د امریکا ولسمشر جو بایډن د یکشنبې پر ورځ (د مرغومي درویشتمه) د افغانستان اسلامي امارت په زندانونو کې د ۳ بندي امریکايي وګړو له کورنیو سره خبرې کړې دي.

د سپینې ماڼۍ د خبرپاڼې له مخې؛ بایډن او د رایان کوربټ، جورج ګولزمن او محمود حبیبي کورنیو د دوی د خوشې کیدو لپاره د هڅو په اړه بحث وکړ.

په دې خبرو اترو کې د امریکا ولسمشر د ټولو هغو امریکایانو د خوشې کولو لپاره د واشنګټن پر ژمنې ټینګار وکړ، چې ناحقه بندي شوي یا په بهر کې یرغمل دي.

محمود حبیبي د افغانستان د ملکي هوايي چلند ادارې پخوانی رییس دی.

د هغه د ورور د څرګندونو له مخې، اسلامي امارت هغه د ۲۰۲۲ کال په اګست کې د کور مخې ته نیولی او نامعلوم ځای ته یې وړل شوی دی.

رایان کوربټ هم د ۲۰۲۲ کال په اګست کې د افغانستان شمال ته د سفر پر مهال د اسلامي امارت لخوا ونیول شو. هغه له ۲۰۱۷ څخه تر ۲۰۲۱ پورې په کابل کې یو شرکت اداره کاوه.

په همدې کال کې جورج ګولزمن، چې افغانستان ته د ګرځندوی لپاره ننوتلی و هم د اسلامي امارت ځواکونو نیولی دی.

د سپینې ماڼۍ د څرګندونو له مخې؛ د جو بایډن ادارې په تېرو ۴ کلونو کې له ۷۵ څخه ډېر امریکایان، چې د افغانستان او ایران.په ګډون په بېلابېلو هېوادونو کې نیول شوي وه، بېرته هېواد ته راستانه کړي دي.

د بهرنیو چارو وزارت چارسمبالي امیر خان متقي په کابل کې د سعودي عربستان له سفیر سره په لیدنه کې د افغانستان د حج ونډې د زیاتېدا غوښتنه کړې ده.

د بهرنیو چارو وزارت د خبرپاڼې له مخې، په دې کتنه کې، چې د یکشنبې پر ورځ( د مرغومي درویشتمه) ترسره شوه؛ دواړو خواوو د دوه اړخیزو اړیکو د پراختیا، په سعودي عربستان کې میشتو افغانانو ته د قونسلګرۍ خدماتو وړاندې کولو او له شته فرصتونو څخه د ګټې اخیستنې په اړه هم بحث او خبرې وکړې.

امیر خان متقي د افغانستان او سعودي عربستان اړیکې ارزښتناکې او تاریخي وبللې او ټینګار یې وکړ، چې د دواړو هېوادونو ترمنځ د پلاويو تګ راتګ ته باید ډېره پاملرنه وشي.

هغه د سعودي عربستان له حکومت څخه وغوښتل، چې د افغانانو لپاره د حج ونډه زیاته کړي او په سعودي عربستان کې میشتو افغانانو ته د قونسلګرۍ خدماتو په برابرولو کې مرسته وکړي.

د سعودي عربستان سفیر په خپله برخه کې د افغانستان او سعودي عربستان دوه اړخیزې اړیکې تاریخي وبللې او ټینګار یې وکړ، چې هېواد یې غواړي په کابل کې د حضور له لارې په بېلابېلو برخو کې له افغانانو سره مرسته وکړي.

فیصل طلق البقمي دا هم ویلي، چې دواړه هېوادونه کولی شي په بېلابېلو برخو کې کار وکړي او په کابل کې د سعودي عربستان د سفارت د فعالیتونو د بیا پیلولو هدف د ټولو شته ظرفیتونو څخه ګټه اخیستل دي.

د رییس الوزرا اقتصادي مرستیال ویلي، چې د شاوخوا ۳ میلیارډ افغانیو پر ارزښت یې ۱۷ پروژې تصویب کړې او د نهو نورو قراردادونه یې تعدیل کړي دي.

د اقتصادي مرستیالۍ د څرګندونو له مخې؛ په منظور شوو او تعدیل شوو پروژو کې د کابل ولایت په ارغندي کې د ټرانسپورټ د ترمینل جوړول، د هرات ولایت په ګذره ولسوالۍ کې د لاریو د تمځای جوړول، د آقینه-اندخوی او تورغونډۍ د اوسپنې پټلۍ پروژو بیارغونه، په کابل کې د نوري فایبر شبکې پراختیا شامل دي.

د ملي تدارکاتو کمیسیون نوبتي غونډه د رییس الوزرا د اقتصادي مرستیال پر مشرۍ ترسره شوه. په دې غونډه کې، د ۱۷ پروژو قراردادونه منظور شول او نهه نورې پروژې تعدیل شوې؛ ځکه، چې په تدارکاتي پړاوونو کې یې ستونزې موندل شوې وې.

چارواکو ته سپارښتنه وشوه، چې له ټولو معیارونو سره سم دا پروژې بیا داوطلبي ته وړاندې کړي.  همدارنګه مسوولو کمیټو ته دنده وسپارل شوه، چې د څلورو پروژو د قراردادونو د بیو په اړه له ګټونکو شرکتونو سره غونډې وکړي او خپل راپورونه د ملي تدارکاتو کمیسیون مشرتابه ته وسپاري.

د کندهار، هلمند او فراه ولایتونو د ځینو سړکونو جوړول، د کابل او په بېلابېلو ولایتونو کې د برښنا د یو شمېر پروژو د پاتې کارونو بشپړول او د اسلامي امارت لخوا تمویل شوي څو نورې پروژې دي.

دا په داسې حال کې ده، چې د اقتصادي ستونزو د حل یوه لاره د ورته پراختیایي او زیربنایي پروژو عملي کول دي. چارسمبالی حکومت وايي، چې د داسې پروژو پیل کولو ته ژمن دی او غواړي هېواد یوازې له اقتصادي بحران څخه وژغوري.