سرچینې آریانا نیوز ته ويلي، چې د کندهار ولایت په سپین بولدک ولسوالۍ کې د پاکستاني پوځ په برید کې پېنځه ملکي وګړي وژل شوي او پېنځه نور ټپیان دي.

دا برید د افغانستان او پاکستان ترمنځ په سعودي کې د سولې د خبرو اترو له نوي پړاو څخه دوه ورځې وروسته رامنځته شو، چې دواړه خواوو د اوربند پر دوام هوکړې وکړې.

په سعودي عربستان کې وروستۍ خبرې اترې د قطر، ترکیې او سعودي عربستان له‌خوا په اوکټوبر کې د ډیورنډ کرښې ته نږدې له مرګونو نښتو وروسته د تاوتریخوالي کمولو په موخه د ترسره شویو غونډو په لړ کې وروستۍ وې. د اوکټوبر په نښتو کې لسګونه کسان ووژل شول.

اسلام‌آباد ادعا کوي، چې په افغانستان کې میشتو وسلوالو په پاکستان کې وروستي بریدونه ترسره کړي دي.

کابل دا تور ردوي او وايي، چې د پاکستان دننه د امنیت د تامین مسوولیت نشي اخیستلی.

د اسلامي امارت ویاند ذبیح الله مجاهد د پاکستاني وروستیو بریدونو په اړه ویلي، چې افغان ځواکونو د دې بریدونو ځواب ورکړی دی.

د افغانستان اسلامي امارت یو ځل بیا له پاکستان سره د سوداګریزو لارو د بیا پرانیستلو په اړه خپل رسمي دریځ څرګند کړ او وایي، چې دا لارې به یوازې هغه وخت پرانیستل شي، چې اسلام‌آباد د سیاسي او اقتصادي فشار د نه‌کارولو په اړه قوي تضمین وړاندې کړي.

د اسلامي امارت ویاند ذبیح الله مجاهد تازه ټینګار کړی؛ د افغانستان او پاکستان ترمنځ سوداګریزې او ټرانزیټي لارې پاکستان د سیاسي او اقتصادي فشار لپاره غیرقانوني وتړلې، چې “د دواړو خواوو خلکو ته یې پوره زیانونه واړول.”

ذبیح الله مجاهد زیاته کړې: ” دا، چې افغانستان خپلې اساسي اړتیاوې له ډېرو نورو هېوادونو څخه ترلاسه کوي؛ نو اسلامي امارت پرېکړه کړې، چې د سوداګرۍ او ټرانزیټ د پراختیا او د دواړو خواوو د خلکو د هوساینې او د باعزته سوداګرۍ د ترسره کولو لپاره به له پاکستان سره سوداګریزې لارې یوازې هغه وخت پرانیستل شي، چې د پاکستان حکومت بشپړ ډاډ وړاندې کړي.”

نوموړی وایي، چې دا ډاډ او تضمین دې په راتلونکي کې د سیاسي او اقتصادي فشار د وسیلې په توګه د دغو دروازو د کارولو مخه ونیسي؛ ځکه سوداګري د پاکستان او افغانستان د خلکو مشروع حق دی او باید  زیانمنه نشي.

د اسلامي امارت ویاند ټینګار کړی، چې د دې پرېکړې بنسټیزه موخه د سوداګرو د حقونو ساتنه، د ټرانزیټي لارو ثبات او د خلکو له اقتصادي اړتیاوو سره د سیاسي کړنې مخنیوی دی.

ویل کیږي، چې د دې لارو د بیا پرانستلو لپاره هر ګام باید د متقابل احترام او تلپاتې همکارۍ پر بنسټ پورته شي.

د پاکستانيو رسنیو د راپورونو له مخې؛ د پاکستان حکومت له نږدې دوه میاشتو راپدېخوا په تورخم، غلام خان، خرلاچي، انګور اډې او چمن دروازو کې د صادراتو، وارداتو او افغان ټرانزیټي توکو د ټولو ګمرکي عملیاتو له ځنډ وروسته افغانستان ته د ملګرو ملتونو د بشري مرستو لېږد بهیر ته اجازه ورکړه.

اوس د عوایدو فډرالي ادارې (FBR) او د ټرانزیټ عمومي ریاست ته یو رسمي لیک لېږل شوی، چې د ملګرو ملتونو درې ادارو؛ د خوړو نړیوال پروګرام (WFP)، یونیسف او د ملګرو ملتونو د وګړو صندوق (UNFPA) اړوند توکو ته د چمن او تورخم له لارې د تګ راتګ اجازه ورکوي.

په لومړي پړاو کې د خوراکي توکو، روغتیایي تجهیزاتو او د ماشومانو د ملاتړ توکو ټولټال ۱۴۳ کانټینرونه به ولېږدول شي:

د خوړو ۶۷ کانټینرونه (WFP)

د ماشومانو اړوند تجهیزاتو او مرستې ۷۴ کانټینرونهUNICEF) ) او

د روغتیا او کورنۍ خدماتو ۲ کانټینرونهUNFPA) ).

چارواکو ویلي، چې دا پرېکړه د پاکستان بهرنیو چارو وزارت په اسلام‌آباد کې د ملګرو ملتونو د استوګنې له همغږي کوونکي سره ونیول شوه.

د سپارښتنې له مخې؛ د لېږد بهیر به په درې پړاوونو کې ترسره شي: لومړی خواړه، بیا درمل او طبي تجهیزات او ورپسې د تعلیمي خدماتو لپاره اړین توکي.

اوسمهال شاوخوا ۴۹۵ باري لارۍ په چمن او تورخم کې د تېرېدو پر تمه ولاړې دي، چې ۴۱۲ لارۍ په چمن او ۸۳ نورې په تورخم کې بندې دي.

پاکستانيو چارواکو ټینګار کړی؛ د دروازو پړاویزه خلاصېدا به یوازې د بشري توکي لپاره وي، چې د عادي سوداګرۍ د بیا پیل معنا نلري.

پاکستان په ۲۰۲۴-۲۰۲۵ مالي کال کې د ټرانزیټ له لارې له ۱.۰۱۲ میلیارډ ډالرو څخه ډېر صادرات ثبت کړي، چې ۴۲ زره ۹۵۹ کانټینرونه رانغاړي.