د کورنیو چارو وزارت چارسمبالي د غزني امنیه قومندانۍ مسوولانو ته د ظرفیت لوړونې په موخه د جوړې شوې ناستې په پرانیست‌غونډه کې ویلي: د مسوولانو مقام له مسوولیت لوړ ندی.

د کورنیو چارو وزارت د خبرپاڼې له مخې: د کورنیو چارو وزارت چارسمبالي سراج الدین حقاني زیاته کړې: مسوولیت ستر امانت دی، چې باید پر اخلاص، عاجزۍ او د الله تعالی د رضا په پام کې نيولو سره ترسره شي.

نوموړي د نظام او ملت ترمنځ وحدت او واټن د مخنیوي لپاره د سیمه‌ییزو مسوولانو او مجاهدینو چلند او مسلکیتوب ارزښتمن وباله او د اسلامي نظام د وقار ساتنې لپاره يې د دوی پر ښه او مسلکي چلند ټينګار وکړ.

سراج الدین حقاني د اداري او مسلکي زده‌کړو پر اړتیا د ټینګار تر څنګ زیاته کړې؛ د تېروتنو د مخنیوي لپاره باید د مسلکي توب او ظرفیت لوړولو هڅو ته لومړیتوب ورکړ شي.

ویل کیږي، چې د غونډې ګډونوالو ژمنه کړې، چې د خپلو دندو د ښه ترسره کولو لپاره به د مسلکيتوب او اخلاقو معیارونه په پام کې نیسي او د ولس خدمت به د خپلې اصلي دندې په توګه ترسره کوي.

د اسلامي امارت رهبر مولوي هبة‌الله اخوندزاده د یکشنبې پر ورځ( د لیندۍ دولسمه ) د کندهار ولایت سپین بولډک ولسوالۍ ته په خپل سفر کې د امربالمعروف او نهی عن المنکر قانون پر پلي کېدا ټینګار کړی دی.

د کندهار ولایت د رسنیو دفتر په یوه خبرپاڼه کې لیکلي، چې د اسلامي امارت رهبر سپین بولډک ولسوالۍ ته په سفر کې له نظامي او ملکي چارواکو، د عالمانو شورا، سوداګرو او امنیتي منسوبینو سره وکتل او هغو ته یې وینا وکړه.

هغه ويلي؛ د اوسني اسلامي نظام لپاره په تېرو ۲۰ کلونو کې ډېرې قربانۍ ترسره شوي او بايد د دې نظام د ساتنې لپاره هڅې وشي؛ دا کار پر اطاعت او تقوا او د عالمانو پر مشورو شونی دی.

د اسلامي امارت رهبر عالمانو ته څرګنده کړه؛ د امر بالمعروف او نهی عن المنکر د قانون په پلي کېدا کې له اړوند ادارو سره بشپړه همکاري وکړئ او هره ورځ په جوماتونو کې لمونځ کوونکیو او خلکو ته د ایمان، عقیدې او لمانځه اړوند مسایل وړاندې کوئ.

دغه راز یې د سپين بولډک ولسوالۍ نظامي او ملکي مسوولينو ته سپارښتنه وکړه، چې اختلافات ونلري، له يو بل سره پوره همغږي او همکاري وساتي، د خپلو مسووليتونو په ترسره کولو کې ژمن اوسي او د خپلو مشرانو اطاعت وکړي.

د ایران بهرنیو چارو وزیر عباس عراقچي د یکشنبې پر ماښام( د لیندۍ یوولسمه ) په دمشق کې د سوریې له ولسمشر بشارالاسد سره وکتل او د بشارالاسد زړورتیا او روحیه یې د ستاینې وړ وبلله.

دا ناسته په داسې حال کې ترسره شوې، چې په سوریه کې په ځانګړې توګه په حلب ولایت کې پوځي وضعیت نازک ښودل شوی دی.

له دې ناستې وروسته عراقچي ویلي، چې هغه ته یې له "حکومت،  پوځ او بشارالاسد شخصیت" څخه د اسلامي جمهوریت د ملاتړ پیغام ورساوه او د بشارالاسد د زړورتیا او روحیې ستاینه یې وکړه.

هغه څرګنده کړې: په دې کتنه کې له سوریې سره د لازمو مرستو د جزئیاتو په اړه هم خبرې وشوې.

عراقچي ویل: "مونږ ډاډه یوو؛ سوریې لکه څنګه، چې مخکې یې ترهګرۍ ته ماتې ورکړې وه، دا ځل به هم بریا خپله کړی او ترهګر به مات کړي."

د یادې خبرپاڼې له مخې؛ بشار اسد سوریې ته د عراقچی سفر په اوسنیو حساسو حالاتو کې د اهمیت وړ وباله او د ایران د اسلامی جمهوریت ملاتړ او دریځ یې څرګند کړ.

له اسد سره له کتنې وروسته د ایران بهرنیو چارو وزیر انقرې ته ولاړ؛ هغه هېواد ته، چې ویل کېږي د التحریر الشام له اسلامپالو ملېشو ملاتړ کوي.

عراقچي به ترکیې ته په خپل سفر کې د دغه هېواد له چارواکو سره د سوریې پر وروستیو حالاتو هم خبرې وکړي.