Connect with us

تازه خبرونه

په ښارونو کې د سون او خوراکي توکو بیې لوړې شوي

Published

 on

(Last Updated On: سلواغه ۳۰, ۱۳۹۹)

په اسلام کلا ګمرک کې د تېل او ګاز د سلګونه موټرونو له سوځېدو او په نورو سوداګریزو بندرونو کې د بار وړونکو لاریو د درولو له کبله د هېواد په ښارونو کې د سون او خوراکي توکو بیې لوړې شوي دي.

له څو ورځو راپدیخوا په سوداګریزو توکو بار زرګونه موټر د هېواد په بېلا بېلو بندرونو کې د اعتراض په توګه درول شوي دي.

سوداګر او موټرلرونکي وايي، چې پولیس او د ټرانسپورټ مسوولين په لارو کې ناقونه پیسې اخلي.

په لویو ښارونو او په ځانګړې توګه په پلازمېنه کابل کې د خوراکي او سون توکو بیې لوړې شوي؛ یوه کیلو اوبلن ګاز، چې په اته څلوېښت افغانۍ و اوس اتیا افغانیو ته لوړ شوی. دغه راز یو لیټر پټرول له شپږ دېرش افغانیو اووه څلوېښت افغانیو ته لوړ شوي او د اوړو اووه منه بوجۍ له اتلس سوه افغانیو دوه زره ته لوړه شوې ده.

د کابل منډوي پلورونکيو ويلي، که لارې خلاصې نشي؛ بیې به په بې ساري توګه لوړې شي.

سوداګر او موټر چلوونکي وايي، چې که د ناقانونه پیسو د اخیستو ستونزه حل نشي؛ اعتراض به وغزوي، له کبله به یې اقتصادي ناورین رامنځته شي.

د ټرانسپورټ وزارت ویاند  حکمت الله قوانچ پر موټر چلوونکیو تورلګوي، چې پلمې کوي او زیاتوي، چې دوی پخپلسر لویې لارې تړلي او د دې پوښتنه به وشي او څارنوالۍ ته به وروپېژندل شي.

د بار وړونکیو موټرو د مالکانو او سوداګر دا اعتصاب له شل ورځو راپدیخوا روان دی.

په اسلام کلا ګمرک کې، چې زرګونه بار وړونکي موټر په کې ولار ول اور ولګید او سلګونه هغه او سوداګریز توکي وسوځيدل.

تازه خبرونه

په افغانستان کې د اسلامي امارت د دوه یمې واکمنۍ یو کال پوره شو

Published

on

(Last Updated On: زمری ۲۴, ۱۴۰۱)

یو کال مخکې د زمري د میاشتې پر څلیریشتمه اسلامي امارت له شل کلنې مبارزې وروسته د دوه یم ځل لپاره واک ته ورسېد او جمهوري نظام ړنګ شو.

اسلامي امارت په داسې حال کې، چې له بیا واکمنېدو یې یوازې ۲۰ ورځې تېرې وې؛ د ۱۴۰۰ لمریز هجري کال د وږي د میاشتې پر ۱۶شپاړسمه نېټه یې خپله چارسمبالې کابینه اعلان کړه؛ خو  په هېواد کې دننه او بهر یې له کبله ګڼ غبرګونونه راوپارول، چې ګواکې ټولګډونه نده.

د چارسمبالي حکومت د اطلاعاتو او رسنیو د مرکز مشر انعام الله سمنګاني ویلي: تېر کال پدې ورځ د ګوډاګي نظام له سقوط سره سم اسلامي امارت په ناڅاپه توګه د چارو واګې په لاس کې واخیستې، چې الحمدلله اوس له ټولو بندیزونو او مشکلاتو سره سره ډېرې لاسته راوړنې لري.

په هېواد کې د اسلامي امارت له رامنځته کېدو سره ډېری سیاسي مشران، د تېر حکومت لوړ پوړي چارواکي، د ولسي جرګې استازي، د بشري حقونو مدافعین او یو شمېر مدني فعالان له هېواده ووتل او له افغانستان څخه بهر یې پناه واخیسته؛ په داسې حال کې، چې د اسلامي امارت مشرتابه د وضعیت د کنټرول لپاره د عمومي بخښنې حکم صادر کړی و.

د افغانستان نوی حکومت څلور میاشتنی و، چې د هرې ورځې له تېرېدو سره پر اسلامي امارت نړیوال فشارونه، سیاسي او اقتصادي بندیزونه پراخه کېدل.

له څلورو میاشتو وروسته د بهرنیو چارو وزارت چارسمبالی امیرخان متقي د لومړي ځل لپاره د یوه پلاوي په مشرۍ ایران ته سفر وکړ او هلته یې له ایراني چارواکو سره د لیدنې پر مهال له پخواني جهادي مشر محمد اسماعیل خان او د ملي مقاومت د جبهې له مشر احمد مسعود سره وکتل او هېواد ته یې ترې د راستنېدو غوښتنه وکړه.

د افغانستان نوی حکومت له ټولو ستونزو سره سره خپل حاکمیت ټینګ کړ او له نهه میاشتو وروسته د اسلامي امارت د رهبرۍ د حکم پر بنسټ له افغان شخصیتونو سره د اړیکو او بلنې تر سرلیک لاندې یو کمیسیون جوړ شو او د تېر حکومت یو شمېر لوړپوړيو چارواکو په ګډون لسګونه کسانو ته یې کابل ته د راستنېدو زمینه برابره کړه.

په تېر یو کال کې د ټولګډونه حکومت جوړول، پر ښځو او نجونو د بندیزونو لګول او له بشري حقونو څخه سرغړونه د اسلامي امارت پر وړاندې له مهمو نیوکو څخه شمېرل کېږي.

له افغانستان څخه بهر یو شمېر میشتو سیاسي شخصیتونو هم د یادو مواردو عملي کېدل او د اسلامي امارت مشروعیت هېواد ته د بېرته راستنېدو شرطونه وبلل.

د اسلامي امارت له واکمنۍ لس میاشتې وروسته په کابل کې د هېواد له بېلابېلو ولایتونو څخه د شاوخوا درې زره دیني عالمانو په ګډون د دیني عالمانو ستره غونډه جوړه شوه، چې د اسلامي امارت مشر ملا هبت الله آخوندزاده د لومړي ځل لپاره کابل ته راغی او پدې غونډه کې یې وینا وکړه او د افغانستان له ملي رادیو او تلویزیون څخه په غږیزه بڼه خپره شوه. د اسلامی امارت مشرتابه ټینګار وکړ، چې دوی له نړۍ سره تعامل ته چمتو دي؛ خو اسلامی قوانین یې سره کرښه ده.

اسلامي امارت په تېر کال کې په وار وار د افغانستان په کورنیو چارو کې پر بهرنۍ لاسوهنې نیوکه وکړه او د سیمې او نړۍ له هېوادونو یې وغوښتل، چې د افغانستان په کورنیو چارو کې له لاسوهنې ډډه وکړي.

د افغانستان د بهرنیو چارو وزارت سیاسي مرستیال شېر محمد ستانکزی وايي، چې د افغانستان نوی حکومت اوس خپلواک دی او نور حکومتونه باید د افغانستان په کورنیو چارو کې لاسوهنه ونکړي.

په افغانستان کي د اسلامي امارت  له بیا واکمنېدو سره سم  د هېواد اقتصادي سکتور د نړیوالو له بندیزونو سره مخ شو او ترڅنګ يې د سیمې او ګاونډ هېوادونو هم د افغانستان له بانکي نظام سره خپلې اړیکې پرې کړې، چې له دې سره په هېواد کې د اقتصادي بهیر د ودرېدو ترڅنګ د بېوزلۍ او بېکارۍ کچه هم لوړه شوه؛ خو د کابو یوه کال له تېرېدو سره، اسلامي امارت د هېواد اقتصادي ثبات لپاره د ځینو بنسټیزو پروژو د کارونو لړۍ پیل کړه.

له یو کال وروسته د افغانستان نوی حکومت اوس هم د نړیوال مشروعیت له بحران سره مخ دی او تر اوسه پدې ندی توانېدلی، چې په ملګرو ملتونو کې د یوه حکومت په توګه خپل رسمي مقام ترلاسه کړي.

د خصوصي سکتورغړي له اسلامي امارت څخه غوښتنه کوي، چې په هېواد کې بنسټیزو پروژو ته خپله پاملرنه زیاته کړي.

دا، چې دا کړکیچ به څومره دوام وکړي؛ وخت به یې ځواب ووايي.

Continue Reading

تازه خبرونه

په پروان ولایت کې سېلابونو لسګونه کسان مړه او بې درکه کړل

Published

on

(Last Updated On: زمری ۲۴, ۱۴۰۱)

سیمه ییزو سرچینو د دوشنبې پر ورځ ویلي؛ د پروان ولایت په شینوارو او سیاه ګرد ولسوالیو کې د تېر ماښام د سېلابونو له کبله لږ تر لږه ۳۲ کسان مړه شوي او ۲۰ نور ټپیان دي.

د سرچینو د څرګندونو له مخې، د پروان په غوربند دره کې لږ تر لږه ۱۰۰ کسان ورک شوي او ۱۷ نور مړه دي.

دا په داسې حال کې ده، چې د یکشنبې پر ورځ په یو شمېر ولایتونو کې سخت بارانونه وشول، چې لسګونه کورونه یې ویجاړ کړي دي.

د ننګرهار په مرکز جلال آباد ښار کې هم بارانونو خلک زینمن کړي دي.

د چارواکو د څرګندونو له مخې؛ په بارانونو کې ډېر کورونه نړېدلي، چې لږ تر لږه نهه کسان یې مړه کړي دي.

د ملي دفاع وزارت تائید کړې، چې هوايي ځواک پروان ولایت ته د خلکو د ژغورنې او د بشري مرستو د رسولو په موخه استول شوی دی.

Continue Reading

تازه خبرونه

د کابل او اسلام آباد اقتصادي اړیکې پراخه شوې دي

Published

on

(Last Updated On: زمری ۲۴, ۱۴۰۱)

په کابل کې د پاکستان سفیر وايي، چې د اسلام آباد او کابل ترمنځ د ترانزیت او سوداګرۍ په برخو کې همکاري پراخه او د صادراتو او وارداتو کچه لوړه شوې ده.

په کابل کې د پاکستان سفير منصور احمد خان د  پاکستان د خپلواکۍ د ٧٥ کليزې د نمانځنې په مراسمو کې ويلي، چې اسلام آباد له کابل سره خپلې هر اړخیزې همکارۍ روانې ساتي.

دی  وايي؛ د ترانزیت او سوداګرۍ په برخو کې د اسلام آباد او کابل همکاري زیاته شوې او د دواړو هېوادونو ترمنځ واردات او صادرات هم ډېر شوي دي.

د هغه په ​​وينا، د افغانستان او پاکستان پر پولو ستونزې اوارې شوې او آسانتياوې رامنځته شوې دي.

 د هغه  په وینا، اسلام آباد له تېر یوه کال راپدیخوا له افغانستان سره د ستونزو په حل کې همکاري کړې او اوس هم له افغانستان سره خپلو همکاریو ته ژمن دی.

نوموړی وایي: له افغانستان سره زمونږ اړیکې ډېرې ښې دي.  په تېر یو کال کې افغانستان ته ډېرې ستونزې را ولاړې شوې؛ خو پاکستان له افغانستان سره مرسته او همکاري کړې ده. دا همکارۍ د کډوالو،  بشري مرستو او په پولو کې د آسانتیاوو د برابرولو په برخو کې وې. د ترانزیت او سوداګرۍ په برخو کې زمونږ همکاري زیاته شوې، صادرات او واردات هم زیات شوي او مونږ تل له افغانستان سره همکارۍ ته ژمن یو.

منصور احمد خان زیاته کړې؛ په تېر یوه کال کې له ستونزو سره سره اسلامي امارت ښه فعالیتونه کړي دي.

د هغه د څرګندونو له مخې؛ ښوونه او روزنه د ټولو وګړیو اساسي حق دی او ښځې، چې د ټولنې ۵۰ سلنه جوړوي باید زدکړو ته لاسرسی ولري.

هغه وایي: پوهنه د هېواد یوه مهمه برخه ګڼل کېږي؛ ښځې د ټولنې ۵۰ سلنه جوړوي. د افغانستان اوسنی حکومت هم وايي، چې په افغانستان کې د ښځو د زدکړې په برخه کې پر یوه بهیر کار کوي، چې نجونې له اسلامي شرایطو او افغان فرهنګ سره سمې زدکړې روانې وساتي.

دغه راز دی له ترهګرۍ سره مبارزه د سیمې د هېوادونو ګډه موخه ګڼي او وايي، چې د ترهګرۍ پر خلاف مبارزه روانه ده.

منصور احمد خان ټینګار کوي، چې د سیمې هېوادونه په ځانګړي توګه افغانستان او پاکستان د ترهګریزو بریدونو له کبله ډېر زیانمن شوی، له همدې کبله د سیمې او په ځانګړي توګه د افغانستان او پاکستان د امنیت د تامین لپاره اړینه ده، چې دا ګواښونه له منځه یوړل شي او د اړوند هېوادونو ترمنځ ښو اقتصادي اړیکو ته زمینه برابره شي.

که څه هم د پاکستان د ویزې تر لاسه کول ګران شوي او افغانان نشي کولی ویزه په آسانه تر لاسه کړي؛ خو په کابل کې د پاکستان سفیر وايي، چې په نږدې رااتلونکیو ورځو کې به د پاکستان د ویزو ستونزه پوره حل شي.

Continue Reading

Trending

Copyright © 2022 Ariana News. All rights reserved!