د امریکا سناتور ټیم برچټ روانه اوونۍ ویلي؛ د بهرنیو مرستو له بندېدو سره – سره هره اوونۍ ۴۰ میلیون ډالر د امریکايي مالیه ورکوونکو له پیسو څخه افغانستان ته استول کیږي.

د جمعې پر ورځ جمهوري غوښتونکي سناتور ټیم برچټ بریټ بارټ نیوز ته ویلي."مونږ ته ویل شوي، چې دا همداسې ده؛ په یو ډول نه په ډول هغو دا ترلاسه کړي.دا یې ښکاره بڼه ده، چې مونږ یې په اړه پوهیږو."

افغانستان ته د ۴۰ میلیون ډالرو نغدي مرستې لېږد د پخواني حکومت له ړنګیدو او د اسلامي امارت واک ته له رسېدو وروسته پیل شو.

دغه راز د ملګرو ملتونو د بشري مرستو پروګرام ته نغدي پیسې لېږل شوې دي او اسلامي امارات پرله‌پسې دا ادعاوې رد کړې، چې دوی له دې پیسو څخه ګټه پورته کړې ده.

د ۲۰۲۳ کال په اپریل کې د افغانستان د بیارغونې لپاره د ځانګړي مفتش (سیګار) جان سوپکو کانګرس ته شاهدي ورکړه، چې امریکا په ۲۰۲۱ کال کې له وتلو وروسته افغانستان ته ۸ میلیار‌ډ ډالر ورکړي دي.

په دسمبر ۲۰۲۳ کې، برچټ د انرژۍ نړیوالې ادارې ته د پیسو د جریان د بندولو لپاره یو قانون وړاندې کړ. دا لایحه د امریکا د استازو جرګې په یوه خوله تصویب شوه؛ خو د ډیموکراټانو تر کنټرول لاندې سنا کې یې ملاتړ ونشو.

بورچټ د روان کال په مرغومي کې د امریکا د استازو جرګې ته ویلي وه، چې افغانستان ته د پیسو د لېږد د مخنیوي لپاره یې یوه لایحه وړاندې کړې. که څه هم دا لایحه د امریکا د استازو جرګې د ملاتړ سره مخ شوه؛ خو د امریکا سنا دا تصویب نکړه. ټیم بورچټ ویلي، چې دا لایحه به د امریکا د ولسمشر تر میز رسوي.

برچټ ویلي وه: "زه د دواړو خونو له لارې د دې کار کولو او د ولسمشر ټرمپ میز ته د ژر تر ژره رسولو پر تمه یم."

برچټ له بریټ بارټ نیوز سره په خبرو کې ویلي، چې پلار یې "یو متل کاوه: 'زاړه سړي پرېکړه کوي او ځوانان مړه کیږي.'"

د افغانستان د اقتصاد وزارت مسلکي مرستیال عبداللطیف نظري ویلي، چې اسلامي امارت د امریکا پر مرستو متکي ندی او د دې مرستو له بندېدو سره به د افغانستان د اقتصادي ودې مخه ونه نیول شي.

له افغانستان څخه د امریکا له وتلو وروسته د جو بایډن ادارې له افغانستان سره له درې میلیارد ډالرو څخه ډېرې بشري مرستې کړې دي. د امریکا د حکومت پخوانیو چارواکو ویلي، چې دا مرسته د ملګرو ملتونو له لارې په افغانستان کې د بشري ناورین د کمولو لپاره کارول شوې ده.

له ازبکستان څخه امریکا ته د پخواني افغان پوځ د ۷ چورلکو د سپارلو په غبرګون کې ملي دفاع وزارت له امریکا وغوښتل، چې نه یوازې دې افغانستان ته د ټولو چورلکو په بېرته راستنولو کې رامنځته شوي خنډونه لرې کړي، بلکې هغه دې افغانانو ته راوسپاري.

د دفاع وزارت په خبرپاڼه کې راغلي: " اسلامي امارت په دې اړه اندېښمن دی؛ ځکه دا چورلکې د افغانستان دي او د پخواني نظام د چارواکو د تېښتې پرمهال ازبکستان ته لېږدول شوې، نو باید بېرته افغانستان ته راوسپارل شي."

د خبرپاڼې له مخې: "دا زمونږ لپاره د منلو وړ نده، چې دا چورلکې په کوم دلیل امریکا ته لېږدول کیږي؛ ځکه، چې د افغانستان خلک حق لري له خپلو حقونو دفاع وکړي، ویې غواړي او دغه راز ګاونډ هېوادونه هم باید د افغانانو حقونو ته درناوی وکړي."

د مخابراتو او معلوماتي ټکنالوژۍ وزارت ويلي، چې د اسلامي امارت ټول سیسټمونه خوندي دي او هیڅ سیسټم مو هک شوی ندی.

د مخابراتو وزارت د خبرپاڼې له مخې؛ په ټولنیزو رسنیو کې شریک شوي اسناد اکثره پر ټولیزه توګه د لاسرسي وړ دي او ډېری یې د تېرو کلونو پورې اړه لري او پرله‌پسې راټول شوي دي.

د خبرپاڼې له مخې؛ دا اسناد د عامه افکارو د مغشوشولو لپاره خپاره شوي، چې وښیي؛ حکومتي سیسټمونه هک شوي دي.

د مخابراتو وزارت څرګنده کړې؛ د دې افشا شویو اسنادو ډېره برخه له هغو سکټورونو سره تړاو لري،  چې تر دې دمه کوم ځانګړی سیسټم نلري.

په خبرپاڼه کې راغلي؛ د دې وزارت اړوند سیسټمونه د تخنیکي او مسلکي کارمندانو لخوا ډاډمن او د نورو له لاسوهنې خوندي دي او د هک کېدو اوازې یې دروغ دي.

د مخابراتو وزارت زیاته کړې، چې د ملي معلوماتو مرکز (ډیټا سنټر) او نور آرشیف شوي سیسټمونه په بشپړ ډول خوندي دي او دا مهال د سایبري بریدونو پر وړاندې په یوه باوري چاپېریال کې ساتل کیږي.

ویل کیږي، چې افشا شوي معلومات ممکن په تدریجي ډول له هغو انفرادي کمپیوټررونو څخه ترلاسه شوي وي، چې امنیتي تدابیر نلري.