د نیویارک ټایمز ورځپاڼې د امریکایي چارواکو د څرګندونو له مخې ویلي، چې که امریکا د ایران پر وړاندې د اسرائیلو په جګړه کې د ایران اټومي تاسیساتو په نښه کولو کې برخه واخلي؛ نو ایران په سیمه کې د امریکایي د اډو د پر نښه کولو لپاره توغندي چمتو کړي دي.

نیویارک ټایمز ورځپاڼې د امریکايي چارواکو د څرګندونو له مخې لیکلي، چې ایران په سیمه کې د امریکا د اډو د پر نښه کولو لپاره ډېر چمتو ندی او د دوی توغندي کولی شي اسانه دغو اډو ته ورسیږي.

که برید وشي؛ نو ایران ممکن د هرمز په تنګي کې ماینونه ځای پر ځای کړي، چې د امریکا کښتۍ محاصره کړي.

امریکايي چارواکو دا هم ویلي، چې امریکایي ځواکونه د ټولې سیمې په اډو کې تیارسۍ دي.

ټرمپ، چې له دې مخکې یې ویلي وه؛ د هغه یوازنۍ غوښتنه دا ده، چې ایران اټومي وسلې ونلري او په تازه څرګندونو کې یې د ایران د ” تسلیمېدا ” غوښتنه کړې ده.

د دغه راپور له مخې؛ امریکا په منځني ختیځ کې له ۴۰ زره څخه ډېر سرتېري لري او دا ځواکونه د دې سیمې د متحده عربي اماراتو، اردن او سعودي عربستان په پوځي اډو کې تیارسۍ دي.

رویټرز راپور ورکړی، چې ایران او اسرائیل د چارشنبې پر ورځ( د غبرګولي اته‌ویشتمه ) پر یو بل نوي توغنديز بریدونه پیل کړل. په داسې حال کې، چې د دواړو اوږدمهاله دښمنانو ترمنځ هوايي جګړه شپږمې ورځې ته ننوتې؛ د امریکا ولسمشر ډونالډ ټرمپ د تهران د بې قید اوشرطه د تسلیمۍ غوښتنه کړې ده.

د اسرائیلو پوځ ویلي، چې د چارشنبې پر سهار په لومړیو دوه ساعتونو کې د ایراني توغندي د اسرائیل پر لوري توغول شوي او په تل ابیب کې د چاودنو غږ اوریدل شوی دی.

اسرائیل د تهران په سویل لویدیځ سیمه کې اوسیدونکو ته ویلي؛ له سیمې دې ووځي، چې د دوی هوایي ځواک د ایران پوځي تاسیسات پر نښه کړي.

د ایراني خبري اوبپاڼو ویلي، چې اسرائیل د پلازمېنې په ختیځ کې د ایران د پاسدارانو پر پوهنتون برید کوي.

ایراني خبري اوبپاڼو ویلي، چې اسرائیل د هېواد په ختیځ کې د ایران د پاسدارانو پوهنتون او تهران ته نږدې د خجیر بالسټیک توغندیو پر تاسیساتو برید کوي، چې په تېر اوکټوبر کې هم د اسرائیلو د هوايي بریدونو لخوا پر نښه شول.

د امریکا د ملي استخباراتو د رییس دفتر ويلي، چې ایران په منځني ختیځ کې تر ټولو زیات بالسټیک توغندي لري.

ایران وایي، چې د دوی بالستیک توغندي د امریکا، اسرائیل او نورو بالقوه سیمه‌ییزو اهدافو پر وړاندې ساتونکی او غچ اخیستونکی ځواک دی.

ټرمپ د سې‌شنبې پر ورځ په ټولنیزو رسنیو کې خبرداری ورکړ، چې د امریکا صبر مخ پر خلاصېدو دی. په داسې حال کې، چې هغه ویلي؛ د اوس لپاره د ایران د رهبر آیت الله علي خامنه‌یی د وژلو هیڅ اراده نشته. د هغه دا څرګندونې د ایران پر وړاندې د یرغلیز دریځ ښکارندویي کوي؛ ځکه، چې هغه د امریکا د ښکېلتیا  په اړه غور کوي.

هغه په ​​ټروټ پاڼه کې لیکلي: “مونږ پوهیږو، چې تش په نامه ‘ رهبر’ چېرته پټ دی.” “مونږ به هغه له منځه ونه‌باسو (ووژنو!) لږ تر لږه د اوس لپاره نه … زموږ صبر مخ پر پای ته رسېدو دی.”

درې دقیقې وروسته ټرمپ ولیکل، ” بې شرط تسلیمېدل!”

یوې سرچینې، چې له داخلي بحثونو سره بلد ده ویلي، چې ټرمپ او د هغه ډله له اسرائیل سره د درېدو او د ایران پر اټومي تاسیساتو د بریدونو د غوراویو په اړه غور کوي.

د سپینې ماڼۍ یوه چارواکي ویلي، چې ټرمپ د سې‌شنبې پر ورځ د اسرائیلو له لومړي وزیر بنیامین نتنیاهو سره د ټیلیفون له لارې خبرې وکړې.

د سپینې ماڼۍ یوه چارواکي ویلي، چې ټرمپ د سې‌شنبې پر ماسپښین له ملي امنیت شورا سره د ۹۰ دقیقو لپاره هم ولیدل، چې د شخړې په اړه بحث وکړي. جزئیاتو ته تر دې دمه لاسرسی نشته.

د ځینو راپورونو له مخې؛ د خامنه ای اصلي پوځي او امنیتي سلاکاران د اسرائیلو په بریدونو کې وژل شوي، چې د هغه داخلي کړۍ یې تشه کړې او د سټراټیژیکو غلطیو خطر یې لوړ کړی.

د فارس خبري سرچینې راپور ورکړی، چې د ایران مشران د ۱۹۷۹ کال له اسلامي انقلاب راپدېخوا اوس له ترټولو خطرناک امنیتي سرغړونو سره مخ دي. د هېواد د سایبري امنیت قومندانۍ چارواکي د مخابراتي وسیلو او ګرځنده ټیلیفونونو له کارولو څخه منع کړي دي.

ایراني رسنیو راپور ورکړی، چې اسرائیل د ایران د ډیجیټل بنسټونو پر وړاندې “لویه سایبري جګړه” پیل کړې ده.

اسراییل د جمعې پر ورځ د ایران پر وړاندې خپله هوايي جګړه پیل کړه، چې تر دې دمه یې تر ټولو لویه جګړه وه. له هغې وروسته، چې وویل شول اسلامي جمهوریت د اټومي وسلو د پراختیا په درشل کې دی.

ایران د اټومي وسلو غوښتنه ردوي او د سوله‌ییزو موخو لپاره د اټومي ټکنالوژۍ حق ته یې اشاره کړې ده.

اسرائیل، چې د اټومي وسلو د پراختیا د مخنیوي NPT غړی ندی؛ په منځني ختیځ کې یوازنی هېواد دی، چې باور کیږي اټومي وسلې لري. اسرائیل دا نه رد کړې او نه یې تائیدوي.

نتنیاهو ټینګار کړی، چې هغه به تر هغه وخته پورې شاته نشي، چې د ایران اټومي پراختیا غیر فعاله شوې نه‌وي.

په داسې حال کې، چې ټرمپ وايي؛ اسرائیلي برید پای ته رسیدلی شي که ایران د بډاینې په اړه له سختو بندیزونو سره هوکړه وکړي.

د اسرائیلو د برید له پیل مخکې د ملګرو ملتونو د اټومي څارنې ادارې، د نړیوالې اټومي انرژۍ ادارې، د ۳۵ هېوادونو د حکومتونو بورډ، ایران له نږدې ۲۰ کلونو وروسته د لومړي ځل لپاره د خپلو د نه خپریدو مکلفیتونو څخه سرغړونه اعلان کړه.

د اټومي انرژۍ نړیوالې ټولنې د سې‌شنبې پر ورځ وویل، چې د اسرائیلو برید په مستقیم ډول د نطنز تاسیساتو کې د ځمکې لاندې غني کولو تالارونو ته ورسېد.

اسرائیل وايي، چې اوس د ایران پر هوايي حریم کنټرول لري او په راتلونکو ورځو کې د کمپاین د پراخولو نیت لري؛ خو اسرائیل به د امریکا له مرستې پرته ژورو ښخ شويو اټومي سایټونو ته د ضربې ورکولو لپاره مبارزه ونشي کړی.

 دا په داسې حال کې ده، چې ایراني چارواکو د ۲۲۴ کسانو د مړینې راپور ورکړی، چې ډېری یې ملکي وګړي دي. په داسې حال کې، چې اسرائیل ویلي، چې ۲۴ ملکي وګړي یې وژل شوي دي. د دواړو هېوادونو اوسیدونکي ایستل شوي یا تښتیدلي دي.

د اسرائیلو پوځ د سې‌شنبې پر ورځ( د غبرګولي پر اووه‌ویشتمه ) ادعا وکړه، چې دوی د ایران د خاتم الانبیاء مرکزي مرکز نوی ټاکل شوی قومندان علي شادماني په تهران کې پر نښه کړ.

د اسرائیل پوځ د څرګندونو له مخې، شادماني د ایران رهبر علي خامنه‌یی ته یو له نږدې کسانو څخه و.

هغه څلور ورځې مخکې د خامنه‌یی پر سپارښتنه د غلام علي رشید د ځای ناستي په توګه ټاکل شوی و.

د ایران پوځ د ځمکنیو ځواکونو قومندان کیومرث حیدري ویلي؛ پر اسرائیل د ډرون درانده بریدونه له “نويو او پرمختللو وسلو” سره پیل شوي، چې په راتلونکو ساعتونو کې به پراخ شي.

دغه راز اسرائیلي رسنیو د اسرائیلو د کورني جبهې مرکز د څرګندونو له مخې راپور ورکړی، چې د ډرون له شکمن نفوذ وروسته د ګولان په لوړو کې د خطر زنګونه اورېدل شوي.