د کانونو او پټرولیم وزارت چارسمبالي(سرپرست) په تهران کې د “ایران د کانونو نړیوال نندارتون” د پرانیستې په مراسمو کې ویلي، چې افغانستان اوسمهال باثباته دی او په هېواد کې د پانګونې لپاره مناسب فرصتونه برابر شوي دي.

د کانونو او پټرولیم وزارت چارسمبالي هدایت الله بدري زیاته کړې، چې اسلامي امارت غواړي د افغانستان د کانونو په استخراج کې د ګاونډ هېوادونو له تجربو څخه اغېزمنه ګټه پورته کړي.

هدایت الله بدري د نندارتون د بېلابېلو برخو او د لیټیم پروسس کولو فابریکې پر لیدلو سربیره د ایران له خصوصي سکټور څخه هم وغوښتل، چې په افغانستان کې پانګونه وکړي.

بدري د ایران د کانونو، صنایعو او سوداګرۍ له وزیر سره هم وکتل او پر اړوند برخو یې خبرې وکړې. دا بحث پر سروې، پراختیا او لابراتواري تدارکاتو راوڅرخېده او په اړه یې د تهران او کابل ترمنځ پخوانی تړون و.

دغه راز د هېواد د کانونو او پټرولیم وزارت ویلي، چې بالاخره د دې تړون عملي کار پیل کولو لپاره دوه تخنیکي کمیټې جوړې شوې دي.

د اقتصاد وزارت ویلي، چې کابل غواړي له تهران سره اقتصادي او سوداګریزې اړیکې پیاوړې کړي او دا به دواړو هېوادونو ته ګټه ورسوي.

د دې وزارت مسلکي مرستیال زیاته کړې، چې ایراني پانګوال په افغانستان کې د کانونو، ټرانسپورټ، انرژۍ او بېخبناوو په اړوند برخو کې پانګونې ته لېواله دي.

عبداللطیف نظري وایي: “ایراني پانګوال په افغانستان کې د کانونو، ټرانسپورټ، انرژۍ او بېخبنايي سکټورونو کې پانګونې ته لېوالتیا لري او اسلامي امارت په افغانستان کې له ایراني پانګوالو هرکلی کوي.”

د یادونې ده، چې اقتصادي کارپوهان ایران د افغانستان یو ښه اقتصادي او سوداګریز شریک ګڼي او ټینګار کوي، چې له هغه هېواد سره د اړیکو پراختیا کولی شي د کابل او تهران اقتصاد او سوداګرۍ ته ګټه ورسوي.

د افغانستان بهرنیو چارو وزارت مالي او اداري مرستیال محمد نعیم ويلي، چې افغانستان د مرکزي او جنوبي آسیا ترمنځ د طبیعي پل په توګه کار کوي او چمتو دی، چې په سیمه‌ییزو او نړیوالو نوښتونو کې فعاله او رغنده برخه ولري.

هغه د ​​ازبکستان په ترمذ خبرو کې د وینا پرمهال د سیمه‌ییزې سولې، همکارۍ او پرمختګ لپاره د افغانستان پر ژمنتیا ټینګار وکړ.

نعیم په خپلو څرګندونو کې د ازبکستان له حکومت څخه د “سولې، دوستۍ او سوکالۍ لپاره د ګډې فضا رامنځته کول” تر سرلیک لاندې د دغو سیمه‌ییزو خبرو له کوربتوب څخه د زړه له کومې مننه وکړه.

هغه له ازبکستان څخه د نږدې ګاونډي او سټراټیژیک ملګري په توګه هم ستاینه وکړه او په وروستیو کلونو کې یې د دوه اړخیزو اړیکو پر بې سارې پراختیا اعتراف وکړ.

هغه وایي، چې سیمه‌ییزه همکاري نه یوازې د ښکېلو هېوادونو د ګټې لپاره ښه ده، بلکې د نړیوالې سولې او ثبات لپاره هم اړینه ده. افغانستان غواړي، چې په اقتصادي ادغام او سیمه‌ییز اتصال کې یو باوري ملګری پاتې شي.

محمد نعیم د افغانستان او ازبکستان ترمنځ د شته ګډو طرحو د یادونې په ګډون د افغان- ټرانس اوسپنې‌پټلۍ جوړول یوه اړینه پروژه یاده کړه، چې موخه یې د مرکزي او سویلي آسیا ترمنځ د اتصال زیاتوالی دی.

هغه له سرخان دریا څخه تر پلخمري پورې د ۵۰۰ کیلو ولټه برښنا مزي لېږد ته هم نغوته(اشاره) وکړه، چې تمه ده ورسره برښنا ته د افغانستان لاسرسی د پام وړ زیات شي.

سربېره پردې هغه د عصري ټکنالوژیو پر کارولو د ګډو کرنیزو پروژو یادونه وکړه او د دواړو هېوادونو ترمنځ یې د ۲.۵ میلیارډ ډالرو پر ارزښت د انرژۍ، کرنې او صنعت په سکټورونو کې د تړونونو پر لاسلیک ټینګار وکړ.

هغه ټینګار وکړ، چې دا بدلونونه د دوامداره پرمختګ او سیمه‌ییز ثبات لپاره د دواړو هېوادونو ګډې ژمنې ښیي.

هغه د اسلامي امارت بهرنۍ پالیسي یو ځل بیا تائید کړه، چې په اقتصادي همکارۍ، سیمه‌ییزې ښکېلتیا او متقابل درناوي ولاړه ده.

هغه ټینګار وکړ، چې د افغانستان خاوره به د بل هېواد پر ضد ونه کارول شي او په دې اړه به د متقابل چلند غوښتنه وکړي.

د بهرنیو چارو وزارت مرستیال د بېخبناوو، ټرانسپورټ، انرژۍ، سوداګرۍ، تعلیم، اقلیمي بدلون او دوامداره پراختیا په اړه په سیمه‌ییزو نوښتونو کې د فعال ګډون لپاره د افغانستان چمتووالی څرګند کړ.

هغه ټینګار وکړ، چې متوازن سیمه‌ییز پرمختګ، خبرې اترې، همغږي او باور جوړونه د معنا لرونکي او دوامداره پرمختګ بنسټونه دي.

نعیم له نړیوالې ټولنې، سیمه‌ییزو حکومتونو، نړیوالو بنسټونو او مالي ادارو څخه وغوښتل، چې افغانستان د یو باوري ملګري په توګه وپېژني او په بېخبناوو، ظرفیت جوړونې او اقتصادي پراختیا کې د پانګونې له لارې د دې هېواد ملاتړ وکړي.

نوموړي په پای کې له ترمذ ډیالوګ څخه د افغانستان پر کلک ملاتړ ټینګار وکړ او هغه یې د نظرونو د تبادلې، متقابلې همغږۍ د ودې او عملي همکارۍ رامنځته کولو لپاره د یو اړین بنسټ په توګه وستایه.

نعیم څرګنده کړې: “مونږ د دې خبرو پایلو ته د زړه له کومي سترګې پر لار یوو، چې زمونږ سیمې او خلکو ته د روښانه او پوره سوکاله راتلونکي لپاره لار اواره کړي.”

د افغانستان  اسلامي امارت د بهرنیو چارو وزارت چارسمبالی امیر خان متقي نن دوشنبه د یوه پلاوي پر مشرۍ چین ته رسیدلی دی.

د بهرنیو چارو وزارت ويلي، چې د صنعت او سوداګرۍ وزارت مرستیال  احمدالله زاهد هم په دې پلاوي کې دی.

تمه ده، چې امیر خان متقي به د خپل چینایي سیال وانګ يي سره د دوه اړخیزو سیاسي، اقتصادي او سوداګریزو اړیکو په اړه خبرې وکړي.

هغه به د چین او پاکستان د بهرنیو چارو وزیرانو سره په ګډه غونډه کې هم ګډون وکړي.