د افغانستان له شاهي کورنۍ څخه ۳۳ کلنه ماري کبیر سراج بیشوپینګ د امریکا په بهرینو چارو وزارت کې د افغانستان د چارو مشره وټاکل شوه.

آغلې بیشوپینګ له دې مخکې د امریکا د ولسي جرګې د بهرنیو چارو په کمیټه کې حقوقي سلاکاره او د فرعي کمیټې د کارکوونکو د مشرې په توګه دنده ترسره کوله، چې د جنوبي او مرکزي آسیا په اړه یې د فرعي کمیټې مشري هم کړې ده.

ماري بیشوپینګ افغان نژاده، په امریکا کې زېږیدلې او د یوې وکیلې او ډیپلوماټې په توګه یې کار کړی دی.

نوموړې په داسې حال کې ټاکل کېږي، چې د امریکا بهرنیو چارو وزارت اوس د افغانستان موضوع د مرکزي او جنوبي آسیا څانګې ته سپارلې ده.

یو شمېر کارپوهانو ويلي، چې افغانستان د امریکا په بهرنۍ پالیسۍ کې مهم پاتې شوی او ښايي د کابل او واشنګټن ترمنځ په اړیکو کې ښه‌والی راشي.

دغه رار نیویارک ټایمز راپور ورکړی، چې د ډونالډ ټرمپ د نوي اجرائیوي فرمان له مخې؛  په افغانستان کې د بشري حقونو او ښځو لپاره د امریکا د ځانګړي استازي او یو شمېر نورو بنسټونو موقف له منځه یوړل شي.

دا بدلونونه او ګمارنې په داسې حال کې کېږي، چې د افغانستان په اړه د امریکا بهرنۍ تګلاره د بیا کتنې او ارزونې په نوې دوره کې ده.

ویل شوي، چې دا بدلونونه د بهرنیو چارو وزارت د بیارغونې لپاره د هراړخیز پلان برخه ده، چې موخه یې د “فساد او لګښتونو کمول” او “د ولسمشر له لید سره بهرنۍ پالیسۍ تنظیمول دي.”

د افغانستان اسلامي امارت له امریکا سره د خبرو او ډیپلوماتیکو اړیکو لار پرانیستې او د مثبتو اړیکو او همکارۍ غوښتنه یې کړې ده.

دا به معلومه شي، چې د امریکا نوې اداره به له افغانستان سره څه وکړي.؟!

د اسلامي امارت رهبر شیخ هبة‌الله آخوندزاده پرون د ۲ زره ۶۰۰  کډونوالو د اسلامي ثقافت په ملي څلور ورخني کنفرانس کې د وینا پر مهال ویلي؛ کفارو د افغانستان په نظامي جګړه کې ماتې خوړلې او اوس یې تبلیعاتي جګړه پیل کړې، چې ټول یې باید په ګډه پر وړاندې سخته مبارزه وکړو.

د یاد کنفرانس په پرانیسته کې د اسلامي امارت رهبر شیخ هبة‌الله اخوندزاده زیاته کړې؛ په دې ډول مجالسو او کنفرانسونو سره ایمان قوت مومي. داسې مجلسونه پدې موخه جوړیږي، چې دین ته مو ګټه ورسېږي.

د ننګرهار پوهنتون له لوري په کندهار پوهنتون کې د اسلامي ثقافت د تدریس، ارزښت او اغېزې په دې ملي کنفرانس کې د اسلامي امارت رهبر د کنفرانس ګډونوالو ته په خطاب کې وویل؛ زه تاسې ته هغه څه خوښوم، چې د ځان لپاره یې خوښوم. که تاسې هم هغه څه زما لپاره وغواړئ، چې د ځان لپاره یې خوښوئ؛ نو په دې صورت کې به هېڅ دوښمن ته موقع پیدا نشي، چې ترمنځ مو ګډوډي راپیداکړي او نه به هم نظام له مشکلاتو سره مخ شي.

دغه راز نوموړي د علم پر ارزښت د خبرو پرمهال ویلي: «علم او عالم د لمر مثال لري او عالم ته پکار ده، چې د علم په رسولو کې لکه د لمر په شان ټولو ته رڼا ورسوي.»

د اسلامي امارت رهبر ویلي؛ په پوهنتونونو کې داسې خدمت وکړئ، چې د پوهنتون محصلین د خلکو لپاره مادي او معنوي قوت جوړ شي.

دغه راز عالماو او پوهانو ته سپارښتنه شوې، چې په چارو کې د الله تعالی پر رضایت ټینګار وکړی؛ ځکه، چې په نارضایتۍ کې یې د خلکو خیر نشته.

شیخ هبة‌الله آخوندراده د اسلامي امارت چارواکو ته دا هم ویلي: «د الله تعالی د رضا او شرعي نظام لپاره افغانانو شل کاله جهاد وکړ؛ اوس د همدې شرعي نظام عملي کولو لپاره باید پر سل کاله قربانیو هم ستړي نشو.»

دا څلور ورځني کنفرانس د لوړو زدکړو وزارت د چارسمبالي نداء محمد ندیم، د سرې میاشتې عمومي ریاست چارسمبالي، د مرکزي دارالافتاء رییس، د کندهار ولایت امنیه قومندان، د هلمند ولایت د عالمانو شورا رییس، د لوړو زدکړو وزارت مرکزي ادارو، پوهنتونونو او دیني جامعاتو رییس صاحبانو، د علمي څېړنو او مجلې معاونینو، د شرعیاتو پوهنځیو او د اسلامي ثقافت پوهنځيو رییسانو او استادانو، د دعوت او ارشاد امامانو او مبلغینو پر ګډون پیل شو، چې په کې د اسلامي امارت له رهبر سره ۲۶۰۰ کسانو يو ځل خپل بیعت تازه کړ.

د یادونې ده، چې د دغه کنفرانس په څلور ورځو کې به د شرعیاتو او اسلامي ثقافت اړوند ۱۰۴ بېلا بېلې علمي ـ څېړنیزې مقالې هم وړاندې شي.

په کابل کې د روسیې سفیر د اسلامي امارت د انرژۍ او اوبو وزارت چارسمبالي(سرپرست) ته د کازان په غونډه کې د ګډون بلنه ورکړه.

دمیتري ژیرنوف عبداللطیف منصور ته بلنه ورکړه، چې د کازان په اقتصادي فورم کې، چې د روان کال په می میاشت کې جوړیږي؛ ګډون وکړي.

عبداللطیف منصور بلنه ومنله او وایي، چې په فورم کې به ګډون وکړي.

روسي ډیپلومات همدارنګه ډاډ ورکړ، چې په افغانستان کې د پانګونې د شته فرصتونو په اړه به د هېواد حکومت او خصوصي سکټور ته معلومات ورکړي.

دغه راز په دې غونډه کې عبداللطیف منصور د روسیې دولتي او خصوصي شرکتونو ته بلنه ورکړه، چې د افغانستان د اوبو او انرژۍ په پروژو کې په ځانګړي توګه له پنجشېر څخه کابل ته د اوبو د لېږد په پروژه کې پانګونه وکړي.

د انرژۍ او اوبو وزارت چارسمبالي هم د روسیې د هغې پرېکړې ستاینه وکړه، چې اسلامي امارت یې د منع شویو ډلو له نوملړ څخه لرې کړ.

کارپوهان په دې باور دي، چې د روسیې دا اقدام د کابل او مسکو ترمنځ په بېلابېلو برخو کې نورې همکارۍ زمینه برابره کړي.

د یادونې ده، چې څو ورځې مخکې د روسیې حکومت اسلامي امارت د منع شویو ډلو له نوملړ څخه لرې کړ.