوي نن دوشنبه( د غویی اتمه) د کلیو د بیارغونې او پراختیا وزارت له چارسمبالي سره په لیدنه کې ویلي؛ مونږ به ډېر ژر د بېرته راستانه شویو کډوالو په ښارګوټي کې د پاکو اوبو رسولو شبکو د جوړولو کارونه پیل کړو.

د کلیو د بیارغونې او پراختیا وزارت د خبرپاڼې له مخې؛ د افغانستان لپاره د ملګروملتونو د عمومي منشي ځانګړې استازې مېرمن روزا اوتونبایوا او مل پلاوي ویلي، چې دوی به افغانستان ته د بېرته راستانه شویو کډوالو لپاره د پاکو اوبو رسولو، روغتیا ساتنې او په نورو برخو کې نه یوازې خپلې مرستې ورسوو، بلکې د مرستو پر دوام یې هم ټینګار وکړ.

د کلیو د بیارغونې او پراختیا وزارت چارسمبالي محمد یونس آخوندزاده پلاوي ته د ښه راغلاست ترڅنګ څرګنده کړې؛ مونږ د یوناما دفتر له دوامدارو همکاريو  ستاینه کوو، چې په سختو حالاتو کې یې خپلې مرستې رسولي او جاري ساتلې دي.

محمد یونس آخوندزاده زیاته کړې، چې تاسې باید د بشري مرستو ترڅنګ بنسټیزو او عام المنفعه پروژو ته هم پاملرنه وکړئ او خپل کارونه له وزارت سره پر همغږۍ ترسره کړئ، چې هم مسوولیت سم ادا شي او هم ټولو هېوادوالو ته د متوازن انکشاف له مخې کار وشي.

د راپورونو له مخې؛ په ملک پوله کې ایران ۱۹۹ افغان بندیان اسلامي امارت ته وسپارل او دوه ایراني اتباع هم د افغان چارواکو لخوا د ایران حکومت ته سپارل شوي دي.

د بندیانو دا تبادله پرون (یکشنبه د غویی اوومه) د دواړو خواوو ترمنځ په ملک پوله کې رامنځته شوه.

د راپور له مخې: ۱۹۹ افغان بندیان، چې پخوا د تهران، سیستان – بلوچستان او اصفهان په زندانونو کې بندیان ول؛ د شمالي سیستان او بلوچستان په ملک دروازه کې افغان چارواکو ته سپارل شوي دي.

په راپورونو کې راغلي؛ د بندیانو په دې تبادله کې دوه ایراني وګړي، چې په افغانستان کې یې د بند سزا تېره کړې وه،ایراني چارواکو ته وسپارل شول.

له دې مخکې د ۱۴۰۴ لمریز لېږدیز کال د وري پر اته‌ویشتمه ایراني چارواکو ۱۹۹ افغان بندیان، چې په دې هېواد کې د بېلابېلو جرمونو پر تور بندیان ول؛ د نیمروز ولایت په پل ابریشم دروازه کې د اسلامي امارت چارواکو ته سپارل شوي دي.

د بهرنیو چارو وزارت چارسمبالی(سرپرست) امیر خان متقي د ملګرو ملتونو د بشري چارو له مرستیال ټام فلیچر سره په لیدنه کې ویلي، چې افغانستان اوس هم بهرنیو مرستو ته اړتیا لري.

د بهرنیو چارو وزارت د رسنیزې خبرپاڼې له مخې، چې یکشنبه( د غویی اوومه) خپره شوې؛ راغلي: په دې ناسته کې دواړو خواوو له ګاونډ هېوادونو څخه د کډوالو راستنېدو، اقلیمي بدلون او طبیعي پېښو ناوړه اغېزو سره د مبارزې پر چمتووالي، له مخدره توکو مبارزې، د بزګرانو لپاره د بدیل معیشت چمتو کولو او د روږدو کسانو درملنې بحث او خبرې وکړې.

دواړو خواوو د بشري مرستو د بڼې پراختیا ته د بدلولو، د مرستو په برابرولو کې اقتصادي ګټوربوب رامنځته کولو، د مرستو د اغېزې د زیاتوالي لپاره د کورنیو تولیداتو او ظرفیتونو کارولو، د مرستو د پروګرامونو د پلي کولو پروسې ساده کولو، د پروګرامونو په پلي کولو کې د خلکو لومړیتوبونو ته د پاملرنې او د مرستندویه بنسټونو او اړوند دولتي څانګو ترمنځ د همغږۍ د پیاوړتیا په اړه هم بحث وکړ.

د بهرنیو چارو وزارت چارسمبالي ټینګار وکړ، چې په هېواد کې له څو لسیزو جګړو، ناامنیو او د مخدره توکو د کښت له پای ته رسېدو وروسته، د افغانستان اسلامي امارت هوډ لري، چې هېواد په بېلابېلو برخو کې پر ځان‌بسیا او افغان ولس د بشري مرستو له اړتیا څخه خلاص کړي.

هغه یادونه کړې؛ که څه هم دا وخت نیسي، بهرنۍ مرستې ته اوس هم اړتیا ده.

امیر خان متقي ټینګار کړی، چې مرستې باید د افغانانو له اړتیاوو او لومړیتوبونو سره سمې وي او داسې ولګول شي، چې پر کورني بازار، اقتصادي ودې او کورنيو ظرفیتونو اوږدمهاله مثبت اغېزه ولري.

دغه راز ټام فلیچر ویلي، چې ملګري ملتونه او د افغانستان حکومت د نړیوالې ټولنې او افغانستان ترمنځ د اړیکو د عادي کولو، امنیت، سیمه‌ییز ثبات، اقلیمي بدلون، مخدره توکو پر وړاندې مبارزې او په نورو برخو کې د ګډو اهدافو د ترلاسه کولو لپاره کار کوي.

هغه زیاته کړې، چې له دې وروسته به د مرستو د پروګرامونو په پلي کولو کې اصلي پرېکړه کوونکي ځایي خلک او د مرستو ترلاسه کوونکي وي.

هغه ویلي، چې د مرستو ماهیت له بشري مرستو څخه پراختیایي او بېخبنایي(زیربنایي) کارونو ته بدلول، د افغانانو لومړیتوبونه او موخې په پام کې نیول کیږي.

په پایله کې د بهرنیو چارو وزارت چارسمبالي په دې برخه کې د همکارۍ ډاډ ورکړ او دواړو خواوو هوکړه وکړه، چې د نړیوالو مرستو د اغېزمنتوب د زیاتوالي لپاره همغږي او ګډ کار زیات کړي.