Connect with us

تازه خبرونه

عالمان دې د نشه یي توکو د مخنیوي په اړه خلک خبر کړي

Published

 on

(Last Updated On: ليندۍ ۲۸, ۱۴۰۱)

اسلامي امارت له ديني عالمانو غوښتي، چې د جوماتونو له لارې د نشه يي توکو د کښت، قاچاق او کارولو د مخنيوي په اړه خلکو ته معلومات ورکړي.

د کورنیو چارو او حج او اوقافو وزارتونو یوه ګډ پلاوي په هرات کې له دیني عالمانو سره د نشه يي توکو د کښت او تولید د بندولو په اړه پر عملي ګامونو پورته کولو خبرې کړې دي. دغه پلاوي ويلي، چې د نشه يي توکو د کښت او تولید د مخنیوي لپاره کافي بودیجه ځانګړې شوې او له همدې کبله اوسمهال پر نشه يي توکو د روږدو کسانو د درملنې لپاره پروګرامونه تر لاس لاندې دي.

د کورنیو چارو وزارت د حج او اوقافو وزارت پر همکارۍ د دغه فرمان د پلي کولو مسوولیت پر غاړه لري او له دواړو وزارتونو څخه یې یو پلاوی ټاکلی، چې دغه مسایل له دیني عالمانو او قومي مشرانو سره شریک کړي.

له کابل وروسته هرات يو له هغو ولايتونو څخه دى، چې پر نشه يي توکو د روږدو کسانو شمېر په کې تر ټولو زيات دى.

د تېرو کلونو د معلوماتو له مخې، په دې ولايت کې پر نشه يي توکو شاوخوا ٧٠ زره روږدي دي، چې پېنځه زره يې میرمنې دي.

د هرات جامع جومات خطیب محمد نور رحماني وايي، حکومت مکلف دی، چې له دې ستونزې سره د مبارزې لپاره عملي ګامونه پورته کړي.

دا مهال په دې ولايت کې تر ټولو جدي ټولنيزه ستونزه په نشه يي توکو د زرګونه روږدو کسانو شتون دى، چې تر اوسه یې د درملنې لپاره کوم منظم پروګرام په پام کې ندی نیول شوی، خو دولتي چارواکي په دې باور دي، چې ديني عالمان کولى شي د جوماتونو له لارې د مخدره توکو له زیانونو څخه د خلکو د خبرولو په برخه کې له دوى سره مرسته وکړي.

ویل کیږي، چې دا مهال په هېواد کې شاوخوا پېنځه میلیون کسان پر نشه يي توکو روږدي دي. د اسلامي امارت اړوند چارواکو د څرګندونو له مخې، دمګړۍ حکومت د دغو روږدو کسانو د راټولولو او درملنې پر څرنګوالي راڅرخېدلی دی.

تازه خبرونه

اسلامي امارت له مخابراتي شرکتونو سره د ۳۶۵ میلیون افغانیو پر ارزښت تړونونه لاسلیک کړل

Published

on

(Last Updated On: غبرګولى ۱۴, ۱۴۰۲)

د یکشنبې پر ورځ  د مخابراتو او معلوماتي تکنالوژۍ وزارت او خصوصي مخابراتي شرکتونو ترمنځ په لریو پرتو سیمو کې د مخابراتي خدمتونو د وړاندې کولو لپاره د ۳۶۵ میلیون افغانیو پر ارزښت تړونونه لاسلیک شول.

د مخابراتو او تکنالوژۍ وزارت د څرګندونو له مخې؛ دا تړونونه د ریاست الوزراء اقتصادي مرستیال ملا عبدالغني برادر او د مخابراتو او معلوماتي تکنالوژۍ وزارت د وزیر مولوي نجیب الله حقاني لخوا له خصوصي مخابراتي شرکتونو سره لاسلیک شول.

په دې کتنه کې ملا عبدالغني برادر ويلي، چې خلکو ته د خدمتونو رسول د حکومت دنده ده او په ټول وس هڅې کوي، چې هېوادوالو ته پر نورو برخو سربېره د مخابراتو په برخه کې هم د لوړ کیفیت خدمتونه برابر کړي.

برادر ویلي: اسلامي امارت په افغانستان کې د پانګونې لپاره کار پیل کړی او د ټولو هغو ملي سوداګرو او پانګوالو د هڅو ستاینه کوي، چې د هېواد د اقتصادي ودې لپاره پانګونه کوي.

دغه تړونونه له افغان بېسیم مخابراتي شرکت AWCC او MTN سره لاسلیک شول.

دواړه شرکتونه به په کندهار، نورستان، بدخشان، روزګان، زابل، کونړ، ننګرهار او کابل ولایتونو کې ۳۳ نوي سایتونه جوړ کړي. دا به په لرې پرتو سیمو کې وي، چې خلک مخابراتي خدماتو ته لاسرسی نلري.

Continue Reading

تازه خبرونه

په هند کې د افغانستان سفارت موضوع داخلي ده – هند

Published

on

(Last Updated On: غبرګولى ۱۴, ۱۴۰۲)

د فساد له راپورونو او په نوي دیلي کې د افغانستان اسلامي امارت د سفارت له څارنې وروسته د هند حکومت ویلي؛ دا د دې هېواد یوه داخلي مسله ده، چې دوی په کې نه ښکېلیږي.

د هندي رسنیو د راپور له مخې؛ اسلامي امارت په رسمي بڼه د سفارت د څارنې د ترلاسه کولو لپاره د سفارت له ټینګار سره مخ دی.

د هند بهرنیو چارو وزارت ویاند اریندام باغچي په یوه خبري کنفرانس کې ویلي، چې دا مسله په هند کې د افغان سفارت داخلي مسله ده.

اریندام باغچي ويلي: زمونږ له نظره؛  دا د افغان سفارت داخلي مسله ده او مونږ هيله لرو، چې دوی به يې په کور دننه حل کړي.

په هند کې د میشتو افغان کډوالو استازیو د روان کال د غویی پر ۲۶ په ديلي کې د افغانستان سفارت چارواکي د سفير په ګډون پر فساد تورن کړي وه، چې سفارت هغه مهال د فساد لګېدلي راپورونه رد کړل او په دې اړه په ډاګه کړې، چې د سفارت کارونه پر پوره ایماندارۍ او روڼتیا روان دي.

Continue Reading

تازه خبرونه

د ملګرو ملتونو امنیت شورا د افغانستان په اړه غونډه کوي

Published

on

(Last Updated On: غبرګولى ۱۴, ۱۴۰۲)

په ملګرو ملتونو کې د عربي متحده اماراتو سفیره او د امنیت شورا د اوسني پړاو مشرې یوې خبري غونډې ته ویلي؛ ټاکل شوې، چې د افغانستان په اړه د امنیت شورا غونډه د غبرګولی پر ۳۱ / د جون پر ۲۱ نېټه جوړه شي.

د امنیت شورا د اوسني پړاو مشره لانا نصیبه وايي؛ افغانستان د ملګرو ملتونو د امنیت شورا د اجندا په سر کې ځای لري.

په ملګرو ملتونو کې د عربي متحده اماراتو سفیره او د امنیت شورا د اوسني پړاو رییسه لانا نصیبه وایي:

مونږ به د جون پر ۲۱ نېټه د افغانستان په اړه یوه غونډه ولرو. د مارچ په میاشت کې مو د افغانستان په اړه ډېرې غونډې درلودې. زمونږ د شورا اصلي موضوع افغانستان دی. زمونږ دنده د افغانستان د وضعیت ارزونه ده. زموږ تمرکز ډېر پر افغانستان دی او مونږ غواړو په افغانستان کې د ښځو د حقونو پر وضعیت کار وکړو، چې کړکېچن حالت لري.

نوموړې ټینګار کوي، چې عربي متحده امارات به د دغې شورا د غړي او د اوسني پړاو د مشر په توګه د افغانستان د قضیې په اړه د غړیو هېوادونو د همغږۍ د ساتلو هڅه وکړي.

لانا نصیبه ټینګار کوي، چې د افغانستان په چارو کې د ملګرو ملتونو ځانګړی همغږي کوونکي فریدون اوغلو به په نومبر میاشت کې د دغه هېواد د وضعیت په اړه امنیت شورا ته د بیاکتنې بشپړ راپور وړاندې کړي.

دغه ترکی دیپلومات یوه میاشت مخکې په افغانستان کې د ملګرو ملتونو د ځانګړي همغږي کوونکي په توګه ټاکل شوی دی.

د راپورونو پر بنسټ، په پام کې ده، چې د دې غونډې یوه مهمه موضوع به په افغانستان کې د ښځو له حقونو څخه سرغړونې وي.

له دې مخکې ملګرو ملتونو په دوحه کې د افغانستان په اړه د تړلو دروازو ترشاه غونډه کړې؛ خو داسې انګېرل کېږي، چې د افغانستان په اړه د ملګرو ملتونو غونډې کومې پایلې ته رسېدلي نه‌دي.

دا په داسې حال کې ده، چې فاکس نیوز د جمعې پر ورځ څرګنده کړې؛ څو امریکايي سناتورانو په افغانستان کې د بشري حقونو د مسلې په اړه د اسلامي امارت پر ضد د نویو بندیزونو لګولو طرحه وړاندې کړې ده.

Continue Reading

Trending

Copyright © 2022 Ariana News. All rights reserved!