تازه خبرونه
طالبانو د ” افغان شموله اسلامي نظام ” پر جوړولو ټینګار څرګند کړ

طالب مشر شیخ هبة الله اخندزاده د کوچني اختر په مناسبت په خپل پیغام کې له هېواده د بهرنیو ځواکونو له وتلو وروسته د "افغان شموله اسلامي نظام" پر جوړولو ټینګار کړی دی.
هغه څرګنده کړې؛ مونږ خپل ټول ولس ته ډاډ ورکوو، چې د بهرنیو ځواکونو له وتلو وروسته یو داسې افغان شموله اسلامي نظام رامنځته کیږي، چې ټولې پرګنې به په کې د خپل اهلیت او استعداد په بنا ځان ویني، د هیچا پر حقه حقوقو به تېری نکیږي.
هغه دغه راز له افغانانو غوښتي، چې د یو سوکاله، پرمختللي هېواد او افغان شموله اسلامي دولت د لرلو لپاره دې د هېواد په بیا جوړونه کې برخه واخلي.
نوموړي له افغان حکومتي مشرانو غوښتي، چې د جګړې د دوام لپاره هیڅ ډول هڅې ونکړي.
هغه ویلي؛ طالبان او مخالفین باید د اسلامي احکامو پر بنسټ راټول شي او له توپیرونو او تعصبونو ډډه وکړي.
په دې پیغام کې دا هم راغلي: د اسلامي امارت غېږه د ټولو افغانانو لپاره خلاصه ده.
طالب مشر څرګنده کړې: مونږ باید شخصي ګټې او ارمانونه پریږدو، اسلامي ارزښتونه او ملي ګټې د معیار په توګه وټاکو او یو بل ته د بخښنې او شفقت له لارې یو قوي او متحد ملت شو.
نوموړی وایي: مونږ ته مذاکرات او تفاهم اولویت لري؛ له همدې کبله مو د مذکراتو لپاره قوي مذاکراتي ټیم موظف کړی، چې له مقابلو جهتونو سره بین الافغاني مذاکرات پرمخ یوسي؛ خو بالمقابل د کابل ادارې بار بار له مختلفو لارو څخه هڅې کړې او کوي یې، چې روان سیاسي جریان سبوتاژ کړي.
هغه دا هم ویلي: اسلامي امارت د ټولو عام المنفعه پروژو، تأسیساتو او اماکنو ساتنه او حمایت کوي، د لاقوت، پراختیا او پرمختګ لپاره يې هڅه او کوښښ کوي، ټولو مجاهدینو او په عموم کې ټولو هیوادوالوته هم سپارښتنه کوي چې د عام المنفعه ځایونو کلکه څارنه، ساتنه او پالنه وکړي، چاته اجازه ورنه کړي، چې کوم ځای زیانمن یا تخریب کړي.
هغه وايي، چې طالبان له ښوونیز بهیر ملاتړ کوي او له همدې کبله یې یو کمیسیون هم ټاکلی دی.
هغه پر ملکي تلفاتو هم اندېښنه څرګنده کړې او وایي: په جنګونو کې ملکي خلکوته زیان رسیدل او هغوی تلف کیدل د ډېرې خواشینۍ او تأسف وړ دي. اسلامي امارت د ملکي تلفاتو د مخنیوي لپاره ځانګړی او باصلاحیت کمیسیون لري، مجاهدین او هېوادوال باید له یاد کمیسیون سره هر اړخیزه مرسته وکړي، چې خدای مه کړه په جهادي جریان کې ملکي خلک متضرر نشي. که چاته ضرر رسیدلی وي، تر ممکنه حده جبران شي او په راتلونکې کې د ورته پېښو مخنیوی وشي.
طالب مشر ويلي، چې امریکایانو څو ځلې د دوحې له تړونه سرغړونه کړې؛ طالب بندیان په بشپړ ډول خوشې شوي ندي او د دوی د مشرانو نومونه په تور نوملړ کې پاتې دي.
په دې پیغام کې نوموړی خبرداری ورکوي، چې که واشنګټن خپل مسوولیتونه سرته ونه رسوي؛ نو بیا به د هر ډول ناوړه پایلو مسوول وي.
همدارنګه د افغانستان حکومت او نړیوالو ملګرو یې له جمهوري نظام او ډیموکراټیکو اصولو ملاتړ کړی؛ خو د مالي مرستو دوام یې هم د شرایطو له ډاډمنه کېدو سره نښلولی دی.
حکومت تر دې دمه د طالبانو پیغام ته ځواب ندی ویلی؛ خو حکومتي چارواکو مخکې ویلي وه، چې طالبان په ټولو خونړیو بریدونو کې لاس لري.
تازه خبرونه
اسلامي امارت په سعودي عربستان کې د فلسطیني دولت د جوړولو وړاندیز وغانده
د بهرنیو چارو وزارت د دوشنبې پر ورځ په یوه خبرپانه کې ویلي، چې دا ناممکن وړاندیز له منل شویو واقعیتونو سره په ښکاره تضاد کې دی او د سعودي عربستان له حاکمیت سرغړونه ده.

اسلامي امارت د اسرائیلو د لومړي وزیر بنیامین نتنیاهو هغه وړاندیز غندلی، چې د سعودي عربستان په خاوره کې دې فلسطیني دولت جوړ شي.
د بهرنیو چارو وزارت د دوشنبې پر ورځ په یوه خبرپانه کې ویلي، چې دا ناممکن وړاندیز له منل شویو واقعیتونو سره په ښکاره تضاد کې دی او د سعودي عربستان له حاکمیت سرغړونه ده.
په خبرپاڼه کې زیاته شوې: "د نتنیاهو څرګندونې د منل شویو نړیوالو نورمونو سپکاوی او د فلسطینیانو له مشروع حقونو ښکاره سرغړونه ده."
اسلامي امارت ټینګار کړی، چې "فلسطین د فلسطینیانو خاوره ده او تر هغې، چې اشغال روان او د فلسطین د خلکو حقونه تر پښو لاندې وي؛ په غزه او سیمه کې به ثبات نهوي او دا ډول وضعیت د هیچا په ګټه ندی."
نتانیاهو د تېرې اوونۍ د پنجشنبې پر ورځ د اسرائیلو له ۱۴- چینل سره په مرکه کې ویلي وه، چې سعودي عربستان کولی شي په خپله خاوره کې یو فلسطیني دولت جوړ کړي.
تازه خبرونه
د خوړو نړیوال پروګرام تېر کال په افغانستان کې ۲۵۰۰ ټنه حبوبات ووېشل
دې پروګرام په ایکس پاڼه کې لیکي، چې حبوبات د پروټینو؛ مغذي توکو، اوسپنې، منرالونو او بي ویټامینونو یوه مهمه سرچینه ده او له دې مرستې سره په ټول هېواد کې ۷۰۰ زره خلکو د خوړو ملاتړ ترلاسه کړی دی.

د خوړو نړیوال پروګرام وايي، چې د اروپايي ټولنې، جرمني، سویلي کوریا، بریټانیا او امریکا پر مرسته تېر کال په افغانستان کې ۲ زره ۵۰۰ ټنه حبوبات وېشل شوې دي.
دې پروګرام په ایکس پاڼه کې لیکي، چې حبوبات د پروټینو؛ مغذي توکو، اوسپنې، منرالونو او بي ویټامینونو یوه مهمه سرچینه ده او له دې مرستې سره په ټول هېواد کې ۷۰۰ زره خلکو د خوړو ملاتړ ترلاسه کړی دی.
د خوړو نړیوال پروګرام مخکې په یوه راپور کې ویلي وه، چې سږ کال به په افغانستان کې شاوخوا ۱۵ میلیون خلک له لوږې سره مخ شي.
د خوړو نړیوال پروګرام په راپور کې راغلي: "اټکل کیږي، چې سږ کال په افغانستان کې نږدې ۱۵ میلیون خلک د خوړو د نهخوندیتوب له بحران او بېړني کچې سره مخ دي."
دې پروګرام لا دمخه په لرې پرتو سیمو کې هغو ټولنو ته د خوړو وېش پیل کړی، چې څه نا څه په بشپړ ډول د واورې او یخ له کبله پرې د تګ راتګ لارې تړل شوې دی.
په ورته وخت کې دې پروګرام ویلي، چې سخت مالي بحران په افغانستان کې د دوی فعالیتونه کم کړي دي.
تازه خبرونه
پاکستان به له اسلامآباد څخه زرګونه افغان کډوال وباسي
د پاکستان حکومت دوی ته ویلي، چې د هېواد نورو برخو ته ولاړ شي. په ځانګړي توګه راولپنډۍ ته، چې په کې سفارتونه او د کډوالو ادارې فعالې دي.

په اسلامآباد کې په لسګونو زره هغو افغان کډوالو ته، چې په درېیم هېواد کې د بیا میشتیدنې لپاره پر تمه دي؛ د پاکستان حکومت امر کړی، چې د مارچ تر یودېرشمې له پلازمېنې ووځي.
د پاکستان حکومت دوی ته ویلي، چې د هېواد نورو برخو ته ولاړ شي. په ځانګړي توګه راولپنډۍ ته، چې په کې سفارتونه او د کډوالو ادارې فعالې دي.
کډوالو او د ملګرو ملتونو د مهاجرت ادارو د دې پرېکړې په اړه اندېښنې څرګندې کړې؛ پاکستان زرګونه افغان کډوال ګواښي او وباسي، خو که دوی په امریکا او نورو هېوادونو کې ځای پر ځای نشي.
شاوخوا ۲۰ زره افغانان د بیا میشتیدنې لپاره په امریکا کې تائید شوي؛ خو دا له هغې وروسته، چې ولسمشر ډونالډ ټرمپ تېره میاشت د امریکا د کډوالو پروګرامونه ودرول له ناڅرګند برخلیک سره مخ شول.
د پاکستان بهرنیو چارو وزارت ویاند شفقت علي خان په دې وروستیو کې ویلي، چې نږدې ۸۰ زره افغان کډوال له پاکستان څخه نورو هېوادونو ته تللي او شاوخوا ۴۰ زره په نورو ځایونو کې د بیا میشتېدنې غوښتنه لري، چې اوس هم په پاکستان کې دي.
د ټرمپ د کډوالو د منلو درې میاشتنی ځنډ د جنورۍ پر اووهویشتمه نافذ شو. د ټرمپ ادارې په دې اړه هیڅ ندي ویلي، چې بیا میشتېدنه به بالاخره بیا کله پیل شي.
پاکستان له اسلامي امارت سره د مخ پر زیاتېدونکي کړکېچ له کبله سلګونه زره نور افغانان - هغه کډوال، چې په قانوني یا غیرقانوني توګه داخل شوي او حتا ځینې یې، چې په لویدیځو هېوادونو کې د بیا میشتېدنې لپاره پاکستان ته داخل شوي وه؛ هم وشړل.
پاکستان اسلامي امارت تورنوي؛ پاکستانيو وسلوالو ته یې پناه ورکړې، چې له پولې هاخوا بریدونه تر سره کوي.
اسلامي امارات تل دا ادعاوې رد کړي او څرګندوي: هیڅ فرد یا ډلې ته به اجازه ورنکړي، چې د افغانستان خاوره د بل هېواد پر وړاندې د وسلوالو بریدونو لپاره وکارول شي.
دا په داسې حال کې ده، چې د د لېږد د ځنډولو په اړه پخوانیو امریکایی سرتېرو یوې ډلې د امریکا له بهرنیو چارو، کورني امنیت او دفاع وزیرانو څخه د دې پروسې د بیا پیل غوښتنه کړې ده.
-
تازه خبرونه2 days ago
افغانستان ته د نغدو پیسو لېږل روان ساتل شوي – د یوه امریکایي سناتور ادعا
-
نړۍ2 days ago
ټرمپ د انټوني بلینکن او جیک سالیوان امنیتي باور لیکونه لغوه کړل
-
تازه خبرونه2 days ago
یونیسف په افغانستان کې د ۲۱۳ خوارځواکو ماشومانو له درملنې خبر ورکړ
-
تازه خبرونه2 days ago
افغانستان او چین په واخان دهلیز کې پر همکاریو ټینګار وکړ
-
تازه خبرونه2 days ago
سعودي عربستان د فلسطینیانو د بې ځایه کېدو په اړه د نتانیاهو څرګندونې وغندلې
-
سیمه ییز خبرونه1 day ago
مصر به د عربي هېوادونو د بېړنۍ سرمشریزې کوربتوب وکړي
-
نړۍ1 day ago
د اوکراین د سولې په خبرو کې پرمختګ شوی – ټرمپ
-
تازه خبرونه1 day ago
پاکستان به له اسلامآباد څخه زرګونه افغان کډوال وباسي