Connect with us

تازه خبرونه

په هند کې له خپلو قونسلګریو سره اړیکې لرو او ډېر ژر به سفارت بېرته فعال شي – ستانکزی

خپور شوی

د

(Last Updated On: ليندۍ ۸, ۱۴۰۲)

د بهرنیو چارو وزارت سیاسي مرستیال شېرمحمد عباس ستانکزي ويلي، د افغانستان د ممبي او حیدر‌آباد کونسلګرۍ په کابل کې د بهرنیو چارو له وزارت سره اړیکې لري؛ په نوي دیلي کې به د افغانستان سفارت ډېر ژر بېرته فعال شي.

شېر محمد عباس ستانکزي له ملي تلویزیون سره په مرکه کې، چې د سې شنبې پر شپه خپره شوې ویلي: په ممبي او حیدرآباد کې زمونږ قونسلګرۍ فعالې دي؛ د بهرنیو چارو له وزارت سره اړیکې لري او کونسلي خدمتونه هره ورځ وړاندې کیږي. اوس‌مهال په ممبي او حیدرآباد کې زمونږ قونسل شته؛ ما له هغوی سره خبرې وکړې او په دیلي کې هم د دوی سفارت بېرته پرانیستل شوی دی.

شېر محمد عباس ستانکزي ویلي، چې په هند کې د افغانستان سفارت به په راتلونکیو دوه یا درې ورځو کې خپل فعالیتونه او خدمات بیا پیل کړي.

ستانکزي له ملي تلویزیون سره په مرکه کې څرګنده کړې، چې د ده پر اند اسلامي امارت؛ ځکه پر رسمیت پېژندل شوی، چې اوس هم له هغو هېوادونو سره دیپلوماتیکې اړیکې لري، چې پخوا یې درلودې.

هغه وایي، چې په افغانستان کې شاوخوا شل سفارتونه هڅې تر سره کوي.

دا په داسې حال کې ده، چې پېنځه ورځې مخکې په هند کې د افغانستان سفارت اعلان وکړ، چې په نوي دیلي کې یې د هند د حکومت پر وړاندې د پرتو ستونزو له کبله خپل فعالیتونه د تل لپاره ځنډولي دي.

تازه خبرونه

له عربي متحده اماراتو څخه بلخ ولایت ته لومړۍ سوداګریزه الوتنه تر سره شوه

Published

on

(Last Updated On: کب ۴, ۱۴۰۲)

د اسلامي امارت له بیا رامنځته کېدو وروسته د لومړي ځل لپاره له عربي متحده اماراتو څخه د بلخ ولایت هوايي ډګر ته د هوايي دهلیز له لارې الوتنه ترسره شوه.

 د مولانا جلال الدین محمد بلخي هوايي ډګر مسوولینو ویلي، چې د بیات پاور شرکت ۱۶ ټنه برښنایي سوداګریز توکي له دوبۍ څخه مزارشریف ښار ته راولېږدول شول.

په دې اړه د مولانا جلال الدين محمد بلخي هوايي ډګر د ګمرک رييس عبدالله موحد ويلي: دا لومړى ځل دى، چې له دوبۍ څخه مزارشريف ته د هوايي دهلېز له لارې الوتنه کېږي. له سوداګرو سره خبرې اترې روانې دي او مونږ هیله لرو، چې دا دهلیز په راتلونکي کې هم فعال پاتې شي.

د بلخ د سوداګرۍ او پانګونې خونې چارواکي د هوايي دهلېز پر پرانیستلو او د هوا له لارې د سوداګریزو مالونو د لېږد د عمومي بهیر پر پیل ټینګار کوي.

د بلخ د سوداګرۍ او پانګونې خونې مشر اسدالله اسدي څرګنده کړې: د هوايي کارګو له لارې د سوداګريزو مالونو د لېږد په برخه کې ډېرې مهمې ستونزې شته.

دا په داسې حال کې ده، چې له دې مخکې هم د مولانا جلال الدین محمد بلخي هوايي ډګر د هوايي دهلېز له لارې جلغوزي او نور سوداګریز توکي د سیمې هېوادونو ته صادرېدل.

Continue Reading

تازه خبرونه

د اسلامي امارت د غوښتنو له منل‌کېدو پرته به د م.م په غونډو کې ګډون ونه‌کړو- مولوي عبدالکبیر

Published

on

(Last Updated On: کب ۴, ۱۴۰۲)

د ریاست الوزراء سیاسي مرستیال مولوي عبدالکبیر د دوحې په ناسته کې د اسلامي امارت د پلاوي د ګډون په اړه د ملګرو ملتونو وروستۍ پرېکړې ته ګوته ونیوله او هغه یې ناسمه وبلله.

مولوي عبدالکبیر په دې اړه څرګنده کړې؛ که ملګري ملتونه او هېوادونه د اسلامي امارت غوښتنې ومني؛ نو د ملګرو ملتونو او هېوادونو په راتلونکیو غونډو کې به د افغانانو استازیتوب وکړي.

د ارګ په خبرپاڼه کې راغلي، چې تېر ماښام (پنجشنبه د کب درېیمه) په کابل کې د افغانستان اسلامي امارت د رياست الوزراء سياسي مرستيال مولوي عبدالکبیر له سراج الاسلام دارالعلوم څخه د فارغو شویو عالمانو د دستار بندۍ پر مهال ویلي؛ که د اسلامي امارت غوښتنې ومنل شي؛ نو د ملګرو ملتونو او هېوادونو په راتلونکیو غونډو کې به د افغانستان پر استازیتوب ګډون وکړو.

د یادونې ده، چې د دوحې له غونډې مخکې د افغانستان بهرنیو چارو وزارت چارسمبالي له ملګرو ملتونو څخه د خبرو اترو او تعامل لپاره د استازیتوب غوښتنه کړې وه؛ خو د نه منل کېدو پر دلیل بیا اسلامي امارت په دې غونډه کې د نه ګډون پرېګړه وکړه.

Continue Reading

تازه خبرونه

په افغانستان کې د ګډو ګټو لپاره یوه ځواکمنه اجماع رامنځته شوې – ټوماس ویسټ

Published

on

(Last Updated On: کب ۴, ۱۴۰۲)

د افغانستان لپاره د امریکا ځانګړي استازي ټوماس ویسټ د پنجشنبې پر ورځ (د کب درېیمه) په ایکس پاڼه کې لیکلي، چې د فبرورۍ پر اتلسمه او نولسمه د دوحې له تر سره شوي دوه ورځني کنفرانس څخه واشنګټن ته راستون شوی دی.

ټوماس ویسټ د دوحې د غونډې په اړه څرګنده کړې؛ هیڅ هېواد نه غواړي، چې د تروریزم ګواښ له افغانستان څخه راپورته شي او ټول کار او ټولنیز ژوندانه ته د افغان نجونو د راګرځېدا او د منځنيو ښوونځيو، لیسو او پوهنتونونو د پرانیستې غوښتونکي دي.

د افغانستان لپاره د امریکا ځانګړي استازي دا هم ویلي، چې له افغانانو سره د مرستې لپاره کلکې ژمنې شته؛ خو د اقتصادي ثبات او د افغانانو د اقتصادي راتلونکي مالکیت په اړه اندېښنې شته.

ټوماس ویسټ د اسلامي امارت له‌خوا د کوکنارو پر کښت د بندیز د پلي کیدو یادونه هم کړې او وایي، چې ډېرو هېوادونو منلې او د ملګرو ملتونو د اړوندې ادارې د ارزونې له مخې د کوکنارو په کښت کې ۹۵ سلنه کموالی راغلی دی.

دغه راز نوموړي د افغانستان د مدني ټولنې له استازو سره ناستې ته نغوته کړې او ټینګار کوي، چې امریکا د ملګرو ملتونو پر مشرۍ د افغانستان په اړه د دغه راز غونډو له جوړېدو ملاتړ کوي.

همدارنګه په دې اړه وایي، چې د افغانانو او نړیوالو ګډې ګټې باید د دغو غونډو په‌سر کې وي.

دا په داسې حال کې ده، چې افغانستان د دوحې له غونډې مخکې د بهرنیو چارو وزارت چارسمبالي پر استازیتوب له ملګرو ملتونو څخه دې غونډې ته د لوړې کچې د خبرو اترو او تعامل وړاندیز کړی و؛ خو د نه منل کېدو پر دلیل بیا اسلامي امارت په دې غونډه کې د نه ګډون پرېګړه وکړه.

Continue Reading

Trending

Copyright © 2022 Ariana News. All rights reserved!