د هرات د سوداګرۍ او پانګونې خونې څرګنده کړې، چې تېر کال يې د ۱۰۲ ميليون دالرو پر ارزښت صادرات کړي دي.

د هرات د سوداګرۍ او پانګونې خونې رییس ويلي، په تېر کال کې څه باندې ۷۶ زره ټنه وچه میوه، طبي بوټي،  زعفران او نور کرنیز محصولات د خلیج هېوادونو، اروپا، امریکا او ګاونډ هېوادونو ته صادر شوي دي.

د هرات د سوداګرۍ او پانګونې خونې رییس یونس قازي زاده وایي: د هرات د سوداګرۍ او پانګونې خونې د صادراتو څانګې له لارې مونږ ۷۶۳۰۰ ټنه بېلابېل ډوله توکي د خليج هېوادونو، اروپا، امريکا او ګاونډ هېوادونو ته صادر کړي دي.

سرچینې زیاته کړې؛ د هرات زوړ بازار، چې له طبي بوټو ډک دی؛ سوداګرو ته د غوره ګټې وټې زمینه برابروي او له همدې ځایه یاد توکي بهر ته صادریږي.

د هېواد لوېديځې حوزې په تېر کال کې په زياته اندازه کرنيز محصولات صادر کړي، چې د تېرو کلونو پر پرتله يې د صادراتو کچه لوړه شوې ده.

د هرات والي ویاند نثار احمد الیاس ډاډ څرګند کړی، چې د صادراتو د ډېروالي او کیفیت د لوړولو لپاره به هڅې ډېرې کړي.

په دې وروستيو کې د طبي بوټو د صادرولو بهير ښه شوى، چې له همدې کبله د هېواد په لوېديځو سيمو کې ډېربزګران د ځينو طبي بوټو لکه اینجې کرلو ته مخه کړې ده.

د افغانستان د صنایعو او سوداګرۍ وزارت د څرګندونو له مخې، افغانستان په تېر کال کې شاوخوا دوه میلیارد دالر صادرات کړي.

ویل کیږي، چې سوداګرو ته د اسانتیاوو برابرول او د ګمرکي تعرفو کمول د صادراتو د زیاتوالي لامل دی.

د سوداګرۍ او صنایعو وزارت مرستیال د سې شنبې پر ورځ په یوه خبري کنفرانس کې ویلي، چې په تېر لمریز لېږدیز کال کې د افغانستان صادرات دوه میلیارد دالره ول.

د صنعت او سوداګرۍ وزارت مرستیال قدرت الله جمال ويلي؛ په  تېر یوه کال کې د صادرا توکچه نږدې  دوه میلیارد دالروته  لوړه شوې ده.

نوموړی وایي: مونږ د خصوصي سکتور لپاره د اقتصادي فعالیتونو د سرته رسولو لپاره ډېره ښه زمینه برابره کړې او له ګونډهېوادونو سره مو هم اقتصادي اړیکې ښې دي او هڅه کوو، چې دا ړیکې نورې هم پراخې او پیاوړې کړو.

د صنعت اوسوداګرۍ  وزارت ویاند عبد السلام جواد آخوندزاده ويلي، چې هېواد یې په نږدې پنځوس قلمه توکو کې، چې په هېواد کې تولیدیږي؛ ځان بسیاینې ته رسیدلی او د تېرکال په بهیر کې شاوخوا ۱۰۰ بهرني پانګوال افغانستان ته راغلي او په بېلا بېلو برخو کې يې پانګونې ته لیوالتیا څرګنده کړې ده.

هغه وایي: په دې پانګوالو کې د ګاونډ هېوادونو په ګډون د سیمې هېواد نو پانګوال هم شته، چې ډېر يې د کانونو، کرنې، خدماتواو انرژۍ د تولید په برخه کې د پانګونې لپاره لیواله دي.

د یاد وزارت د څرګندونو له مخې؛ د هېواد پر کچه نږدې ۸۰۰۰ میرمنې پر اقتصادي فعالیتونو بوختي دي او ورته اسانتیاوې په نظر کې نیول شوي، چې راتلونکی کال به د اقتصادي طرحو جوړول، د نساجي پر صنعت تمرکز، د سیمه ییزو همکاریو  پرا ختیا، د صادارتو پراختیا، د پانګونې جذب او په صنعتي پارکونو کې د پانګونې پرا ختیايي هڅې مو له کاري لومړیتوبونو څخه دي.

ویل کیږي، چې په تېر یوه کال کې ۵۱۰۰ جوازونه صادر شوي، ۷۲۲۸ جوازو نه تمدید شوي او ۳۳۳ جوازونه لغوه شوي دي. دغه راز د تېرکال په اوږدو کې د ۹۲۵ میلیون و ۴۹۳ زره ۶۲۹ دالرو پر ارزښت سکاره، پنبه، ایجه، انار، ممیز، انځر، انګور، رومي بانجان، او پیاز پاکستان، هند، ازبکستان، تاجکستان، عربي متحده اماراتو، چین، ایران، عراق، ترکیې ته صادر شوي دي.

د مالیې وزارت ويلي، د افغانستان اسلامي امارت د رهبرۍ د پرېکړې له مخې په تېر لمریز لېږدیز کال کې پر لومړنیو خوراکي توکو ګمرکي محصول له ۵۰ څخه تر ۷۰ سلنې راټیټ شوی دی.

دې وزارت دا هم په ډاګه کړې، چې د دې پرېکړې په پایله کې سږ کال د ۶ اعشاریه ۷ میلیون افغانیو پر ارزښت ګمرکي محصول کم شوی دی.

په سيمه ييزو بازارونو کې پر خوراکي توکو؛ اوړو، غنمو، غوړيو، وريجو او بورې د ګمرکي محصول د کمولو پرېکړه د بيو د راټيټوالو لپاره رامنځته شوې ده.