تازه خبرونه
ملګري ملتونه د افغانستان د وضعیت لپاره د یوې مناسبې حل لارې د موندلو په هڅه کې دي ـ امریکا

د امریکا د بهرنیو چارو وزارت ويلي؛ ملګري ملتونه هڅه کوي، چې د افغانستان د وضعیت لپاره یوه مناسبه حل لار ومومي؛ خو که د خبرو دا هڅې ناکامې شي امریکا، ملګري او متحدین به یې په اړه پرېکړه وکړي.
د دغه وزارت ویاند ند پرایس ويلي، له افغانستان سره د امریکا مرستې له نویو واکمنانو د ملاتړ معنا نلري او له خلکو سره به دغه مرستې روانې وي.
د امریکا د بهرنیو چارو وزارت ویاند ندپرایس وايي: مونږ د راتلونکیو مناسبو ګامونو ارزونه کوو؛ طالبان ( اسلامي امارت) به د دوی د هرعمل قیمت ادا کړي. مونږ د میز پر سر هر ډول پرېکړې لرو. مونږ له خپلو نړیوالو شریکانو او لوړ پوړیو چارواکو سره په اړیکه کې یوو او په افغانستان کې وضعیت له هغه څه سره څېړو، چې طالبان (اسلامي امارت) یې کوي.
د امریکا د بهرنیو چارو وزارت ویاند دا خبره رد کړه، چې ګواکې بشري مالي مرستې د اسلامي امارت د ملاتړ لپاره کیږي.
هغه وایي، دا مرستې د غيردولتي موسسو له لارې کیږي او ټولې هڅې دا دي، چې دا پيسې د افغانستان نویو واکمنانو ته ونه رسيږي او په مستقيمه توګه د خلکو د حالت ښه کولو لپاره وکارول شي.
ندپرایس زیاته کړې: د وروستیو پرېکړو په پایله کې ۸۳ سلنه مرستندویه موسسو، چې په افغانستان کې یې فعالیت کاوه؛ په دغه هېواد کې خپل فعالیتونه بند کړي دي. دا وضعیت زمونږ او نړیوالې ټولنې لپاره د منلو وړ ندی؛ ځکه ۲۰ میلیون افغانان د ژوند د دوام لپاره بشري مرستو ته اړتیا لري. طالبانو( اسلامي امارت) ته د مرستو پیسې نه ورکول کیږي، دا پیسې د غیر دولتي موسسو او مرستندویه کارمندانو لخوا کارول کیږي.
له بلې خوا په بروکسل کې د اروپايي ټولنې د بهرنیو چارو د وزیرانو شورا له غونډې وروسته د بهرنۍ پالیسۍ رییس خبریالانو ته ویلي، چې د وزیرانو شورا به د فبرورۍ په میاشت کې د افغانستان د وضعیت په اړه پرېکنده پرېکړې وکړي.
د اروپایي اتحادیې د بهرنۍ پالیسۍ رییس جوزف بوریل ویلي: مونږ په دې وروستیو کې د طالبانو( اسلامي امارت) لخوا پر ښځو د لګول شویو محدودیتونو په اړه خبرې وکړې. مونږ د وروستیو اقداماتو پایلې ارزوو او د اضافي میکانیزمونو له لارې به طالبان( اسلامي امارت) چې د ښځو او نجونو د حقونو څخه سرغړونې کوي، حساب ته را وبولو.
د جرمني د بهرنیو چارو وزیره هم خبرداری ورکوي، چې که اسلامي امارت په افغانستان کې ښځو ته له مرستندویه موسسو سره د کار کولو اجازه ورنکړي؛ نړیوالې مرستې به د افغانستان اړمنو خلکو ته ونه رسيږي.
د آلمان د بهرنیو چارو وزیره انالینا بربوک وایي: وضعیت د خلکو په ځانګړي توګه د ښځو لپاره پر ناورین اوښتی. که ښځې له نړیوالو موسسو سره کار ونکړي؛ له افغانستان سره به نوره مرسته ونشي. مونږ د نړیوالې ټولنې په توګه نشو کولی مرستې روانې وساتو.
دا په داسې حال کې ده، چې په افغانستان کې د پاکستان پخواني سفیر منصور احمد خان ويلي، چې په افغانستان کې وضعیت د اسلامآباد د تمې او اوږدمهالو اقتصادي ګټو پر خلاف روان دی.
نوموړي د «بول خبري شبکې» په اوبپاڼه کې څرګنده کړې، چې نه د افغانستان وضعیت او نه هم دوه اړخیزو اړیکې هغسې دي، چې تمه یې کیده.
تازه خبرونه
اسلامي امارت په تېر کال کې له نړۍ سره د اړیکو عادي کولو ته پراخې هڅې کړي

د افغانستان اسلامي امارت دیپلوماتیک نظام په تېرو دولس میاشتو کې له سیمې او نړۍ سره د سیاسي اړیکو د نوي فصل د پرانستلو لپاره پراخې هڅې کړې دي.
که څه هم دې هڅو تر اوسه کوم هېواد نه دی اړ کړی، چې اسلامي امارت پر رسمیت وبېزني؛ خو د سیمې او نړۍ په ځینو هېوادونو کې د اسلامي امارت بیرغ پورته شوی دا هېوادونه په کابل کې سفارتونه لري.
روسیه، چین، ترکیه، ایران، پاکستان، ازبکستان، ترکمنستان، قزاقستان، قطر او عربي متحده امارات هغه هېوادونه دي، چې په افغانستان کې یې سفارتونه پرانستي او د اسلامي امارت سفارتونه هم په دغو هېوادونو کې فعال دي.
له تاجکستان پرته د افغانستان د نږدې ټولو ګاونډیانو پیغامونه له ترهګرۍ سره د مبارزې، بشري حقونو او حاکمیت په برخه کې هراړخیز دي، چې تر ډېره د امریکا له ګټو سره سمون خوري.
په تېرو دولس میاشتو کې د اروپايي هېوادونو سیاسي نمایندګي یوازې د بشري مرستو د همغږۍ لپاره فعالې دي. هند هم په افغانستان کې د بشري مرستو د همغږۍ لپاره یوه تخنیکي ډله لري.
د بهرنيو چارو وزير اميرخان متقي ويلي، چې اسلامي امارت د نورو هېوادونو هيلو او ګټو ته درناوى لري او په بدل کې يې له اسلامي امارت سره د ورته تعامل غوښتنه کوي.
دا هیله څو ځله د رییس الوزرا اقتصادي مرستیال ملا عبدالغني برادر هم څرګنده کړې، چې اسلامي امارت متوازن او پر اقتصاد راڅرخېدونکی بهرنی سیاست لري او غواړي د نړۍ له ټولو هېوادونو سره دوستانه اړیکې ولري.
په تېرو کال کې د سیمې او نړۍ هېوادونو هم د افغانستان په اړه غونډې جوړې کړېي؛ خو په ډېرو دغو غونډو کې د اسلامي امارت هیڅ استازی نه و.
دغه راز څو اوونۍ مخکې په تاشکند کې د اروپا د امنیت او همکارۍ ټولنې په ګډه غونډه کې د ازبکستان د بهرنیو چارو وزیر له اسلامي امارت سره د خبرو لپاره د یوې بین الافغاني مذاکراتي ډلې د جوړولو وړاندیز وکړ.
د افغانستان لپاره د روسیې د ولسمشر ځانګړي استازي ضمیر کابلوف هم ورته څرګندونې وکړې او ټینګار یې وکړ، چې افغانستان باید د نړۍ پر کچه په سیاسي انزوا کې پاتې نهشي.
نړۍ په تېره بيا ناتو، امريکا او لویديځو هېوادونو له تېر یو کال راپدیخوا د افغانستان په اړه روښانه او مشخصه تګلاره نه درلوده او دې هېوادونو له افغانستان سره د څو اړخيزې ديپلوماسۍ له لارې معامله ونه کړه او په دې برخه کې کومه سياسي اجماع هم رامنځته نه شوه؟!
د نړیوالو اړیکو کارپوه عزیز بارز په دې اړه وايي: زمونږ یو شمېر ګاونډیان د خپلو ګټو پر بنسټ د تعامل غوښتونکي دي. د اروپایی هېوادونو یو سفیر ویلي، چې د نړۍ تعامل له طالبانو (اسلامی امارت) سره په منفی توګه روان دی.
اسلامي امارت هیله لري، چې په نوي لمریز لېږدیز کال کې به د سیمې او نړۍ له هېوادونو سره خپلې سیاسي اړیکې نورې هم پیاوړې او نړیوال مشروعیت تر لاسه کړي.
تازه خبرونه
د نشهيي توکو پلورونکي او تولیدوونکي باید مجازات شي ـ د اسلامي امارت مشرتابه

د اسلامي امارت مشرتابه شیخ هبة الله آخوندزاده د یکشنبې پر ورځ (د کب اته ویشتمه) د ضبط شویو نشهیي توکو د سوځولو او د هغو وسایلو او تجهیزاتو د له منځه وړلو سپارښتنه وکړه، چې د نشهیي توکو په کر او تولید کې کارول کیږي.
د دغه فرمان له مخې، د کورنیو چارو، عامې روغتیا وزارتونو او د استخباراتو د عمومي ریاست ګډه کمېته باید نیول شوي نشهیي توکي د محکمې د یوه استازي په حضور کې بر عامه بنه وسوځوي.
په دغه حکم کې راغلي دي: د شرابو، الکولي مشروباتو، امان (ایفیدرا)، پوډر، کوکاین، شیشې او نورو نشه یي توکو پلورونکي او تولیدوونکي باید مجازات شي او یاد شوي نشهیي توکي او هغه وسایل او تجهیزات، چې د نشهیي توکو په تولید کې کارول کیږي باید له منځه یوړل شي.
د يادونې ده، چې له دې مخکې هم د بېلابېلو فرمانونو له مخې په هېواد کې د نشهيي توکو پر کښت، توليد او قاچاق بنديز لګول شوى و.
تازه خبرونه
د جوزجان والي مرستیال خپل زوی له دندې ګوښه کړ

د جوزجان ولایت د والي مرستیال مولوي ګل محمد سلیم خپل زوی له دندې ګوښه کړی دی.
د باخترآژانس د څرګندونو له مخې: په دولتي اداروکې د چارواکو د زامنو او منسوبينو د ګوښه کولو په اړه د اسلامي امارت د مشرتابه د حکم له مخې؛ د جوزجان ولايت مرستيال خپل زوى له دندې ګوښه کړ او يو بل کس يې پر دنده ګومارلى دى.
د مولوي ګل محمد سلیم زوی د جوزجان ولایت په امنیه قومندانۍ کې ساتنمن و.
د اسلامي امارت د رهبرۍ له لوري تېره ورځ په صادر شوي فرمان کې د خپلواکو وزارتونو او ادارو ټولو مسوولینو ته سپارښتنه شوې وه، چې د کورنیو اړیکو او شخصي اړیکو پر بنسټ له ګومارنو ډډه وکړي.
-
تازه خبرونه5 days ago
مولوي عبدالکبیر له کابل والي سره پر امنیتي وضعیت خبرې وکړې
-
تازه خبرونه5 days ago
په عربي متحده اماراتو کې له ۲۰۰۰ ډېر افغان کډوال په بند کې ساتل شوي
-
سوداگري4 days ago
د اسلامي امارت مشرتابه د ګمرکونو له مسوولینو سره وکتل
-
تحول5 days ago
تحول: کابل ته د عربي متحده اماراتو د دیني پلاوي سفر
-
سوداگري2 days ago
د کندوز ولایت د صنعت او سوداګرۍ ریاست په عوایدو کې ۴۸ سلنه زیاتوالی راغلی
-
روغتيا3 days ago
شونې ده، چې کرونا ویروس له کاونده سپيو رامنځته شوی وي
-
نړۍ2 days ago
په اکوادور کې زلزلې ۳۹۴ کسانو ته مرګ و ژوبله اړولې
-
تازه خبرونه3 days ago
له اسلامي امارت سره تعامل دې د دې ټولنې عمومي منشي وارزوي – د م.م امنیت شورا