پولیسو څرګنده کړې، چې د سې شنبې پر ورځ د ویرجینیا په ریچموند کې یوه وسله‌وال د لیسې د فراغت له مراسمو بهر پر خلکو ډزې وکړې؛ دوه کسان یې ووژل او پېنځه نور ټپیان دي.

د رویترز د څرګندونو له مخې، پولیسو ویلي، چې یو ۱۹ کلن شکمن یې د ډزو پر تور نیولی دی.

د ریچموند د پولیسو مشر ریک ادواردز په یوه خبري کنفرانس کې د بریدګر دا چلند کرکجن او ناځوانه وباله؛ ځکه داسې برېښېده، چې یوازې له یوه کس سره دښمني لري.

هغه وایي: کله، چې تاسې داسې ګڼه ګوڼه ولرئ؛ اړینه ده، چې بې ګناه خلک په ګډوډۍ کې راښکېل شي او دا هغه څه دي، چې همدا نن پېښ شول. ښکاره ده، چې دا باید یو خوندي ځای وای… دا رښتیا هم د خواشینوونکې ده، چې یو چا دې پېښې ته د ټوپک راوړلو پرېکړه وکړه او په ټولنه کې مو ترهګري رامنځته کړي.

د امریکا په عامه ځایونو؛ ښوونځیو، پلورنځیو او کلیساګانو کې ډله ییزې ډزې معمول ګرزېدلي دي.

د راپورونو له مخې، وروستۍ ډزې په امریکا کې د ۲۰۲۳ ږ. کال په لومړیو ۱۵۷ ورځو کې ۲۷۹ ډزې وې.

ادواردز ویلي، چې وژل شوي کسان د ۱۸ او ۳۶ کلونو عمرونه لرل او په ټپیانو کې یو ۳۱ کلن سړی سخت ټپي شوی دی.

دغه راز ویل کیږي: په دې ګډوډۍ کې يوه نهه کلنه ماشومه له يوه موټر سره ټکر شوه، چې له کبله يې يوشمېر نور کسان له غورزېدو ټپيان او یا هم وډارشول.

د روسیې دفاع وزارت د دوشنبې پر سهار څرګنده کړه، چې د دوی ځواکونو په ختیځ دونیتڅک کې د اوکراین لوی برید شنډ کړ. که څه هم دا څرګنده نه‌ده، چې دا د اوکراین د عملیاتو پیل و که نه؟!

د اسوشیتید پرس څرګنده کړې؛ د روسیې دفاع وزارت ویلي، چې د دوی ځواکونو د یکشنبې پر ورځ د دونیتڅک د سویل په پېنځه اړوند سیمو کې د اوکراین پراخ برید پر شا وتمباوه.

دونیتڅک د اوکراین له هغو څلورو سیمو څخه یوه هغه ده، چې روسیې په تېر مني کې په غیر قانوني توګه پر ځان پورې وتاړه.

د روسیې د دفاع وزارت ویاند ایګور کوناشینکوف ویلي: دښمن غوښتل، چې زمونږ دفاعي کرښه په خورا زیانمنونکي برخه کې ماته کړي؛ خو دښمن موخې ته ونه رسېد او بریالی نه‌شو.

کوناشینکوف وایي، چې ۲۵۰ اوکرایني سرتېري وژل شوي او ۱۶ تانکونه او ۲۴ جنګي وسایط له منځه تللي دي.

اوکراین په دې اړه تبصره نه‌ده کړې او د خپلو پوځي عملیاتو تر پای ته رسېدو په تمه دی.

دا هم څرګنده نه‌ده، چې ولې د روسیې دفاع وزارت د دوشنبې تر سهاره د برید اعلان ته په تمه و، چې د یکشنبې پر سهار پیل شو.

له میاشتو راپدیخوا اوکرایني چارواکي د کریمیه په ګډون د هغو سیمو د بېرته نیولو هڅې کوي، چې د روسیې لخوا د ۲۰۲۲ کال د فبرورۍ پر ۲۴ لاندې شوې دي.

د روسیې د پوځي خصوصي شرکت مشر یوګیني پریګوژین، چې له لوړ پوړیو پوځي افسرانو سره ښکېل پاتې دی؛ د جمعې پر ورځ یې مسکو پلوه ځواکونه د خپلو کسانو پر وژلو تورن کړل.

رویټرز د راپور له مخې: د واګنر ګروپ سرتېري د اوکراین له ختیځ باخموت ښارګوټي څخه پر شا شوي، چې پر بشپړو تلفاتو یې تېره میاشت نیولی و؛ خپلې پوستې یې روسي عادي ځواکونو ته وسپارلې.

پریګوژین تیلیګرام کړی؛ د دوی کسانو په شاوخوا سیمو کې لسګونه ځایونه کشف کړي، چې د دفاع وزارت چارواکو په کې سلګونه د تانک ضد ماینونو په ګډون بېلابېل چاودیدونکي توکي ځای پر ځای کړي وه. کله، چې وپوښتل شول؛ ولې ماینونه ځای پر ځای شوي وه، چارواکو ویلي، چې دا د لوړ پوړیو چارواکو امر و.

هغه ویلي؛ دا اړینه نه وه، چې ماینونه کیښودل شي؛ ځکه، چې (د ټینګار وړ سیمه ) تر شا ده. له همدې کبله، مونږ فرض کولی شو، چې ماینونه د واګنر د مخ پروړاندې واحدونو د له منځه وړلو لپاره ول.

هغه وویل، هیڅ یو لګیدلی تور لرې نه‌شو او هیچا ته هم زیان نه‌دی رسیدلی.

هغه زیاته کړې: مونږ ګومان کوو، چې دا د ټولو په مخکې له څټه ګوزار و.

د روسیې دفاع وزارت تر دې دمه په دې اړه له څه ویلو ډډه کړې ده.

پریګوزین په منظمه توګه شکایت کاوه، چې د باخموت د نیولو لپاره یې کسانو ته کافي مهمات نه‌دي ورکړشوي؛ د چارشنبې پر ورځ ویلي؛ هغه له څارنوالانو د څېړنې غوښتنه وکړه، چې آیا د روسیې لوړ پوړیو دفاعي چارواکو د اوکراین له جګړې مخکې یا په جریان کې کوم “جرم” کړی او که نه.