د روغتیا نړیوالې ټولنې سږ کال د افغانستان په هلمند ولایت کې د ګوزن یا پولیو ویروس دوه‌یمه پېښه تائید کړه.

دا پېښه په مارچ میاشت کې وپیژندل شوه.

دا پېښه د بادغیس ولایت په بالامرغاب ولسوالۍ کې د لومړي انتان له پیژندلو وروسته ثبت شوې، چې یوه پېنځه کلنه نجلۍ پر ویروس اخته شوې وه.

همدارنګه تر اوسه پورې د کندهار، هلمند، کابل، لغمان، ننګرهار او زابل په څېر ولایتونو کې د ګوزڼ ویروس له ۱۸ مثبتو چاپېریالي بېلګو راپور ورکړ شوی دی.

افغانستان او پاکستان یوازني هېوادونه دي، چې ګوزڼ په کې له منځه نده وړل شوې.

ګوزڼ یوه ویروسي ناروغي ده، چې درملنه نلري او یوازې د واکسین له لارې یې مخنیوی کیدی شي.

د افغانستان اسلامي امارت د عامې روغتیا وزیر نور جلال جلالي په یو لړ غونډو کې له اړوند نړیوالو شریکانو سره د افغانستان د روغتیایي سیسټم د بنسټونو د پیاوړي کولو لپاره د همکاریو پر پراخولو خبرې کړې دي.

د عامې روغتیا وزارت وايي، چې د عامې روغتیا وزیر په خپل دفتر کې د افغانستان لپاره د UNDP له رییس سټیفن روډریک، د افغانستان لپاره د ملګرو ملتونو د وجهي صندوق (UNFPA) مشر کوابینا اسانټي او د دې بنسټ د اجرائیوي مرستیال او د عمومي منشي مرستیال اندریو سابرټن سره ولیدل.

په دې غونډه کې د روغتیایي مرکزونو لپاره د لمریزې برښنا سیسټم جوړولو، د مرکزونو غوره کولو، د ملاریا، نري رنځ او HIV د مخنیوي او د روغتیایي خدمتونو د ارزونې او شفافیت پلي کولو په اړه بحثونه او اندونه وړاندې شول.

د عامې روغتیا وزیر د ملګرو ملتونو د پراختیايي پروګرام (UNDP) له همکارۍ څخه مننه کړې او د دې بنسټونو همکاري یې لرې پرتو سیمو ته د روغتیایي خدمتونو وړاندې کولو، اړمنو سیمو او روغتیایي مرکزونو لپاره د لمریزې برښنا سیسټمونو جوړولو او د ساري ناروغیو کنټرول لپاره اړینه وبلله او د ټولو خدمتونو په وړاندې کولو کې د روڼتیا او حساب ورکولو اصولو ته پاملرنه یې اغېزمنه وګڼله.

د ملګرو ملتونو د پراختیايي پروګرام مشر هم شفافیت او حساب ورکول خپل لومړیتوب وباله او وایي: “هغه به د افغانستان له روغتیا سیسټم سره همکاري روانه وساتي.”

دغه راز نور جلال جلالي د افغانستان لپاره د ملګرو ملتونو د وجهي صندوق (UNFPA) مشر کوابینا اسانټي او د دې بنسټ له اجرائیوي مرستیال او د عمومي منشي انډریو سابرټن سره وکتل، چې په افغانستان کې د روغتیا سیسټم پیاوړتیا، د اړتیا په صورت کې د دوامداره مالي ملاتړ چمتو کولو، په روغتیایي سکټور کې د مرستو ښه مدیریت، د روغتیایي مرکزونو شمېر زیاتولو، د ګرځنده ټیمونو د اغېزمنتوب ښه کولو او په ثابتو مرکزونو بدلولو، د عامې روغتیا وزارت له پالیسۍ سره سم د روغتیایي خدمتونو چمتو کولو او د لومړیتوبونو پر بنسټ د خدمتونو پلي کولو په اړه بحث وکړ.

د عامې روغتیا وزارت چارسمبالي د روغتیایي خدمتونو په وړاندې کولو کې پر اغېزمنتیا، ګټورتوب او شفافیت ټینګار وکړ او د روغتیا وزارت لومړیتوبونو ته پاملرنه یې اړینه وګڼله او د روغتیایي خدمتونو په وړاندې کولو او د شته نړیوالو مرستو په ښه مدیریت کې یې د عامې روغتیا وزارت په ملي پالیسۍ ټینګار څرګند کړ.

دغه راز د ملګرو ملتونو د وجهي صندوق مرستیال په روغتیا سکتور کې له روڼتیا څخه رضایت څرګند کړ او د افغانستان له روغتیایي سیسټم سره یې مرسته اړینه وبلله. هغه د مرستو په جذبولو کې هم د همکارۍ ژمنه وکړه.

د عامې روغتیا وزیر نور جلال جلالي په خپل دفتر کې د وجهي صندوق له استازو انکجن او الیا بخاریف او د افغانستان لپاره د ملګرو ملتونو د پراختیایي پروګرام (UNDP) له استازو دینا پټیل او ډاکټر اکمل نصرت سره ولیدل.

د عامې روغتیا وزارت ویلي، چې دوی په دې لیدنه کې د اچ آی ويHIV ملاریا او نري رنځ د مخنیوي، په دې سکټورونو کې د همکارۍ، د روغتیایي سیسټم پیاوړتیا او د نورې همغږۍ په اړه هم بحث او نظرونه تبادله کړل.

د عامې روغتیا وزارت چارسمبالي د نړیوالو شریکانو له مرستې ستاینه وکړه او د دوامداره او باثباته روغتیایي خدماتو پر وړاندې کولو یې ټینګار وکړ.

د دې ناستې ګډونوالو د روغتیايي پروژو پر همغږۍ، د بودجې شفافیت او د غوره خدماتو د وړاندې کولو لپاره د اړینو اقداماتو په اړه هم هوکړه وکړه.

دغه راز د وجهي صندوق استازو ژمنه وکړه، چې د افغانستان د روغتیايي سکټور د پیاوړتیا لپاره به خپلې مرستې روانې ساتي او د راتلونکي همکارۍ لپاره پر دوامداره اړیکو او همغږۍ هم ټینګار وشو.