د اسلامي امارت ویاند ذبیح الله مجاهد ویلي؛ د سې شنبې پر شپه په کابل کې د یو لړعملیاتو پر مهال د داعش درې مهم غړي وژل شوي دي.

د اسلامي امارت ویاند ذبیح الله مجاهد تویت کړې؛ تېره شپه د کابل ښار د ۱۲ حوزې د بتخاک څلورلاري په اړوند سیمه کې د داعش پر پټنځي عمليات وشول؛ د داعشيانو درې مهم غړي وژل شوي؛ وسلې، لاسي بمونه، چاودېدونکي توکي، ډېر شمېر ريموت او د ماين جوړونې وسايل ونیول شول.

د مجاهد په وینا؛ داعش له دغه پټنځي څخه په کابل ښار کې د بریدونو لپاره کار اخیستی او پلان یې درلود، چې د روژې په مبارکه میاشت کې مقدس ځایونه او ملکي وګړي ووژني.

مجاهد وايي، په دې عملیاتو کې ملکي وګړیو او مجاهدینو ته کوم ځاني زیان ندی اوښتی.

دا په داسې حال کې ده، چې د افغانستان اسلامي امارت د بهرنیو چارو وزیر مولوي امیرخان متقي په دې وروستیو کې له دولتي تلویزون RTA سره په مرکه کې ویلي وه، چې داعش په هېواد کې د پښې ایښودو نه لري او دا، چې په افغانستان کې د دغې ډلې لخوا کوم برید ترسره کیږي؛ له بهره واردیږي.

د نوموړي د څرګندونو له مخې؛ دا د ویاړ خبره ده، چې افغانان په خپلو کې کومه ستونزه نلري.

د رویتر د څرګندونو له مخې؛ په افغانستان او پاکستان کې د سې شنبې پر شپه ۶.۵  درجې زلزلې له کبله لږ تر لږه ۱۳ کسان مړه شوي او له ۹۰ ډېر نور ټپیان دي.

رویترز fI nH’I  کړې؛ د پاکستان په شمال لویدیځ کې لږ تر لږه ۹ کسان مړه شوي او ۴۴ نور ټپیان دي.

د پاکستان یوه حکومتي چارواکي ویلي، د خیبر پښتونخوا ایالت په شمالي روغتونونو کې بېړنی حالت اعلان شوی دی.

د افغانستان د روغتیا وزارت چارواکي وايي، لږ تر لږه څلور کسان په افغانستان کې وژل شوي او ۷۰ نور ټپیان دي.

د اسلامي امارت د ویاند مرستیال بلال کریمي د عامې روغتیا وزارت د څرګندونو له مخې په ډاګه کړې، چې د تېرې شپې د زلزلې له کبله په ټول هېواد کې لږ تر لږه ۷۰ کسان ټپیان شوي او ۴ نور مړه دي.

چارواکو ویلي، په دواړو هېوادونو کې کورونو او ودانیو ته هم زیان اوښتی دی.

د اروپا د مدیترانې د زلزلې ثبتولو مرکز ویلي؛ دا زلزله د ۱۰۰۰ کیلومترو پر پراخوالي د پاکستان، هند، ازبکستان، تاجکستان، قزاقستان، قرغزستان، افغانستان او ترکمنستان شاوخوا ۲۸۵ میلیون وګړیو احساس کړې ده.

د امریکا د ځمکپوهنې ادارې د څرګندونو له مخې؛ د زلزلې مرکز د هندوکش د غرونو  شمال ختیځ بدخشان ولایت د جرم کلي جنوب ختیځ ته په ۴۰ کیلومترۍ کې ښودل شوی، چې ژوروالی یې ۱۸۷ کیلومتره اټکل شوی دی.

د پاکستان په خېبر پښتونخوا ایالت کې لوړپوړي چارواکي عبدالباسط ویلي، پر مړو او ټپیانو سربېره لږ تر لږه ۱۹ کورونه هم زیانمن شوي دي.

د افغانستان د طبیعي پېښو پر وړاندې د مبارزې وزارت ویاند شفیع الله رحیمي د سې شنبې پر ورځ ناوخته ویلي، چې په ختیځ ولایت لغمان کې د سېلابونو له کبله دوه کسان مړه شوي دي.

تېر کال د افغانستان په ختیځ کې د رښتر پر کچه ۶.۱ درجې زلزلې له ۱۰۰۰ ډېر کسان مړه کړل.

پر ۲۰۰۵ ز. کال د پاکستان په شمال کې  ۷.۶ درجې زلزلې لږ تر لږه ۷۳۰۰۰ کسان مړه کړي دي.

د لومړنیو معلوماتو له مخې؛ د پاکستان په سوات سمه کې زلزلې سخت مالي او ځاني زیانونه اړولي دي .

ویل کیږي، چې د آسیا د جنوبي برخې د زلزلو لړۍ د یوریشیا پر لوري د غزېدو په حال کې ده.   

د قطر پراختیایي وجهي صندوق (QFFD) د سې شنبې پر ورځ د اسلامي امارت د پوهنې وزارت له پلاوي سره په هېواد کې د ۳۰ زره زده‌کوونکیو د زده‌کړې د یوې پروژې د ملاتړ لپاره یو هوکړه لیک لاسلیک کړ.

دغه هوکړه لیک د قطر پراختیایي صندوق د عمومي رییس خلیفه بن جاسم الکواري او د پوهنې وزیر حبیب الله آغا حقاني ترمنځ د یوې غونډې پر مهال لاسلیک شو.

دراپورونو له مخې؛ د دې پروژې هدف د افغانستان په څو ولایتونو کې د ۳۰۰۰۰ زده‌کوونکیو، چې ۵۰ سلنه یې نجونې دي نوملیکنه ده، چې په څو ولایتونو کې خپلې لومړنۍ زده‌کړې بشپړې کړي.

دغه ګډه پروژه، چې درې کاله به روانه وي؛ د نجونو او معلولیت لرونکیو زده‌کوونکیو په ګډون به اکثره هغو ماشومان، چې په ښوونځیو کې ندي او اړمن پاتې دي برخمن شي.

دغه راز څرګنده شوې، چې کار او همغږي به د زده‌کړو د سیمه ییزو ټولګیو د جوړولو، رغونې او د روغتیا ساتنې اسانتیاو ته وده ورکولو لپاره ترسره شي.

دا به د ټولنې ښوونکیو لپاره روزنه هم چمتو کړي او نور ښوونکي به هم ورزیات کړي او د زده‌کوونکیو په نوملیکنه کې کلیدي شریکان ښکېلوي.

خلیفه بن جاسم الکواري ویلي: مونږ باور لرو، چې زده‌کړه د لږ پرمختللیو هېوادونو د سوکالۍ لپاره یو له مهمو ستنو څخه ده.

له بده مرغه نن په افغانستان کې ۳.۷ میلیون ماشومان له ښوونځیو بهر دي، چې ۶۰ سلنه یې نجونې دي.

هغه زیاته کړې: د دې هوکړې له مخې به مونږ ۳۰ زره نرینه او ښځینه زده‌کوونکي تر پوښښ لاندې راولو، چې ۵۰ سلنه به یې نجونې وي او دا زمونږ د لید یوه برخه ده، چې د ټولو لپاره ښوونې او روزنې ته له عادلانه لاسرسي ملاتړ وکړو.