په افغانستان کې د یوناما مشرې او مل پلاوي نن دوشنبه( د غویی اتمه) د کلیو د بیارغونې او پراختیا وزارت له چارسمبالي سره په لیدنه کې ویلي؛ مونږ به ډېر ژر د بېرته راستانه شویو کډوالو په ښارګوټي کې د پاکو اوبو رسولو شبکو د جوړولو کارونه پیل کړو.

د کلیو د بیارغونې او پراختیا وزارت د خبرپاڼې له مخې؛ د افغانستان لپاره د ملګروملتونو د عمومي منشي ځانګړې استازې مېرمن روزا اوتونبایوا او مل پلاوي ویلي، چې دوی به افغانستان ته د بېرته راستانه شویو کډوالو لپاره د پاکو اوبو رسولو، روغتیا ساتنې او په نورو برخو کې نه یوازې خپلې مرستې ورسوو، بلکې د مرستو پر دوام یې هم ټینګار وکړ.

د کلیو د بیارغونې او پراختیا وزارت چارسمبالي محمد یونس آخوندزاده پلاوي ته د ښه راغلاست ترڅنګ څرګنده کړې؛ مونږ د یوناما دفتر له دوامدارو همکاريو  ستاینه کوو، چې په سختو حالاتو کې یې خپلې مرستې رسولي او جاري ساتلې دي.

محمد یونس آخوندزاده زیاته کړې، چې تاسې باید د بشري مرستو ترڅنګ بنسټیزو او عام المنفعه پروژو ته هم پاملرنه وکړئ او خپل کارونه له وزارت سره پر همغږۍ ترسره کړئ، چې هم مسوولیت سم ادا شي او هم ټولو هېوادوالو ته د متوازن انکشاف له مخې کار وشي.

د بهرنیو چارو وزارت چارسمبالی(سرپرست) امیر خان متقي د ملګرو ملتونو د بشري چارو له مرستیال ټام فلیچر سره په لیدنه کې ویلي، چې افغانستان اوس هم بهرنیو مرستو ته اړتیا لري.

د بهرنیو چارو وزارت د رسنیزې خبرپاڼې له مخې، چې یکشنبه( د غویی اوومه) خپره شوې؛ راغلي: په دې ناسته کې دواړو خواوو له ګاونډ هېوادونو څخه د کډوالو راستنېدو، اقلیمي بدلون او طبیعي پېښو ناوړه اغېزو سره د مبارزې پر چمتووالي، له مخدره توکو مبارزې، د بزګرانو لپاره د بدیل معیشت چمتو کولو او د روږدو کسانو درملنې بحث او خبرې وکړې.

دواړو خواوو د بشري مرستو د بڼې پراختیا ته د بدلولو، د مرستو په برابرولو کې اقتصادي ګټوربوب رامنځته کولو، د مرستو د اغېزې د زیاتوالي لپاره د کورنیو تولیداتو او ظرفیتونو کارولو، د مرستو د پروګرامونو د پلي کولو پروسې ساده کولو، د پروګرامونو په پلي کولو کې د خلکو لومړیتوبونو ته د پاملرنې او د مرستندویه بنسټونو او اړوند دولتي څانګو ترمنځ د همغږۍ د پیاوړتیا په اړه هم بحث وکړ.

د بهرنیو چارو وزارت چارسمبالي ټینګار وکړ، چې په هېواد کې له څو لسیزو جګړو، ناامنیو او د مخدره توکو د کښت له پای ته رسېدو وروسته، د افغانستان اسلامي امارت هوډ لري، چې هېواد په بېلابېلو برخو کې پر ځان‌بسیا او افغان ولس د بشري مرستو له اړتیا څخه خلاص کړي.

هغه یادونه کړې؛ که څه هم دا وخت نیسي، بهرنۍ مرستې ته اوس هم اړتیا ده.

امیر خان متقي ټینګار کړی، چې مرستې باید د افغانانو له اړتیاوو او لومړیتوبونو سره سمې وي او داسې ولګول شي، چې پر کورني بازار، اقتصادي ودې او کورنيو ظرفیتونو اوږدمهاله مثبت اغېزه ولري.

دغه راز ټام فلیچر ویلي، چې ملګري ملتونه او د افغانستان حکومت د نړیوالې ټولنې او افغانستان ترمنځ د اړیکو د عادي کولو، امنیت، سیمه‌ییز ثبات، اقلیمي بدلون، مخدره توکو پر وړاندې مبارزې او په نورو برخو کې د ګډو اهدافو د ترلاسه کولو لپاره کار کوي.

هغه زیاته کړې، چې له دې وروسته به د مرستو د پروګرامونو په پلي کولو کې اصلي پرېکړه کوونکي ځایي خلک او د مرستو ترلاسه کوونکي وي.

هغه ویلي، چې د مرستو ماهیت له بشري مرستو څخه پراختیایي او بېخبنایي(زیربنایي) کارونو ته بدلول، د افغانانو لومړیتوبونه او موخې په پام کې نیول کیږي.

په پایله کې د بهرنیو چارو وزارت چارسمبالي په دې برخه کې د همکارۍ ډاډ ورکړ او دواړو خواوو هوکړه وکړه، چې د نړیوالو مرستو د اغېزمنتوب د زیاتوالي لپاره همغږي او ګډ کار زیات کړي.

په افغانستان کې د ملګرو ملتونو د مرستندویه پلاوي (یوناما) مشرې روزا اوتونبایوا په دې وروستیو کې د افغانستان شمال میمنې ښار ته سفر کړی او د ځایی چارواکو، متشبثینو او د ملګرو ملتونو له کارمندانو سره یې ولیدل.

د یوناما دفتر د یکشنبې پر ورځ (د غویي اوومه) په فیسبوک پاڼه کې لیکلي، چې د دې سفر په لړ کې د متشبثینو – په ګډون د ښځو یوې ډلې، چې د ملګرو ملتونو د عمومي منشي له ځانګړې استازې، میرمن اوتونبایوا سره ولیدل او نويو بازارونو ته په ځانګړې توګه په ازبکستان کې د لاسرسي د ملاتړ غوښتنه وکړه،.

یوناما زیاته کړې، چې د دغو متشبثینو په منځ کې، د ښځو یوې ډلې چې د ملګرو ملتونو د پراختیایي پروګرام (UNDP) په ملاتړ یې د ګنډلو ورکشاپ جوړ کړی و، د خپل کاروبار د پام وړ ودې او پرمختګ په اړه خبرې وکړې، پداسې حال کې، چې د چمتو شوي ملاتړ څخه یې مننه وکړه.

یوناما زیاته کړې، چې دا بنسټ د اقتصادي فرصتونو د ودې او د افغان ټولنو په ځانګړي توګه د ښځو د پیاوړتیا لپاره ژمن دی.