د افغانستان اسلامي امارت بهرنیو چارو وزارت چارسمبالي(سرپرست) امیر خان متقي د چین نړیوالې پراختیایي همکارۍ ادارې له رییس چن شیاوډونګ سره وکتل او دواړو خواوو د افغانستان د بیارغونې او اقتصادي پراختیا په برخه کې د دوه اړخیزو همکاریو پر پراختیا ټینګار وکړ.

د بهرنیو چارو وزارت د یوې خبرپاڼې له مخې، چې نن (پنجشنبه د غبرګولي لومړۍ) خپره شوې؛ امیرخان متقي په افغانستان کې د چین د پراختیایي پروژو له پلي کولو ستاینه کړې او یادونه یې وکړه، چې د امنیت له تامین وروسته اقتصادي بیارغونه د حکومت تر ټولو لوی مسوولیت دی او اسلامي امارت له خپلو ټولو سرچینو څخه پر ګټنې دې سکټور ته ځانګړې پاملرنه کوي.

هغه همدارنګه هیله څرګنده کړه، چې د افغانستان او چین ترمنځ به د کرنې، انرژۍ او اوږدمهاله بنستیزو پروژو په برخو کې نږدې همکاري رامنځته شي او د چین دې ادارې ته یې د بیارغونې پروژو د لومړیتوب ورکولو لپاره عملي وړاندیزونه وړاندې کړل.

دغه راز چن شیاوډونګ له افغانستان سره د همکارۍ پر دوام ټینګار وکړ او وایي؛ د هغه تر مدیریت لاندې د چین نړیوالې پراختیایي همکارۍ اداره چمتو ده، چې د روغتیا، انرژۍ، کرنې او ظرفیت جوړونې په برخو کې خپلې همکارۍ روانې وساتي.

هغه دا ژمنه هم وکړه، چې چین به د بېخبناوو پر پراختیا، څارویو سکټور او د افغانستان د تېلو او ګازو په سکټور کې د څېړنو ترسره کولو کې هم برخه واخلي.

د چک جمهوریت ولسمشر پیټر پاول د چارشنبې پر ورځ د خپل هېواد د ځانګړو ځواکونو څلور غړي، چې د یوه پخواني افغان حکومتي سرتېري د وژنې پر تور محاکمه کېدل؛ وبښل.

ټاکل شوې وه، چې دا څلور کسان د زور زیاتي، نافرمانۍ، د ساتونې له دندو د سرغړونې او د مرستې نه کولو پر تور محاکمه شي.

د چک جمهوریت رسنیو راپور ورکړی، چې دا تورونه د ۱۹ کلن وحیدالله خان له وژنې سره تړاو لري، چې په ​​۲۰۱۸ کال کې د افغانستان لویدیځ شینډنډ د اډې پر چکي سرتېرو د برید پر تور نیول شوی و.

په دې برید کې یو چکي عسکر وژل شوی او دوه نور ټپیان ول.

د پاول دفتر څرګنده کړې: “د دې قضیې د ټولو اړخونو له بشپړې ارزونې وروسته ولسمشر په ځانګړي توګه د جګړې د وخت د وضعیت هغه استثنایي ماهیت په پام کې ونیوه، چې په کې د بیاکتنې لاندې پېښه رامنځته شوه.”

دې دفتر زیاته کړې، چې سرتېري اوس هم د تاوتریخوالي د جرمونو پر تور تورن شوي ندي.

نیویارک ټایمز په لومړي ځل په ۲۰۱۸ کال کې د دې پېښې راپور ورکړ.

په راپور کې راغلي، چې وحیدالله خان له نیول کیدو وروسته د امریکایي او چکي ځواکونو لخوا وهل شوی و. کله، چې هغه پر ​​همغه ورځ افغان ځواکونو ته راستون شو؛ نو بې‌حاله و او بیا لږ وروسته مړ شو.

په هغه وخت کې راپور ورکړ شوی و، چې امریکایي او چکي ځواکونه د پېښې په اړه څېړنې کوي.