د کابل ولایت ۵۰ دیني عالمانو په کندهار ولایت کې د اسلامي امارت له مشرتابه سره وکتل او د ښځو پر حقونو یې هم خبرې وکړې.

د کابل میشتو دیني عالمانو د پنځوس کسیز پلاوي سفر د اسلامي امارت د مشرتابه په غوښتنه ترسره شوی، چې بنسټیزه موخه یې د پلازمېنې د اوسیدونکیو د ستونزو حل دی.

په دې غونډه کې دیني عالمانو د اسلامي شریعت په چوکاټ کې د ښځو پر حقونو او د نجونو د تعلیم پر موضوع خبرې وکړې او د اسلامي امارت مشرتابه عالمانو ته ډاډ ورکړ، چې د پلازمېنې د اوسیدونکیو ستونزو ته به پاملرنه کوي.

دیني عالمانو د اسلامي امارت له مشرتابه وغوښتل، چې تعلیم ته ځانګړې پاملرنه وکړي او د اړتیا په صورت کې دې په نصاب کې هم بدلون راولي.

د کابل والي ندا محمد ندیم وایي: د دې غونډې اصلي موخه دا وه، چې د پلازمېنې ښاري ستونزې تر ستر شخصیت پورې ورسېږي او د منبر او عالمانو له لوري د هغه احکام تر خلکو ورسېږي.

له دغو عالمانو څخه یو شمېر یې وايي، چې د اسلامي امارت له مشر سره یې د ښځو د ستونزو د حل، د اسلام په چوکاټ کې د ښځو د حقونو د درناوي او د ښوونځیو د نصاب د اصلاح په اړه خبرې کړې دي.

دیني عالم عبدالحمید حماسي څرګندوي: د امیرالمومنین لپاره د مجاهد او نامجاهد تر منځ هیڅ توپیر نشته ټول رعیت دی او مساوي حقوق لري.

دا په داسې حال کې ده، چې د اسلامي امارت رهبر د دیني عالمانو په لویه غونډه کې ژمنه کړې، چې د دیني عالمانو په هره غونډه کې به ګډون کوي ​​او د دولتي ادارو د رهبرۍ لپاره به دیني عالمان ټاکي.

د بدخشان سیمه‌ییز و چارواکو ويلي؛ د چارشنبې پر ورځ مولوي امیرخان متقي او ورسره مل پلاوي یې د دې ولایت د اوسيدونکیو د ستونزو د څېړلو لپاره دې ولایت ته سفر وکړ.

د بدخشان ولايت د اطلاعاتو او فرهنګ مشر معزالدين احمدي وايي؛ د ملي راډيو ټلويزيون مشر احمدالله وثيق هم له اميرخان متقي سره په دې سفر کې مل دى او د دغه ولايت د دولتي ادارو او سیمه ییزو چارواکو سره یې د خلکو پر شته ستونزو خبرې وکړې.

د معزالدین احمدي د څرګندونو له مخې، په دې سفر کې د تاجکستان او افغانستان تر منځ د پولې دواړو غاړو ته د میشتو قومونو ترمنځ د ښو اړیکو د رامنځته کولو، د ډیپلوماسۍ له لارې د سرحدي ستونزو د حل، د مجاهدینو او عامو خلکو ترمنځ د ښو اړیکو پر څرنګوالي، د خلکو د اقتصادي او ښوونیزو ستونزو پر حل او  څېړلو بحث او  خبرې شوې دي.

دا په داسې حال کې ده، چې تېره ورځ د تخار ولایت امنیتي مسوولینو له تاجکستان سره د سرحدي سیمې له امنیتي خوندیتوبه ډاډ څرګند کړی او ټینګار شوی، چې هیچا ته به اجازه ورنکړي، چې د افغانستان له خاورې تاجکستان ته ګواښ رامنځته کړي.

د نورستان سیمه ییزو چارواکي په ډاګه کړې؛ په دې ولایت کې د سېلابونو له کبله لږ تر لږه ۹ کسان مړه شوي او ۹ نور ټپیان دي.

د دغو چارواکو د څرګندونو له مخې؛ تېره شپه سېلابونو د دغه ولايت د وامۍ ولسوالۍ کې خلکو ته خاني او مالي زیانونو رامنځته کړي دي.

چارواکو زیاته کړې، چې د دغو سېلابونو په پایله کې د “کوردر” پل، چې کونړ او نورستان ولایتونه سره نښلوي هم په بشپړه توګه ویجاړ شوی دی.