Connect with us

تازه خبرونه

وروستی افغان بندي بشیر نورزی له امریکایي مارک فریکس سره تبادله شو

Published

 on

(Last Updated On: وږی ۲۹, ۱۴۰۱)

د امریکا له زندانه وروستی افغان بندي د دوشنبې پر ورځ د وږي ۲۸ د کابل په هوايي ډګر کې تبادله او اسلامي امارت ته وسپارل شو.

په هغو مراسمو کې، چې په دې ویاړ جوړ شوي وه؛ د رییس الوزرا مرستیالان، د ملي دفاع وزارت سرپرست، د استخباراتو عمومي رییس، د بهرنیو چارو، مالیې، اطلاعاتو او فرهنګ وزارت وزیرانو او د اسلامي امارت لوړ پوړیو چارواکو ګډون کړی و.

د امریکا له زندانه وروستی خوشې شوي افغان بندي حاجي بشیر نورزي څه نا څه اووه لس کاله په امریکایي زندان کې تېر او دا دی اوس له یوه امریکایي بندي وګړي سره له تبادلې وروسته اسلامي امارت ته وسپارل شو.

د بهرنیو چارو وزیر امیرخان متقی ويلي، چې بشیر نورزی د اسلامي امارت د هڅو په پایله کې خوشې او هېواد ته راستون شوی دی.

حاجي بشر نورزي اووه لس کاله په امریکایي زندان کې تېر کړي او دا دی اوس د اسلامي امارت له ډېرو هلو ځلو وروسته له مارک فریکس نومي امریکايي وګړي سره، چې د اسلامي امارت په بند کې و؛ له بنده خوشې او په کابل هوايي ډګر کې اسلامي امارت ته سپارل شوی دی.

د بهرنیو چارو وزیر امیرخان متقي د نوموړي په اړه څرګنده کړي؛ ۱۱ کاله او شپږ میاشتې مخکې حاجي بشیر، چې په حاجي بشر نومیدلی، د امریکایانو لخوا ونیول شو او امریکا ته واستول شو او له امریکايي چارواکو سره تر خبرو اترو وروسته نن سهار لس بجې په کابل کې د یوه امریکايي وګړي په بدل کې اسلامي امارت ته وسپارل شو.

امیرخان متقی یو ځل بیا له ټولو هېوادونو او په ځانګړې توګه له امریکا وغوښتل، چې له اسلامي امارت سره د خبرو اترو له لارې د شته ستونزو د حل لپاره هڅې وکړي. مونږ له ټولو هېوادونو سره د مثبتو اړیکو غوښتونکي یوو.

دغه راز دغو مراسمو ته له امریکایي وګړي سره تبادله شوي حاجي بشیر نورزي ويلي؛ د ده خوشې کېدل ښيي، چې ټولې شته ستونزې د دیپلوماسۍ له لارې حل کېدی شي او نړۍ باید د اسلامي امارت پر وړاندې له بندیزونو او فشارونو کار وانخلي.

د امریکا له بنده آزاد شوی افغان بشیر نورزي ویلي؛ امریکا او ناتو له تېرو شل کلونو راپدیخوا په افغانستان کې جګړه کړې؛ خو نه یې د ځان او نه د افغانانو لپاره کومه پایله ترلاسه کړې ده. دا ثابتوي، چې مسایل باید د خبرو له لارې حل شي او نړۍ باید له اسلامي امارت سره اړیکه ونیسي.

د اسلامي امارت چارواکي وايي؛ هڅه کوي، چې په بېلابېلو هېوادونو کې ټول بندي افغانان د دیپلوماسۍ او خبرو اترو له لارې راخوشې کړي.

د بهرنیو چارو وزارت د وزیر د څرګندونو له مخې؛ د اسلامي امارت له واک ته رسېدو راپدیخوا سلګونه افغانان، چې په بېلابېلو هېوادونو کې بندیان وو، د دغو هېوادونو له چارواکو سره د خبرو اترو په پایله کې خوشې شوي دي.

تازه خبرونه

جاپان له افغانستان سره له ۱۰۶ میلیون دالرو د ډېرې مرستې ډاډ څرګند کړ

Published

on

(Last Updated On: ليندۍ ۱۵, ۱۴۰۱)

د جاپان سفارت نن سې شنبې د لیندۍ ۱۵ څرګنده کړې، چې هېواد یې له روان بشري ناورین سره د مبارزې لپاره افغانستان ته د ۱۰۶ اعشاریه ۷ میلیون دالرو اضافي مرستې پرېکړه کړې ده.

په کابل کې د جاپان سفارت تویت کړی: خوښ یوو، چې جاپان له افغانستان سره د ۱۰۶ اعشاریه ۷ میلیون دالرو اضافي مرستې پرېکړه کړې ده.

د سرچینې د څرګندونو له مخې؛ له دغو مرستو سره به نه یوازې بشري اړتیاوې پوره شي، بلکې د بشري  پروژو د پلي کولو لپاره به هم زمینه برابره کړي. مونږ هیله من یوو، چې له دې پروژو سره به د افغانانو خوشحالي احساس شي.

د جاپان سفارت په ډاګه کړې، چې دا پروژې به د ملګرو ملتونو د ادارو، نړیوالو موسسو او نادولتي موسسو لخوا پلي شي، چې موخه یې له بېلابېلو لارو چارو د ژوندانه ښه کول دي.

دغه راز ویل شوي، چې له دغو ۱۰۶ اعشاریه ۷ میلیون دالرو سره به د ۲۰۲۱ ز. کال راپدیخوا له افغانستان سره د جاپان ټولې مرستې ۳۳۵ میلیون دالرو ته ورسیږي.

دا په داسې حال کې ده، چې درې ورځې مخکې د دسمبر پر ۳ د افغانستان لپاره د امریکا ځانګړي استازي توماس ویست تویت کړی، چې د جاپان د نړیوالې همکارۍ ادارې یا جایکا سره یې د افغانستان د بشري اړتیاوو او بشري حقونو په اړه خبرې کړې دي.

ویست د شنبې پر ورځ څرګنده کړې: جاپان د افغانانو دوست او له ۲۰ کلونو راپدیخوا هلته زمونږ همکار دی او مونږ د جاپان د فعالې دیپلوماسۍ او روان سخاوت څخه د زړه له کومي مننه کوو.

توماس ویست دا ډاډ هم څرګند کړی؛ مونږ له خپلو متحدینو سره یوځای کار کوو، مونږ تل په هره ننګونه کې پیاوړي یوو او په بېلابېلو برخو کې به د جاپان تخصص او مرستې روانې وساتو.

د افغانستان لپاره د امریکا ځانګړي استازي له دې مخکې ویلي وه، چې د روانې دسمبر میاشتې لومړۍ څخه تر اتمې به جاپان، هند او عربي متحده اماراتو ته سفر کوي او هلته به د بشري مرستو، د بشري حقونو ساتنې او د نجونو د زدکړو په اړه د کوربه هېوادونو له چارواکو سره همغږي رامنځته کړي.

Continue Reading

تازه خبرونه

د اطلاعاتو او فرهنګ د وزیر د سفر بندیز لنډمهاله لرې شو

Published

on

(Last Updated On: ليندۍ ۱۴, ۱۴۰۱)

د ملګرو ملتونو امنیت شورا د اطلاعاتو او فرهنګ پر وزیر خیرالله خیرخواه د لس ورځو لپاره د سفر بندیز لرې کړ.

د دغه حکومتي چارواکي د سفر معافیت د پنجشنبې پر ورځ د لیندۍ له ۱۰ څخه تر ۱۹ نېټې پورې وضع شوی، چې نوموړی وکولی شي د روسیې د تاتارستان جمهوریت پلازمېنې کازان ښار ته سفر وکړي.

د ملګرو ملتونو د امنیت شورا د خبرپاڼې له مخې؛ د اطلاعاتو او فرهنګ وزیر خیرالله خیرخواه به د نړۍ د فرهنګي میراثونو د ساتنې د کنوانسیون د پنځوسمې کلیزې په مناسبت په یوه نړیوال فورم کې ګډون وکړي.

په همدې حال کې د اطلاعاتو او فرهنګ وزارت ويلي، چې د اوس لپاره تاتارستان جمهوریت ته د خیرالله خیرخواه سفر ځنډېدلی دی.

Continue Reading

تازه خبرونه

آلمان به سږ کال شاوخوا یو اعشاریه دوه میلیون مهاجر ومني

Published

on

(Last Updated On: ليندۍ ۱۴, ۱۴۰۱)

د یکشنبې پر ورځ آلمانۍ خپرونې ولت ام سونتاګ څرګنده کړه، چې دا هېواد به سږ کال ټولټال ۱.۲ میلیون مهاجر ومني؛ ځکه، چې د مهاجرت دا شمېر په ۲۰۱۵ ز. کال کې ۸۹۰ زره کسان ول.

د دې خپرونې له مخې؛ په ټاکلې موده کې له اوکراین څخه څه باندې یو میلیون کسان جرمني ته دننه شوي دي.

سربېره پر دې د اکتوبر میاشتې تر پایه پورې د سوریې، افغانستان، ترکیې، عراق او نورو هېوادونو له وګړیو څخه ۱۸۱۶۱۲ د پناه غوښتنلیکونه رارسیدلي دي.

دغې ورځپاڼې په ډاګه کړې؛ د جرمني چارواکي تمه لري، چې د روان کال تر پایه به دغه شمېر له ۲۰۰ زره هم واوړي.

دغې خپرونې د جرمني د چارواکو له خولې په ډاګه کړې، چې دغه سیمې د مهاجرو د منلو وروستۍ وړتیا ته رسیدلي دي.

دغو چارواکو ویلي، چې د مرستې غږ له ټول هېواده اورېدل شوی دی.

دغې خپرونې د چارواکو د څرګندونو له مخې دا خبره هم راخیستې، چې غیرقانوني کډوالۍ چټکه وده کړې ده.

Continue Reading

Trending

Copyright © 2022 Ariana News. All rights reserved!