له ګوزڼ یا پولیو څخه د پاک افغانستان بنسټ په هېواد کې د ګوزڼ واکسین کمپاین له پیل خبر ورکړ.

دې بنسټ د یکشنبې پر ورځ( د وري یودېرشمه) په ایکس پاڼه کې ولیکل، چې دا کمپاین به سبا دوشنبه پیل شي.

دې بنسټ له کورنیو غوښتي، چې خپل پېنځه کلن او له کلونو ټیټ عمره ماشومان د ګوزڼ پر وړاندې واکسین کړي.

له ګوزڼ څخه د پاک افغانستان بنسټ دا ندي ویلي، چې کمپاین به څو ورځې او په کومو ولایتونو کې ترسره شي.

افغانستان او پاکستان یوازني هېوادونه دي، چې ګوزڼ یا پولیو په کې تر اوسه له منځه نده وړل شوې.

د یادونې ده، چې د پولیو لومړۍ مثبته پېښه په ۲۰۲۵ کال کې له بادغیس ولایت څخه ثبت شوې ده.

د بهرنیو چارو وزارت چارسمبالي(سرپرست) امیر خان متقي په کابل کې له خپل پاکستاني سیال اسحاق ډار سره په لیدنه کې له دغه هېواده وغوښتل، چې د افغان کډوالو له حقونو څخه د سرغړونې مخه ونیسي.

د افغانستان بهرنیو چارو وزارت د خبرپاڼې له مخې؛ په دې کتنه کې، چې د شنبې پر ورځ د وري دېرشمه) په کابل کې ترسره شوه؛ دواړو خواوو د کډوالو، سیاست، اقتصاد، سوداګرۍ، ټرانزیټ او لویو ګډو پروژو په ګډون پر بېلابېلو موضوعاتو بحث او نظرونه تبادله کړل.

امیر خان متقي د افغانستان او نړۍ د هېوادونو په ځانګړي توګه د پاکستان ترمنځ د متقابل درناوي پر بنسټ د مثبتو اړیکو ساتلو پر اړتیا ټینګار وکړ او څرګندوي؛ اسلامي امارت یوه متوازنه پالیسي غوره کړې، چې د پاکستان په ګډون له ګاونډ هېوادونو سره د همکارۍ په پراختیا کې مرسته کوي.

متقي په افغانستان کې د وروستیو پرمختګونو او په بېلابېلو سکټورونو کې د پرمختګ لپاره د شته فرصتونو په اړه هم خبرې وکړې او وایي، چې افغانستان له پاکستان سره د سوداګرۍ، ټرانزیټ او ګډو پروژو پراخولو ته لیواله دی.

هغه همدارنګه د پاکستان له چارواکو وغوښتل، چې په دې برخو کې د موجوده ستونزو د حل لپاره اغېزمنې هڅې وکړي او د نورو ډېرو همکاریو لپاره اړینې اسانتیاوې برابرې کړي.

د بهرنیو چارو چارسمبالي امیر خان متقي په پاکستان کې د افغان کډوالو د وضعیت په اړه خپله ژوره اندېښنه هم څرګنده کړه او د پاکستان له چارواکو یې وغوښتل، چې د افغان کډوالو له حقونو څخه د سرغړونې مخه ونیسي.

دغه راز د پاکستان بهرنیو چارو وزیر محمد اسحاق ډار افغانستان ته د خپل سفر په اړه خوښي څرګنده کړه او وایي، چې دا سفر کولی شي د اړیکو په ښه کولو او د دوه اړخیزو همکاریو پراخولو کې مرسته وکړي.

هغه متقي ته هم بلنه ورکړه، چې پاکستان ته سفر وکړي.

ډار دا هم ویلي، چې د دوه اړخیزې سوداګرۍ د اسانتیا لپاره به پر ډېری سوداګریزو توکو تعرفې کمې شي او د سوداګریزو توکو د لېږد په برخه کې به اغېزمن ګامونه هم پورته شي.

هغه همدارنګه ټینګار وکړ، چې د پاکستان حکومت له افغانستان سره د سوداګرۍ او ټرانزیټ پراختیا ته ژمن دی او د دې هدف لپاره به اړینې اسانتیاوې برابرې کړي.

د دغو خبرو په بهیر کې دواړو خواوو د ډیپلوماټیکو اړیکو د پیاوړتیا، ګډې همکارۍ، د ویزو د صادرولو د زیاتوالي، د کرنیزو محصولاتو د چټک لېږد، د سوداګرۍ ودې او د افغان – ټرانس اوسپنې‌پټلۍ، کاسا ۱۰۰۰ برښنا، ټاپي ګاز او ټاپي برښنا ته ورته پروژو پر اړتیا هم خبرې وکړې.

دغه راز پرېکړه وشوه، چې د راپورته شویو مسلو او موجوده ستونزو د حل لپاره به ګډې کمیټې جوړې شي.

د روسیې د تاس خبري خبري سرچینې د راپور له مخې؛ سرګي ناریشکین ویلي، چې لویدیځ هېوادونه د افغانستان د ناامنه کولو له لارې هڅه کوي، چې دا هېواد د بې‌ثباتۍ په حالت کې ساتي.

د روسیې بهرنیو استخباراتو مشر سرګي ناریشکین وايي، لویدیځ هېوادونه هڅه کوي، چې په افغانستان کې د رژیم له ضد ډلو ملاتړ وکړي.

د روسیې تاس خبري سرچینې د ناریشکین د څرګندونو له مخې راپور ورکړی، چې لویدیځ هېوادونه افغانستان د ناامنه کولو له لارې په بې ثباته حالت کې ساتي.

د روسیې د بهرنیو استخباراتو د مشر د څرګندونو له مخې؛ لویدیځ هېوادونه د خپلو جیوپولیتیک ګټو د پرمختګ لپاره په افغانستان کې د بې ثباتۍ د ساتلو په لټه کې دي.

 د دې راپور پر بنسټ؛ خو، هغه د “دولت جوړونې” پر لوري د اسلامي امارت فعالیتونه مثبت وارزول او ډاډ یې ورکړ، چې د چارسمبالي(سرپرست) حکومت نړیواله پېژندنه “لازمي” ده.

د روسیې د بهرنیو استخباراتو د څانګې رییس سرګی ناریشکین وایي: ” دا لویدیځ دی، چې د افغانستان شتمنۍ کنګلوي او د کابل پر وړاندې بندیزونه ساتي. دا په داسې حال کې ده، چې لویدیځې استخباراتي ادارې په دې هېواد کې د حکومت ضد ځواکونو د ملاتړ لپاره لارې چارې لټوي.”

هغه له مسکو سره د کابل د اړیکو د مثبت  بهیر په اړه هم راپور ورکړ او څرګندوي، چې روسیه د منع شویو ډلو له نوملړ څخه د اسلامي امارت د لرې کولو پروسه پیلوي.

دا په داسې حال کې ده، چې روسیې په دې وروستیو کې د مسکو د منع شویو ډلو له نوملړ څخه د اسلامي امارت نوم لرې کړی دی.

د تاس پر خبرو سربېره ځینو نورو روسي رسنیو راپور ورکړی، چې سرګي ناریشکین په باکو کې د “افغانستان: سیمه‌ییز اتصال، امنیت او پراختیا” تر سرلیک لاندې په یوه غونډه کې د آذربایجان او د سیمې د نورو هېوادونو د استخباراتو او امنیتي خدماتو له چارواکو سره خبرې اترې وکړې.

د دغو راپورونو پر بنسټ هغه ټینګار وکړ، چې افغانستان “په جیوپولټیک کې مهم ځای لري او په افغانستان کې د بیارغونې او سوکالۍ هڅول د سیمې د هېوادونو ګډه ګټه ده.”