د افغانستان د ټرافیکو عمومي ریاست څرګنده کړې، چې له جمعې څخه تر سې‌شنبې پورې (د عرفې او لوی اختر  رخصتۍ ) په ټول هېواد کې ۱۱۷ ټرافیکي پېښې ثبت شوې دي.

د دې ریاست د رسنیزې خبرپاڼې له مخې، په دې پېښو کې د ۳۱ نرینه‌وو، ۲ ښځو او ۱۰ ماشومانو په ګډون ۴۳ کسان مړه شوي او د ۱۲۳ نرینه‌وو، ۱۱ ښځو او ۲۴ ماشومانو په ګډون ۱۵۸ نور ټپیان دي.  

د ټرافیکو عمومي ریاست دا پېښې بې پروا موټر چلوونکو ته منسوب کړې او له خلکو یې وغوښتل، چې د ټرافیکو قوانین او مقررات مراعات کړي.

د افغانستان اسلامي امارت د هند د یوې مسافر وړونکې الوتکې د غورځېدو له کبله، چې په کې ګڼ شمېر کسانو خپل خوږ ژوند له لاسه ورکړ؛ د هند له حکومت او خلکو سره خبله خواخوږي څرګنده کړې ده.

د بهرنیو چارو وزارت ویاند عبدالقهار بلخي په ایکس پاڼه کې لیکلي: “د افغانستان اسلامي امارت بهرنیو چارو وزارت د هند د مسافر وړونکې الوتکې د غورځېدو له کبله ژوره خواشیني څرګنده کړې او د قربانیانو له کورنیو او هند حکومت سره خپله خواخوږي او خواشیني څرګندوي.”

ویل کېږي، چې د ایر انډیا الوتکې  ۲۴۲ مسافر لرل او د احمدآباد له هوايي ډګر څخه له الوتنې لږ وروسته راوغورځېده. په دې پېښه کې له ۲۹۰ څخه زیاتو کسانو خپل ژوند له لاسه ورکړی دی.

د ایران حکومت ویانده فاطمه مهاجراني ويلي، چې د افغانستان له هیرمند سیند څخه هېواد ته د حقآبې یوه برخه د لېږدېدا په حال کې ده.

ایراني رسنیو د چارشنبې په ورځ (د غبرګولي یوویشتمه) راپور ورکړ، چې میرمن مهاجراني د دولت پلاوي په څنډه کې ویلي، چې هېواد ته د حقآبې یوه برخه د افغانستان له هیرمند سیند څخه د لېږدېدا په حال کې ده او د بهېدا د روان ساتلو لپاره هم هڅې روانې دي.

مهاجراني ویلي، چې د هیرمند د حقآبې مسله یوه پخوانۍ مسله ده او هېواد یې د حل لپاره ډیپلوماټیکه لار کاروي.

د دې مسلې چاپېریالي اغېزو ته په نغوته(اشاره) کې ټینګار شوی، چې: “مونږ هیله لرو، چې د زیاتې همکارۍ او پرله‌پسې هڅې د چاپېریال اړوند اندېښنې هم په لنډ او ممکنه وخت کې حل شي.”

په هر حال اسلامي امارت د ایراني چارواکو د دغو څرګندونو په اړه څه ندي ویلي.

څه وخت مخکې د اسلامي امارت بهرنیو چارو وزیر امیر خان متقي په “تهران خبرو فورم” کې د وینا پر مهال ویلي وه، چې د هیرمند حقآبه د اسلامي امارت “اسلامي او دیني مسوولیت” دی او کله، چې وچکالي نه وي؛ څه اوبه، چې وي د ایران لوري ته به بهیږي.

امیر خان متقي ویلي؛ هڅه کوي ډاډ ترلاسه کړي، چې اوبه ضایع نشي او ایران ته پوره ورسیږي.

د یادونې ده، چې ایران تل له اسلامي امارت څخه غوښتي؛ د ۱۳۵۱ لمریز لېږدیز کال د هیرمند د اوبو تړون مکلفیتونه په پام کې ونیسي.