د ملګرو ملتونو د بشري مرستو د همغږۍ دفتر د دوشنبې پر ورځ په ډاګه کړې؛ ملګرو ملتونو او بشري ادارو د ۲۰۲۳ ز. کال لپاره افغانستان ته د بشري مرستو د رسولو بودجه ۳ اعشاریه ۲ میلیارد دالرو ته راټیټه کړه، چې د تېر کال پر پرتله ۴ اعشاریه ۶ میلیارد دالره کمه شوې ده.

رویترز راپور ورکړی، چې د ملګرو ملتونو د بشري چارو د همغږۍ دفتر څرګنده کړې؛ د افغانستان اسلامي امارت د ښځینه مرستندویه کارکوونکیو د محدودیتونو په پایله کې “د عملیاتي شرایطو بدلون” د بیاکتنې له پلان سره مرسته کړې.

اسلامي امارت افغان میرمنې د انجو ګانو او ملګرو ملتونو په دفترونو کې له کار کولو منع کړې دي.

مرستندویه ادارو خبرداری ورکړی، چې دا کار به د مرستو رسولو بهیر نور هم اغېز من کړي.

په اعلامیه کې ویل شوي، چې افغانستان اوس هم د نړۍ تر ټولو ناوړه بشري ناورین دی، چې دوه پر درېیمه برخه وګړي یې بشري مرستو ته اړتیا لري.

ځینو بشري چارواکو او ډیپلوماتانو خبرداری ورکړی چې د نړیوال بحران او اقتصادي لومړیتوبونو د ارزونې لپاره د ښځینه کارکونکو او تمویل کونکو حکومتونو په اړه د IEA محدودیتونو له امله افغانستان ته د تمویل احتمالي کمښت خبرداری ورکړی.

اوس هم څرګنده نه‌ده، چې د تعدیل شوې بودجې څومره برخه به د بهرنیو تمویلونکیو لخوا تمویل شي.

په ۲۰۲۲ کې د افغانستان لپاره نړیواله بشردوستانه غوښتنه ۴.۴ میلیارد دالره وه، چې شاوخوا ۳ اعشاریه ۲ میلیارد دالر یې ترلاسه کړل.

د دغې ټولنې د څرګندونونو له مخې؛ له تېر کال راپدیخوا د اړمنو کسانو شمېر ډېر شوی دی.

د ملګرو ملتونو پراختیايي ادارې د اپریل په میاشت کې وړاندویېنه کړې وه، چې که په مرستو کې ۳۰ سلنه کموالی راشي؛ نو د افغانستان اقتصاد به له سقوط سره مخ او انفلاسیون به لوړ شي.

د بدخشان سیمه ییز چارواکي تائیدوي، چې نن سهار (د غبرګولي ۱۶ ) په فیض‌آباد ښار کې د موټر بم چاودنې له کبله د دغه ولایت د مرستیال والي نثار احمد احمدي په ګډون دوه کسان وژل شوي دي.

دغه چاودنه نن سهار شاوخوا اته بجې د فيض‌آباد ښار د محکمې په څلور لارې کې رامنځته شوې ده.

د بدخشان د اطلاعاتو او فرهنګ رییس معزالدین احمدي ويلي، چاودنه د بدخشان ولایت د مرستیال او سرپرست مولوي نثار احمد احمدي پر موټر شوې ده.

نوموړی وايي، چې په دې برید کې شپږ کسان نور ټپیان شوي دي.

هغه زياته کړې، چې ټپيان ولايتي روغتون ته لېږدول شوي او په‌دې اړه کشفي او استخباراتي ارګانونو له لوري نورې پلټنې روانې دي.

تر اوسه کوم کس یا ډلې د دغه برید پړه پر غاړه نه‌ده اخیستې.

عيني شاهدانو ويلي، چې په دې موټر بم چاودنه کې مرستيال والي او د هغه موټر چلوونکى وژل شوي او يو شمېر نور ملکي وګړي ټپيان دي.

له‌دې مخکې هم د دغه ولايت امنيه قومندان او د کانونو رييس په ورته چاودنو کې وژل شوي وه.

نثار احمد احمدي د اسلامي امارت له رامنځته کېدو راپدیخوا د بدخشان والي د مرستیال په توګه کار کاوه او په دې وروستیو کې د والي د نشتوالي له کبله د دغه ولایت د سرپرست دنده هم ور پر غاړه وه.

د سرپل پولیسو د دوشنبې پر ورځ څرګنده کړه، چې شاوخوا ۶۰ نجونې د دې ولایت په یوه ښوونځي کې له مسمومیدو وروسته روغتون ته لېږدول شوې دي.

د سرپل د پوليسو وياند دين محمد نظري ويلي: د سانچارک ولسوالۍ د نجونو يوه ښوونځي ته ناڅرګند ننوتلي او ټولګي يې مسموم کړي دي. کله، چې نجونې ټولګيو ته ننوتې؛ ټولې مسمومې شوې.

نوموړي په دې اړه نور جزئيات ورنه‌کړل، چې په دې پېښه کې کوم مواد کارول شوي او په کې د چا لاس دی.

نظري ويلي، چې دغه نجونې روغتون ته لېږدول شوې؛ خو روغتيايي حالت يې ښه دى.

ویل کیږي، چې د دې پېښې په تړاو تر دې دمه څوک نیول شوي نه‌دي.