د ایران نیمه رسمي خبري آژانس مهر نن ( یکشنبه د وري دیالسمه ) خبر ورکړ، چې د اسرائیلو په یوه هوايي برید کې د سپاه پاسداران یو پوځي سلاکار دمشق ته نږدې له ټپونو ساه ورکړه.

د مهر د څرګندونو له مخې؛ د جمعې پر ورځ سهار مهال مقداد مقداني د اسرائیلو په برید کې ټپي شو او د سپاه پاسداران یو بل افسر وژل شوی و.

د سوریې د بشري حقونو د څار ډلې ويلي: د جمعې د ورځې په شپږم هوايي برید کې، چې تېره اوونۍ ترسره شوی و؛ د سپاه پاسداران یو بل سلاکار میلاد حیدري او یو بل پوځي افسر هم وژل شوی دی.

د سوریې پوځ د یکشنبې پر ورځ څرګنده کړه، چې نن سهار اسرائیلو د حمص ولایت په څنډو کې یو شمېر سیمې بمبارد کړې؛ خو لویدیځو استخباراتي سرچینو ویلي؛ په دې هوایي برید کې هغه اډې وویشتل شوې، چې ایراني پوځیان په کې دي.

د دغه برید د تلفاتو او زیانونو جزئیات خپاره شوي ندي.

اسراییل له کلونو راپدیخوا په سوریه کې له ایران سره پر تړلیو اهدافو بریدونه کوي؛ ځکه، چې له ۲۰۱۱ ږ. کال راپدیخوا د سوریې په کورنۍ جګړه کې د تهران نفوذ وده کړې ده.

ایران وايي؛ په سوریه کې د دمشق پر بلنه د دوی افسران د سلاکارانو په توګه دنده ترسره کوي.

په سوریه کې د جګړې پر مهال د دې ادارې د لوړ پوړیو افسرانو په ګډون د سپاه پاسداران انقلاب لسګونه غړي وژل شوي دي.

سپاه پاسداران د جمعې پر ورځ ویلي، چې د اسرائیلو بریدونه به بې ځوابه پاتې نه‌شي.

د پاکستان پولیسو په ډاګه کړی، چې د جمعې پر ورځ په کراچۍ ښار کې د مرستو د وېش پر مهال د ګڼه ګوڼې له کبله لږ تر لږه ۱۱ کسان مړه شوي دي.

د پولیسو یوه جګپوړي افسر، فدا جانواري ویلي؛ د کراچۍ د لویدیځ د بالدیه په اړوند سیمه کې هغه مهال  ټېل ماټېل رامنځته شو، چې یوې کارخونې اړمنو میرمنو او ماشومانو ته د مرستو د وېش بهیر پیل کړ.

هغه د فرانسې خبري سرچینې ته ویلي: هلته وحشت رامنځته شو او خلکو ورمنډه کړه.

د یوه ځايي چارواکي د څرګندونو له مخې؛ په یوه کوچني صنعتي کمپلکس کې له ۶۰۰ تر ۷۰۰ کسان بند پاتې ول.

٢٢ کلنه فاطمه نور، چې خور يې په دې پېښه کې مړه شوې وایي: کله، چې اصلي دروازه خلاصه شوه، ټول خلک دننه ورغلل.

۳۰ کلنې اسما احمد ویلي، چې په مړو شویو کې یې لمسی او وراره هم شته.

هغې ويلي: مونږ هر کال کارخونې ته د زکات د ترلاسه کولو لپاره راځو.

اسما زیاته کړې: هغو ښځې وهلې او څارلې. ګډوډي رامنځته شوه. که دوی مدیریت نشو کولی؛ ولې یې مونږ ته بلنه راکړه؟!

پولیسو اعلان کړی، چې د کارخونې درې کارکوونکي د دې مراسمو په اړه د معلوماتو د نه وړاندې کولو پر تور نیول شوي دي.

 سعودي عربستان د چارشنبې پر ورځ ( د وري ۹) له شانګهای هېوادونو سره د یوځای کیدو پرېکړه په داسې حال کې کړې، چې ریاض له چین سره اوږد مهاله اړیکو ته دانګلي دي.

د عربستان رسمي رسنۍ واس څرګنده کړې، چې د دولت کابینې یو هوکړه لیک لاسلیک کړ، چې دې شاهي هېواد ته په شانګهای همکاریو ټولنه کې د خبرو ونډه وربښي.

د شانګهای همکاریو ټولنه یو سیاسي او امنیتي بنسټ‌ دی، چې په ۲۰۰۱ ز. کال کې د چین، روسیې او د منځنۍ آسیا هېوادونو لخوا رامنځ ته شو او وروسته بیا هند او پاکستان هم په کې ننوتل.

د دې ټولنې د جوړېدو هدف په سیمه کې د لویدیځ له نفوذ سره د تعادل رامنځته کول دي.

ایران هم تېر کال په دې ټولنه کې د غړیتوب سند لاسلیک کړ.

دې ټولنې په نږدې راتلونکي کې د تروریزم پر ضد د ګډو روزنیزو هڅو د پیلولو پرېکړه کړې، چې امریکا یې له امنیتي اندېښنو سره مخ کړې ده.