Connect with us

تازه خبرونه

هیڅوک له امریکا څخه د پاتې وسلو او پوځي تجهیزاتو څخه ناوړه ګټه پورته کولی نشي – اسلامي امارت

د اسلامي امارت د ویاند مرستیال وايي، چې ټولې وسلې او پوځي تجهیزات زیرمه شوي او هیڅوک اجازه نلري، چې له دې وسلو او پوځي تجهیزاتو ناوړه ګټه پورته کړي.

خپور شوی

د

اسلامي امارت د پاکستان هغه ادعاوې رد کړې، چې وايي؛ په افغانستان کې له پاتې امریکايي وسلو ناوړه  ګټه اخیستل کیږي.

د اسلامي امارت د ویاند مرستیال وايي، چې ټولې وسلې او پوځي تجهیزات زیرمه شوي او هیڅوک اجازه نلري، چې له دې وسلو او پوځي تجهیزاتو ناوړه ګټه پورته کړي.

له دې مخکې د پاکستان د بهرنیو چارو وزارت ویاند ویلي وه، چې په افغانستان کې پاتې شوې پرمختللې امریکایي وسلې د پاکستان حکومت او وګړو ته مستقیم ګواښ دی؛ ځکه، چې د تحیک طلبان پاکستان په ګډون سخت دریځې ډلې یې په پاکستان د بریدونو لپاره کاروي.

د پاکستان د بهرنیو چارو وزارت ویاند شفقت علي خان ویلي: په افغانستان کې د پرمختللو امریکایي وسلو شتوالی، چې د ۲۰۲۱ کال په اګست کې یې د خپلو ځواکونو له وتلو وروسته پرېښودې؛ د پاکستان او پاکستانيانو د امنیت او خوندیتوب لپاره د لویې اندېښنې وړ موضوع ده. ( وسلوالې ډلې ) او پاکستاني طالبان دا وسلې په پاکستان کې د بریدونو لپاره کاروي. مونږ په وار وار د کابل د لنډمهاله حکومت له چارواکو د اړینو اقداماتو غوښتنه کړې، چې ډاډ ترلاسه شي او دا وسلې د ناسمو خلکو لاسته نه ورځي.”

د پاکستان دا ادعا د اسلامي امارت لخوا رد شوې ده.

د اسلامي امارت د ویاند مرستیال حمدالله فطرت ویلي؛ د افغانستان وسلې او پوځي تجهیزات په سمه توګه ساتل شوي او هیچا ته اجازه نه‌ورکول کیږي چې  ناوړه ګټه ترې پورته کړي.

په ملګرو ملتونو کې د پاکستان دایمي استازي د ملګرو ملتونو له عمومي منشي انټونیو ګوټرش او د ملګرو ملتونو د امنیت شورا د لس غیر دایمي غړو له استازو سره د افغانستان په اړه خبرې کړې دي.

په ملګرو ملتونو کې د پاکستان دایمي استازی منیر اکرم وایي: “دا د ویاړ خبره وه، چې د ملګرو ملتونو د عمومي منشي او د ملګرو ملتونو د امنیت شورا د غیر دایمي غړو یو شمېر استازو کوربتوب مې وکړ. د دې غونډې په جریان کې مونږ د سولې د ساتلو او د افغانستان د وضعیت په ګډون په بېلابېلو مسلو رغنده بحثونه وکړل. “

له دې مخکې د امریکا ولسمشر ډونالډ ټرمپ په افغانستان کې د خپل هېواد د پاتې تجهیزاتو پر پاتې کېدو نیوکه کړې وه او له افغانستان سره د امریکا د دوامداره مرستو په بدل کې یې د بېرته ورکولو غوښتنه کړې وه.

تازه خبرونه

سوداګر دې قانوني پانګونه وکړي – د بدخشان والي مرستیال

حقجو په فیض‌آباد ښار کې د افغان ملي بانک د پرانیستلو د مراسمو پر مهال له سوداګرو وغوښتل، چې د شتمنېدا لپاره خپلې پانګې د نشه‌يي توکو قاچاق ته ځانګړې نه‌کړي او په دې کار سره ځوانان پر نشه‌يي توکو اخته نه‌کړي.

Published

on

د بدخشان ولایت د والي مرستیال جمال‌الدین حقجو له سوداګرو غوښتي، چې خپلې پانګې په قانوني او تولیدي برخو کې ولګوي او د هېواد په اقتصادي وده کې ونډه واخلي.

حقجو په فیض‌آباد ښار کې د افغان ملي بانک د پرانیستلو د مراسمو پر مهال له سوداګرو وغوښتل، چې د شتمنېدا لپاره خپلې پانګې د نشه‌يي توکو قاچاق ته ځانګړې نه‌کړي او په دې کار سره ځوانان پر نشه‌يي توکو اخته نه‌کړي.

حقجو وویل، اوس مهال په ټول افغانستان کې زرګونه کسان په نشه‌يي توکو روږدي دي او له سوداګرو یې وغوښتل، چې د نشه‌يي توکو په قاچاق کې پانګونه ونه‌کړي.

دغه راز په دې مراسمو کې نورو سیمه‌ییزو چارواکو له ولس وغوښتل، چې د حکومت پر وړاندې د درېدا پر ځای دې د هېواد د اقتصادي ودې لپاره کار وکړي.

دوی ویلي؛ د اقتصادي فعالیتونو پراختیا کولی شي د بېوزلۍ او نورو هغو ستونزو په کمولو کې مرسته وکړي، چې زرګونه کورنۍ ورسره مخ دي.

چارواکو له بانکونو او سوداګرو هم وغوښتل، چې خپل فعالیتونه د اسلامي اصولو له مخې ترسره کړي.

د افغان ملي بانک نوې پرانیستل شوې څانګه به د بدخشان اوسېدونکو ته بانکي خدمتونه وړاندې کړي.

د بانک ملي بانک چارواکي وايي؛ هغه دولتي کارکوونکي، چې معاشونه یې د دې بانک له لارې ترلاسه کیږي؛ د بانک د تګلارې له مخې به د پور له خدمتونو هم برخمن شي.

د بدخشان اوسېدونکو د دې څانګې پرانیستل بانکي خدمتونو ته د لاسرسي د آسانتیا لپاره مهم وبلل او له بانکونو یې وغوښتل، چې د دغه ولایت په لرې پرتو ولسوالیو کې هم خپلې څانګې پرانیزي.

چارواکو له سوداګرو او دولتي ادارو وغوښتل، چې د پانګونې او د بانک له خدمتونو څخه د ګټې اخیستنې له لارې د دغه بانک ملاتړ وکړي.

Continue Reading

تازه خبرونه

په ایران کې د ټرافیکي پېښې له کبله اووه افغان کډوال مړه شوي

د بشري حقونو د «حال‌وش» بنسټ د راپور له مخې؛ دغه ټرافیکي پېښه د جمعې پر ورځ( د ۱۴۰۵ لمریز لېږدیز کال د سنبلې پر اووه‌ویشتمه) د سیستان او بلوچستان په سرباز نومې سیمه کې رامنځته شوې ده.

Published

on

د ایران په سیستان او بلوچستان ولایت کې د افغان کډوالو لېږدوونکي موټر او د تېلو لېږدوونکي موټر د ټکر له کبله اووه کسان مړه شوي دي.

د بشري حقونو د «حال‌وش» بنسټ د راپور له مخې؛ دغه ټرافیکي پېښه د جمعې پر ورځ( د ۱۴۰۵ لمریز لېږدیز کال د سنبلې پر اووه‌ویشتمه) د سیستان او بلوچستان په سرباز نومې سیمه کې رامنځته شوې ده.

د سیستان او بلوچستان د ټرافیک پولیسو قومندان سیاوش محبي ویلي، چې افغان وګړي ناقانونه ایران ته راننوتلي وه.

هغه زیاته کړې، چې په دې پېښه کې نهه نور ټپیان شوي دي.

محبي د پېښې لامل د کډوالو لېږدوونکي موټر د چلوونکي بې‌احتیاطي بللې ده.

 
Continue Reading

تازه خبرونه

د اسلامي همکاریو ټولنه د افغانستان په اړه د تماس ډلې ناسته تر سره کوي

د اسلامي همکاریو ټولنې ویلي، په دې غونډه کې به د افغانستان پر روان وضعیت، د دغه هېواد له خلکو سره د ملاتړ او د افغانستان په اړه د ګډو هڅو پر څرنګوالي خبرې وشي.

Published

on

د اسلامي همکاریو ټولنې اعلان کړی، چې د افغانستان په اړه د دې ټولنې د تماس ډلې غونډه به د ملګرو ملتونو د یواتیاومې عمومي غونډې په څنډه کې ترسره شي.

د اسلامي همکاریو ټولنې ویلي، په دې غونډه کې به د افغانستان پر روان وضعیت، د دغه هېواد له خلکو سره د ملاتړ او د افغانستان په اړه د ګډو هڅو پر څرنګوالي خبرې وشي.

د غونډې موخه د افغانستان په اړه د اسلامي همکاریو ټولنې د غړیو هېوادونو ترمنځ د نظرونو همغږي او د دغه هېواد د وضعیت په تړاو د ګډ دریځ پیاوړتیا بلل شوې ده.

د ملګرو ملتونو د یواتیاومې عمومي غونډې په څنډه کې به د اسلامي همکاریو ټولنې د غړیو هېوادونو د بهرنیو چارو وزیرانو کلنۍ غونډه هم ترسره شي.

د بهرنیو چارو وزیرانو په دې کلنۍ غونډه کې به د اسلامي نړۍ پر مهمو موضوعاتو سربېره د افغانستان وضعیت او له دغه هېواد سره د اړیکو او همکاریو د پراختیا په اړه هم خبرې وشي.

د اسلامي همکاریو ټولن د افغانستان د وضعیت په اړه د تماس ډله کې د غړیو هېوادونو استازي شامل دي او دغه ډله د افغانستان اړوند د بحثونو او د نظرونو د همغږۍ لپاره جوړ شوې ده.

Continue Reading
Advertisement

Trending

Copyright © 2026 Ariana News. All rights reserved!