Connect with us

تازه خبرونه

له نړیوالې اجماع پرته به د افغانستان اسلامي امارت پر رسمیت ونه پېژنو – پاکستان

Published

 on

(Last Updated On: لړم ۲۹, ۱۴۰۱)

د پاکستان د بهرنیو چارو وزیر ويلي؛ هېواد به یې د افغانستان اسلامي امارت په رسمیت پېژندلو کې فردي هڅه ونکړي.

د پاکستان د بهرنیو چارو وزیر بلاول بوتو زرداري دغه څرګندونې د خپل هېواد د شپږ مياشتنۍ بهرنۍ تګلارې د ارزونې پر مهال کړې دي.

بلاول بوتو زرداري وایي: پاکستان نه غواړي فردي اقدام وکړي؛ مونږ غوره بولو، چې دا بهیر له نړیوالې اجماع سره سم وڅارل شي. مونږ په افغانستان کې د بشري ناورین د مخنیوي لپاره له اسلامي امارت سره د دوامداره نړیوال تعامل، ملاتړ کوو.

د پاکستان د بهرنیو چارو وزیر ویلي، چې هېواد یې په افغانستان کې د بشري ناورین د مخنیوي لپاره له اسلامي امارت سره د تلپاتې نړیوال تعامل ملاتړ کوي.

د پاکستان د بهرنیو چارو وزیر همداراز په افغانستان کې له واکمنو چارواکو غواړي، چې له نړیوالې ټولنې سره د نړیوالې ترهګرۍ پر ضد په مبارزه کې خپل مکلفیتونه تر سره، تعلیم او کار ته د ښځو د لاسرسي په ګډون د بشري حقونو درناوی وکړي.

هغه زیاتوي، دا به پاکستان ته زمینه برابره کړي، چې د افغانستان له خلکو سره د مرستو په راجلبولو او د ملاتړ په برخه کې ګټورې هڅې وکړي.

په ملګرو ملتونو کې د پاکستان دایمي استازي ويلي؛ د افغانستان د اقتصاد د بیا رغولو لپاره باید د دغه هېواد بانکي سیستم بېرته فعال شي او په کار ده، چې په بهر کې د افغانستان کنګل شوې شتمنۍ آزادې او د دې هېواد په مالي سیستم کې شاملې شي.

هغه یو ځل بیا د تحریک طالبان پاکستان او داعش د فعالیتونو په اړه د خپل هېواد اندېښنه هم څرګنده کړه.

په ملګرو ملتونو کې د پاکستان دایمي استازي منیر اکرم ویلي: مونږ له افغانستان څخه د ترهګرۍ د ګواښ په اړه اندېښمن یوو. اوس هم زمونږ پر خاوره د پاکستانيو طالبانو لخوا بریدونه کېږي. مونږ باید له ترهګرۍ سره مبارزه وکړو. زمونږ پر وړاندې اصلي ګواښ القاعده نه، بلکې داعش او تحریک طالبان پاکستان دي. دا لوی ترهګریز سازمانونه دي او مونږ دا منو، چې له دوی سره د مبارزې هڅه زمونږ لپاره ستونزمن کار دی.

د افغانستان دفاع وزارت ویاند عنايت الله خوارزمي له دې مخکې د پاکستان دا ادعاوې بې بنسټه ګڼلي او ویل شوي، چې اسلامي امارت به له افغانستان څخه هیڅ ډلې ته اجازه ورنکړي، چې د ګاونډ حکومتونو امنیت له ګواښ سره مخ کړي.

اسلامي امارت تل ډاډ ورکړی، چې د افغانستان له خاورې څخه به ګاونډ او د سیمې حکومتونو ته کوم ګواښ پېښ نشي او هیچاته به اجازه ورنکړي، چې د افغانستان خاوره د نورو هېوادونو پر ضد وکاروي.

دغه راز اسلامي امارت د ویاند مرستیال بلال کریمي ويلي، چې د اسلامي امارت پر رسمیت پېژندل د نړۍ په ګټه ده او دوی د نړۍ له ټولو هېوادونو سره مثبت تعامل غواړي.

له بلې خوا د ازبکستان د بهرنیو چارو وزیر د اروپايي ټولنې او منځنۍ آسیا  په غونډه کې وړاندیز کړی، چې په افغانستان کې له اسلامي امارت سره د خبرو لپاره دې یوه نړیواله مرکچي ډله جوړه شي.

د ازبکستان د بهرنیو چارو وزارت په یوه خبرپاڼه کې ویلي، چې نړۍ باید افغانستان هېر نکړي.

د اروپايي ټولنې د بهرنۍ تګلارې مشر جوزپ بوریل، چې په دې غونډه کې يې ګډون کړی دی؛ په افغانستان کې د بشري حقونو وضعيت د اندېښنې وړ بولي او له اسلامي امارته يې وغوښتل، چې خپلې ژمنې پوره کړي.

تازه خبرونه

پاکستان او روسیه به د اسلامي امارت د کړنو ارزونه وکړي

Published

on

(Last Updated On: سلواغه ۱۰, ۱۴۰۱)

د پاکستان بهرنیو چارو وزیر بلاول بوتو زرداري پر دوه ورځني رسمي سفر د روسیې پلازمېنې مسکو ته رسېدلی دی.

د پاکستان د سیمه ییزو رسنیو د راپور له مخې؛ زرداري به د دوشنبې پر ورځ په مسکو کې له خپل روسي سیال سرګي لاوروف سره وویني او خبرې به یې د افغانستان پر حالاتو راوڅرخیږي.

پاکستانيو رسنیو د رسمي سرچینو د څرګندونو له مخې په ډاګه کړې؛ پاکستان او روسیه به نه یوازې د یوه ټولګډونه حکومت د جوړولو لپاره پر نړیوالو ژمنو او له خپلې خاورې د ترهګرو ډلو د فعالیت پر مخنیوي خبرې وکړي، بلکې د اسلامي امارت پر پرمختګونو به هم بیاکتنه وکړي.

د تریبیون د راپور له مخې؛ د پاکستان د بهرنیو چارو وزیر بلاول بوتو زرداري به په مسکو کې د دوشنبې پر ورځ له خپل روسي سیال سرګي لاوروف سره وګوري او د دوی د اجنډا یوه اړینه موضوع به افغانستان وي.

زرداري د پاکستان د بهرنیو چارو د وزیر په توګه مسکو ته لومړنی سفر کوي. نوموړی اندېښمن دی، چې د تحریک طالبان پاکستان (TTP) وسلوالې ډلې په افغانستان کې پټنځایونه لري.

د روسیې د بهرنیو چارو وزارت تویت کړی، چې دواړه وزیران به له ترهګرۍ سره د مبارزې او د افغانستان، سوریې او اوکراین د وضعیت په ګډون پر یو شمېر سیمه ییزو موضوعاتو خبرې وکړي.

Continue Reading

تازه خبرونه

اسلامي امارت دې ښځو ته د زده‌کړو او کار اجازه ورکړي – د اسلامي همکاریو ټولنه

Published

on

(Last Updated On: سلواغه ۱۰, ۱۴۰۱)

د اسلامي همکاریو ټولنې (OIC) د یکشنبې پر ورځ د افغانستان اسلامي امارت له چارواکو وغوښتل، چې د نجونو لپاره دې د ښوونځیو او پوهنتونونو د بیا پرانستلو هلې ځلې وکړي، چې د زده‌کړو له ټولو کچو برخمنې شي.

د اسلامي همکاریو ټولنې عمومي سکرتریت د شنبې پر ورځ د اسلامي امارت د لوړو زدکړو وزارت ته د هغې پرېکړې په اړه خپله ناهیلي څرګنده کړه، چې د ټول هېواد په ټولو دولتي او خصوصي پوهنتونونو کې سږکال د ښځینه زده‌کړیالانو یا محصلینو د داخلیدو مخه نیسي.

د اسلامي همکاریو ټولنې تویت کړی؛ دا وروستی فرمان د کابل د رسمي چارواکو لخوا ښوونې، روزنې او عامه کارونو ته د نجونو او ښځو د لاسرسي په اړه اعلان شوي پراخ محدودیتونه نور هم سختوي.

یادې ټولنې د اسلامي امارت له چارواکو غوښتي، چې د نجونو لپاره د منځنیو ښوونځیو، لیسو او پوهنتونونو د بیا پرانستلو لپاره هڅې وکړي او دوی ته د زده‌کړو زمینه برابره او په ټولو هغو کچو اوتخصصونو کې، چې ورته اړتیا ده زده‌کړې او کار وکړي.

یادې ټولنې له اسلامي امارته وغوښتل، چې پر وروستۍ پرېکړه او پخوانیو فرمانونو له سره غور وکړي.

Continue Reading

تازه خبرونه

د امریکا ځانګړی استازی له بهرنیو همکارانو او افغان کډوالو سره د خبرو نیت لري

Published

on

(Last Updated On: سلواغه ۱۰, ۱۴۰۱)

د امریکا د بهرنیو چارو وزارت څرګنده کړې؛ د افغانستان لپاره د امریکا ځانګړی استازی توماس ویست په روانه اوونۍ کې پاکستان، جرمني او سویس ته له ملګرو، افغانانو او د بشري مرستو له موسسو سره د خبرو لپاره سفر کوي.

یاد  وزارت یکشنبه ناوخته (د سلواغې ۹ ) څرګنده کړه، چې توماس ویست به دغو هېوادونو ته په خپل څلور ورځني سفر کې له امریکايي همکارانو، افغانانو او مرستندویه بنسټونو سره پر سلا مشورو سربېره د افغانستان په اړه هم خبرې وکړي.

د یادې سرچینې د څرګندونو له مخې؛ پاکستان، جرمني او سویس ته د توماس ویست د څلورورځني سفر موخه دا ده، چې له شریکانو او افغان کډوالو سره د هغو د ګڼو ننګونو په اړه سلا مشورې وکړي، چې دمګړۍ د افغانستان خلک، ښځې او نجونې ورسره مخ دي.

توماس ویست تویت کړی: زه به د جنورۍ له ۲۹ څخه د فبرورۍ تر ۴ پورې پاکستان، جرمني او سویس ته سفر وکړم، چې له شریکانو، افغانانو او بشردوستانه مرستندویه موسسو سره د هغو غیر معمولي ننګونو په اړه مشوره وکړم، چې مونږ د افغانانو د ملاتړ په برخه کې ورسره مخ یوو.

بهرنیو حکومتونو او نړیوالو مرستندویه موسسو په وار وار د اسلامي امارت له چارواکو غوښتي، چې دا پرېکړه بېرته واخلي او افغان میرمنو او نجونو ته د زده‌کړو، کار، سپورت او عامه ژوند کولو اجازه ورکړي؛ خو تر اوسه کوم تعامل ته رسېدلي ندي.

Continue Reading

Trending

Copyright © 2022 Ariana News. All rights reserved!