د ایران ولسمشر ابراهیم رییسي د یکشنبې پر ورځ له خپل اصلي دښمن اسرائیلو سره د اړیکو د عادي کولو لپاره د سیمې د هېوادونو هر راز هڅې ارتجاعي وګڼلې او هغه یې وغندلې.

د فرانسې خبري سرچینې د راپور له مخې؛ دا څرګندونې په داسې حال کې رامنځته کیږي، چې د امریکا پر منځګړیتوب د اسرائیلو او سعودي عربستان ترمنځ د رسمي اړیکو د ټینګولو لپاره خبرې اترې روانې دي. امریکا د جمعې پر ورځ ویلي، چې دواړه هېوادونه د یوې هوکړې پر لوري روان دي.

رییسي په تهران کې د اسلامي نړۍ په نړیوال کنفرانس کې د وینا پر مهال څرګنده کړې؛ له صهیونیستي رژیم سره د اړیکو عادي کول د اسلامي نړۍ د دې دواړو دولتونو له‌خوا یو غبرګوني او ارتجاعي کړنه ده.

تمه ده، چې د یکشنبې پر ورځ یو اسرائیلي پلاوی سعودي عربستان ته په داسې حال کې سفر وکړي، چې  څو ورځې مخکې د اسرائیلو یو وزیر سعودي عربستان ته رسمي سفر کړی دی.

سعودي عربستان هم په درې لسیزو کې د لومړي ځل لپاره د چارشنبې پر ورځ یو پلاوی اشغال شوي لویدیځې غاړې ته واستاوه، چې د احتمالي هوکړې څخه مخکې فلسطینیانو ته ډاډ ورکړي.

رییسي د یکشنبې پر ورځ د اړیکو د نورمال کولو هر ډول هڅه د بهرنیانو هیله وبلله او څرګندوي، چې اسرائیلو ته غاړه ایښودل او جوړجاړی مو په لومړیتوب کې ځای نه‌لري.

هغه ویلي: په اشغال شوې خاوره او اسلامي نړۍ کې د ټولو جنګیالیو لپاره د حل یوازنۍ لار دا ده، چې مقاومت وکړي او د دښمنانو پر وړاندې ودریږي. هغه د ایران پر دریځ ټینګار وکړ، چې بیت المقدس باید آزاد شي.

په  ۱۹۶۷ ز. کال کې اسرائیلو ختیځ بیت المقدس اشغال کړ او بیا یې سره یوځای کړل، چې فلسطینیان یې د خپل وړاندیز شوي راتلونکي دولت پلازمېنه بولي.

د اسرائیلو او سعودي عربستان ترمنځ هوکړه به د امریکا پر منځګړیتوب د ابراهام تړون څاري، چې له مخې یې اسرائیلو په ۲۰۲۰ کې له درې عربي هېوادونو سره دیپلوماتیکې اړیکې رامنځته کړې.

رییسي تېره میاشت د ملګرو ملتو د عمومي غونډې په څنډه کې ویلي؛ د سیمې د هېوادونو او صهیونیستي رژیم ترمنځ هر راز اړیکې به د فلسطینیانو پر څټ د چړې ګوزار وي.

پر ایران د شیعه او پر سعودي عربستان د سنيانو حکومتونه هغه دوه سیمه‌ییز ځواکونه دي، چې د چین پر منځګړیتوب یې له ۲۰۱۶ راپدیخوا پرې شوې اړیکې بیا ټینګې شوې.

د شنبې پر ورځ د پاکستان په یوه جومات کې د یوې زورورې چاودنې له کبله د وژل شویو کسانو شمېر ۵۹ ته ورسېد او حکومت د چاودنې پړه د هند پر استخباراتي ادارې اچولې ده.

د رویترز خبري اژانس د راپور له مخې؛ چاودنه د جمعې پر ورځ د بلوچستان ایالت د مستونګ ښار په یوه جومات کې د پولیسو موټر ته نږدې په هغه سیمه کې رامنځته شوې، چې خلک د اسلام د ستر پیغمبر حضرت محمد ^ص د میلاد د نمانځلو لپاره راټول شوي وه.

پاکستانيو چارواکو پرله‌پسې پر هند تور لګولی، چې په پاکستان کې له تاوتریخوالي ملاتړ کوي؛ خو هند تل دا ادعاوې رد کړې دي.

د پاکستان د کورنیو چارو لنډمهالي وزیر سرفراز بګتي د بلوچستان په مرکز کوټه کې رسنیو ته ویلي، ملکي ادارې، پوځي او نورې ټولې ادارې به پر ګډه د مستونګ په ځانمرګي برید کې د ښکېلو عناصرو پر ضد عملیات وکړي.

ده ويلي: په دغه ځانمرګي بريد کې د هند استخباراتي ادارې لاس درلود.

هغه د خپلې دې ادعا جزئیات او شواهد وړاندې نه‌کړل.

د بلوچستان ایالت د روغتیا ریاست ویاند وسیم بیګ ویلي، د جمعې له ورځې راپدیخوا په روغتون کې اووه نور کسان هم مړه شوي، چې ورسره د مړینې شمېر لوړ شوی او د نورو ټپیانو حالت هم د اندېښنې وړ دی.

د جمعې پر ورځ د خیبر پښتونخوا په شمال کې پر یوه جومات دوه‌یم برید لږ تر لږه پېنځه کسان ووژل. پولیسو د شنبې پر ورځ وویل چې دوی د ځانمرګي DNA د تحلیل لپاره لېږلې ده.

تر اوسه کومې ډلې د دغو بریدونو مسوولیت نه‌دی منلی.

د پاکستان په لویدیځو ایالتونو کې د وسله‌والو بریدونو زیاتوالي د جنورۍ د میاشتې پر عامو انتخاباتو چمتووالي سیوری اچولی؛ خو تر اوسه دغو بریدونو زیاتره امنیتي ځواکونه پر نښه کړي دي.

تحریک طالبان پاکستان، چې په ۲۰۰۷ ز.کال کې له رامنځته کېدو راپدیخوا په پاکستان کې د یو شمېر خونړیو بریدونو مسوولیت پر غاړه اخیستی؛ د جمعې د ورځې د چاودنو مسوولیت نه‌دی منلی.

رویترز خبري اژانس راپور ورکړی، چې امریکا له جنوبي کوریا څخه قطر ته د ایران د ۶ میلیارد دالرو  د لېږد بندیزونه لرې کړل.

د امریکا د بهرنیو چارو وزیر انتوني بلینکن څرګنده کړې، چې د دې بندیزونو بښل د امریکا د ملي امنیت پر ګټه دی.

په هغو اسنادو کې، چې د امریکا د کانګریس اړوند کمیتې ته استول شوي؛ د امریکا حکومت د لومړي ځل لپاره پر رسمي بڼه د دې هوکړې پربنسټ په دغه هېواد کې د پېنځه ایرانیانو د خوشې کیدو او په بدل کې د ایران له لوري د نیول شویو امریکايي وګړیو د خوشې کیدو یادونه کړې ده.

په دغه اعلاميه کې ويل شوي: د امريکا حکومت هوکړه کړې، چې په امریکا کې بندي پېنځه ایرانیان راخوشې او د ايران له مالي منابعو څخه شپږ میليارد دالره، چې په جنوبي کوريا کې کنګل شوي وه؛ قطر ته انتقال کړي او په دې توګه د هغو امريکايانو د خلاصون زمينه برابره کړي، چې په ايران کې بنديان دي.

د امریکا له نظره، دا لېږد ایران ته ډېره ګټه نه رسوي؛ ځکه، چې دا یوازې د بشري سوداګرۍ لپاره کارول کیدی شي.

د سپینې ماڼۍ ویاند ادرین واتسون د دوشنبې پر ورځ په یوه اعلامیه کې ویلي، چې د امریکا د بهرنیو چارو وزیر د سپتمبر پر اتمه د دې لېږد اجازه ورکړې وه او رسمي خبرتیا یې هم د دوشنبې پر ورځ د امریکا کانګرس ته واستوله.

د ځینو سرچینو د څرګندونو له مخې؛ قطر ته د ۶ میلیارد دالرو ایراني پیسو لېږد به راتلونکې اوونۍ پیل شي.

د اعلامیې له مخې، د بندیزونو په دې بښنه کې د ایران د تېلو ملي شرکت او د ایران مرکزي بانک او نور مالي بنسټونه شته، چې د کوریا جمهوریت له حسابونو څخه د سویس او جرمني حسابونو ته اړوند کنګل  شوې پیسې لېږدول کیږي او بیا له دې حسابونه قطر ته انتقالیږي.