د پخواني حکومت والي او د کابینې غړی طاهر زهیر، چې په دې وروستیو کې له شاوخوا دوه کلن وسلهوال مخالفت وروسته له اسلامي امارت سره یوځای شوی، جګړه د افغانستان د ستونزو  حل لار نهګڼي او د خبرو له لارې د شته ستونزو پر حل ټینګار کوي.

هغه له چارواکو، مشرانو او نورو سیاسي څېرو غواړي چې هېواد ته راستانه شي او د هېواد په آبادۍ او پرمختګ کې ونډه واخلي.

نوموړي په سمنګان ولایت کې یوې غونډې ته د وینا پر مهال له اسلامي امارت وغوښتل، چې په هېواد کې د یووالي بنسټونه پیاوړي کړي او ټولو قومونه ته د نظام په جوړښت کې ونډه ورکړي.

طاهر زهیر وايي، چې په هېواد کې جګړه د ستونزو  حل لار نهده. هغه خلک، چې غواړي د افغانستان ستونزه د جګړې له لارې حل کړې؛ هېواد ته دې راستانه شي او د خبرو  اترو  لار دې خپله کړي.

د سمنګان ولایت سیمه ییز چارواکي او مشران له ټولو هغو کسانو  او مشرانو څخه چې له هېواده وتلي دي غواړي چې  خپل وطن ته راستانه شي او د هېواد په پرمختګ کې ونډه واخلي.

د سمنګان والي عبدالاحد فضلي ويلي: زموږ د هغو افغان وروڼو لپاره، چې بهر ته تللي او یا هم هغه وروڼه، چې غرونو ته پورته شوي؛ ډېر خواشینی یم. له دوی ټولو څخه زمونږ غوښتنه دا ده، چې د افغانستان د اسلامي امارت مشر ټول ولس ته عفو کړې؛ نو خپل وطن او هېواد ته راشئ، تاسې ټول مو وروڼه یاست.

د سمنګان امنیه قومندان احمدالله بدر ویلي: زما پیغام د اسلامي امارت ټولو مخالفانو ته دا دی، چې د افغانستان اسلامي امارت د رهبرۍ د عمومي عفوې له فرمان څخه ګټه پورته کړي؛ له اسلامي امارت سره یو ځای شي او له خپل توان او قوت څخه کار واخلي او د اسلامي امارت د پياوړتيا په لار کې له مونږ سره ټول بوخت شي.

د دې ولایت د استخباراتو رییس محمد هاشم شفیق ویلي: ټولو هغو کسانو ته، چې بهر ته تللي؛ د اسلامي امارت غېږ ورته خلاصه ده، خپل هېواد خدمت ته دې راستانه شي.

طاهرزهیر ويلي، چې غواړي د یوه عادي وګړي په توګه خپل ژوند روان وساتي او په نظام  کې د کار کولو نیت نهلري؛ خو اسلامي امارته دې د باور فضا رامنځته کړي، چې ټول سیاسي او ټولنیز شخصیتونه هېواد ته راستانه شي.

د افغانستان اسلامي امارت د عامې روغتیا وزیر داکتر قلندر عباد د شنبې پر ورځ په تهران کې د G5 هېوادونو د استازیو ۲۶ غونډې ته  ویلي، چې د روغتیا په برخه کې هیڅ ښځینه کارکوونکې له کار کولو منع شوې نده.

نوموړي یادې ناستې ته د وینا پر مهال دا اوازې رد کړې او هغه یې د ځینو خود غرضه ډلو او کړیو کار وباله.

هغه وایي؛ ځینې خود غرضه کړۍ کله ناکله د ټولنې د ذهنونو د مغشوشولو لپاره اوازې خپروي، چې ښځینه روغتیايي کارکوونکي له کار څخه منع شوي دي. په داسې حال کې، چې ټولې ښځینه کارکوونکې خپلو هېوادوالو ته د اسلامي او شرعي احکامو په رڼا کې ښځینه ناروغانو، میندو او ماشومانو ته ډاډمن روغتیايي خدمات وړاندې کوي.

دغه راز قلندر عباد څرګنده کړې؛ د روغتیا په برخه کې همکاري ډېره مهمه ده، په ځانګړي توګه د ساري ناروغیو د څارنې په برخه کې.

نوموړی وایي: ناروغۍ پولې نه پېژني، مونږ بايد په ګډه د دې ډول پېښو پر وړاندې مبارزه وکړو.

عباد دغه راز د روغتيا په برخه کې د پرمختګونو او لاسته راوړنو په اړه خبرې ډاډ څرګند کړ او وایي، چې د عامې روغتيا وزارت اوس په هغو سيمو کې روغتيايي خدمات وړاندې کوي، چې کلونه کلونه ترې بې برخې ول.

عباد وایي: مونږ اوس په دې سيمو کې خپلو هېوادوالو ته د روغتيايي خدمتونو د وړاندې کولو زمينه برابره کړې، په ځينو برخو کې اوس هم کار پاتې دى؛ ځکه، نو په دې اړه همغږي او مرستې ته اړتيا ده.

نوموړي دا هم ویلي؛ افغانستان د کرونا واکسین د پلي کولو په برخه کې مخکښ هېواد دی او د نورو عادي واکسیناسیون او پولیو ضد کمپاینونو په ترسره کولو کې یې د پام وړ لاسته راوړنې لرلې دي.

هغه په همدې حال کې له نړیوالو همکارانو وغوښتل، چې د روغتیا په نړیواله شورا او د ختیځې مدیترانې سیمه ییزې ټولنې یا EMRO کې د افغانستان استازیتوب ته زمینه برابره کړي.

قلندر عباد په دې اړه وایي: نړیوال همکاران او د افغانستان خواخوږي هېوادونه باید له مونږ سره په دې برخه کې مرسته وکړي، چې افغانستان د نړیوالې روغتیایي اسامبلۍ او ختیځې مدیترانه‌یي حوزوي ټولنې یا EMRO غړیتوب، چې د روغتیا وزارت حق دی ترلاسه کړي او خپل روغتیایي لومړیتوبونه او اړتیاوې له نړیوالو سره شریکې او حل لارې ورته ومومي.

د G5 په ۲۶ غونډه کې ایران، پاکستان، افغانستان، عراق او تاجکستان راټول شوي او د روغتیایي همکاریو په لټه کې دي.

دا په داسې حال کې ده، چې د افغانستان د عامې روغتیا وزیر په خپل دې سفر کې د ایران د ولسمشر له مرستیالې میرمن انیسه خزعلی سره په لیدنه کې د دوه اړخیزو همکاریو پر پراختیا په ځانګړي توګه د روغتیايي پرسونل د وړتیاوو د لوړولو، د سرطان ناروغۍ د تشخیص او درملنې او د روغتیا په برخه کې د تجربو پر شریکولو خبرې کړې دي.

د اسلامي امارت د بهرنیو چارو وزیر امیرخان متقي د پاکستان د پوځ له لوی درستیز جنرال منیر عاصم سره په بېلابېلو مسایلو په ځانګړي ډول پر امنیتي مسایلو خبرې کړې دي.

د بهرنیو چارو وزارت د ویاند مرستیال ضیا احمد تکل د یکشنبې پر ورځ ویلي، چې د بهرنیو چارو وزیر مولوي امیرخان متقي د پاکستان د پوځ له لوی درستیز جنرال عاصم منیر سره د سیمه‌ییز امنیت، د خلکو د تګ راتګ د اسانتیا او د افغان کډوالو د ستونزو په اړه د دوه اړخیزو همکاریو په اړه هراړخیزې خبرې وکړې.

پاکستانيو رسنیو راپور ورکړی، چې منیر له متقي سره په لیدنه کې د ترهګرۍ او افراطیت له ګډو ننګونو سره د مبارزې لپاره د پاکستان او افغانستان ترمنځ د همکارۍ د زیاتولو پر اړتیا ټینګار وکړ.

د پاکستان د پوځ د عامه اړیکو د ادارې (ISPR) لخوا په خپره شوې خبرپاڼه کې راغلي؛ متقي د خپل څلور ورځني سفر په بهیر کې د پوځ له مشر سره لیدلي دي.

دواړو مشرانو د سیمه‌ییز امنیت، د سرحدونو د مدیریت او په اوسني امنیتي چاپېریال کې د ښه والي لپاره د دوه اړخیزو امنیتي میکانیزمونو د رسمي کولو په ګډون د دوه اړخیزو ګټو پر مسایلو خبرې کړې دي.

جیو نیوز راپور ورکړی، چې د پاکستان د پوځ مشر د دوه اړخیزو ګټو په مسایلو کې له اسلامي امارت څخه د بشپړ ملاتړ او ژمنې اړتیا هم تکرار کړه.

په دې کتنه کې دواړو لوریو د دوه اړخیزو اړیکو د پیاوړتیا او د ګډو اندېښنو مسایلو ته د رسیدو لپاره د منظم تماس د ساتلو پر اهمیت هوکړه وکړه.

وروسته، د پوځ مشر د باثباته، سوله‌ییز او سوکاله افغانستان لپاره د پاکستان ژمنې بیا تکرار کړې.

اسلامي امارت ویلي، چې متقي او ورسره مل پلاوي یې د شنبې پر ماښام په اسلام‌آباد کې د پاکستان د سیاسي ګوندونو له یو شمېر مشرانو سره وکتل او د دواړو لوریو ترمنځ پر سیاسي او سوداګریزو مسایلو خبرې وشوې.