Connect with us

تازه خبرونه

څلور نورې ولسوالۍ هم وسلوالو طالبانو ونیولې

Published

 on

(Last Updated On: غبرګولى ۲۵, ۱۴۰۰)

امنیتي ځواکونو د فراه له انار درې، د روزګان له خاص روزګان، د سرپل له ګوسفندي او صیاد ولسوالیو بشپړ شاتګ کړی دی.

د سې شنبې پر شپه امنیتي ځواکونه د سرپل له دوه ولسوالیو پر شا شول. په داسې حال کې، چې د سرپل په مرکز کې جګړې روانې دي.

وسلوالو طالبانو د فراه د انار درې ولسوالۍ ودانۍ له نیولو وروسته پر بمونو والوځولې او له خاورو سره یې خاورې کړې.

دغه راز د پلخمري ښار د شپږمې ناحیې په اړوند سیمه کې یو مرکز طالبانو نیولی، چې په کې شپږ پوځیان وژل شوي او ۱۶ نور یې نیولي.

د روزګان والي محمد عمر شېرزاد منلې، چې د خاص روزګان ولسوالۍ، امنیه قومندانۍ او د ملي امنیت ادارې ځینې برخې او دولتي تاسیسات د سې شنبې پر ورځ د طالبانو لاسونو ته لویدلي دي.

د هېواد د لویدیځ په درې ولسوالیو، د فراه په ځینو برخو، غور او بادغیس کې د دولتي ځواکونو او طالب جنګالیو تر منځ نښتې روانې دي.

د پروان د غوربند د څلور ګونه ولسوالیو په اړوند سیمو کې له دوه ورځو راپدیخوا جګړې روانې دي، چې د سیمه ییزو مسوولینو د څرګندونو له مخې؛ په غوربند کې د نمک آب سیمه د طالبانو لاسونو ته لوېدلې.

د نیمروز والي زمریالی احدي وایي، چې په نیمروز کې له یوې اوونۍ  راپدیخوا امنیتي او دفاعي ځواکونه بریالي شوي، چې خاشرود ولسوالي د طالبانو له شتون پاکه کړي او  ځاني زیانونه ورواړوي.

په نورو سیمو کې هم افغان ځواکونو د طالبانو په وړاندې پرمختګونه کړي.

د ملي امنیت شورا ویاند رحمت الله اندړ وایي، چې طالبان نشي کولی بریالي شي.

ملي اردو وایي، چې له دوه سوه زره ډېر امنیتي او دفاعي ځواکونه په ۲۲ ولایتونو کې له مخالفانو سره په جګړه کې دي او د دې جګړې لمن هره ورځ پراخیږي.

د ولسمشر لومړي مرستیال هم ویلي، چې د طالبانو پرمختګ په یوه نرۍ تړانګه کې دی، چې ژر به د دوی پر ادیره بدل شي.

تازه خبرونه

له ۷۰ سلنې ډېر افغانان له روحي پلوه نا ارامه دي – څېړنه

Published

on

(Last Updated On: چنګاښ ۷, ۱۴۰۱)

د ګالوپ څېړنیز انسټیټیوټ راپور ښيي، چې په تېر کال کې له ۷۰ سلنه ډېر افغانان له روحي پلوه نا ارامه او د نورو هېوادونو د خلکو پر پرتله تر ټولو لږ مثبت عواطف او احساسات یې تجربه کړي دي.

اسلامي امارت دا راپور ردوي او وايي، چې د اسلامي امارت له واکمنۍ وروسته ولس تر بل هر وخت زیات د آرامتیا احساس کړی دی.

د ګالوپ څېړنیز انسټیټیوټ ذهني ارزونې پایلې ښيي، چې په ۲۰۲۱ کال او د دې کال په لومړیو کې ۷۴ سلنه افغانان له منفي عواطفو او احساساتو سره مخ شوي دي. دا څېړنه ښيي، چې افغانان د نړۍ په کچه د هغو کسانو په سر کې دي، چې له رواني پلوه ډېر کړیږي.

د ګالوپ په راپور کې راغلي: افغان ولس په کابل کې د اسلامي امارت له بیا واک ته رسېدو مخکې هم له کړکېچ سره مخ ول؛ ځکه، چې ډېري افغانانو خواړه او سرپناه نلرله.  یوازې لږ شمېر افغانانو د خوندیتوب احساس کاوه او د هر کال پر تېرېدو وضعیت د خرابېدو پر لوري روان و.

افغانان پدې باور دي، چې یوازې سیاسي بدلون نه، بلکې پراخې بې وزلۍ، طبیعي آفتونو، پرلپسې وچکالۍ، بېکارۍ او د نجونو د ښوونځیو تړل کیدو خلک له مثبتو او ښو عواطفو او احساساتو بې برخې کړي دي.

د کابل ښار اوسیدونکی نجیب الله وایي: زمونږ راتلونکی ناڅرګند دی، د هېواد ځوانان بې  برخلیکه دي. د هېواد کدرونه کار نلري او اوس پر سړکونو پېر و پلور لري.

د کابل ولایت اوسیدونکی احمد سیر وایي: د اندېښنې او منفي افکارو ستر علت بېکاري او د زدکړو د زمینې نشتوالی دی.

نقیب الله نومي زدکړیال ویلي ویلي: ارواح پېژندونکي وایي؛ خلک باید امنیتي اقتصادي هوساینه ولري، چې منفي احساسات تجربه نکړي.

اسلامي امارت دغه راپور ردوي او وايي، چې د اسلامي امارت له واکمنۍ او په هېواد کې د جګړې له پای ته رسېدو وروسته خلکو د لومړي ځل لپاره له جګړې پرته ژوند تجربه کړ او په سوله کې د ژوند کولو پر لوري روان دي.

Continue Reading

تازه خبرونه

ملګرو ملتونو افغانستان ته د ۱۱۰ میلیون ډالرو غوښتنه وکړه

Published

on

(Last Updated On: چنګاښ ۷, ۱۴۰۱)

ملګرو ملتونو د دوشنبې پر ورځ د افغانستان په پکتیکا او خوست ولایتونو کې له ۳۶۰ زرو څخه د ډېرو زلزله ځپليو د ژوند ژغورنې لپاره د ۱۱۰ میلیون ډالرو بېړنۍ مرستې غوښتنه وکړه.

دغه مرسته په راتلونکیو درې میاشتو کې د اړتیا وړ ده.

د بشردوستانه چارو د همغږۍ په چارو کې د ملګرو ملتونو دفتر (UNOCHA) ویلي، چې نوې غوښتنه د سږکال د بشري غبرګون د طرحې یوه برخه ده، چې ۴ اعشاریه ۴ میلیارد ډالرو ته اړتیا لري؛ خو په لویه کچه یوازې یو پر درېیمه برخه کمه شوې ده.

دغه بنسټ په ډاګه کړې: مونږ او زمونږ ونډوال له نورو بشري پروګرامونو څخه اکمالات، پرسونل او سرچینې په پور اخلو.

په پکتیکا او خوست ولایتونو کې د چارشنبې د ورځې زلزلې له ۱۰۰۰ ډېر کسان مړه کړل او سلګونه کورونه یې ویجاړ او یا زیانمن کړي دي.

د افغانستان لپاره د ملګرو ملتونو د مرستو همغږي کوونکي رامز الاکبروف د پکتیکا ولایت له زلزلې څپلې  سیمې څخه د لیدنې پر مهال په یوه ویډیويي پیغام کې ویلي؛ مونږ له نړۍ غوښتنه کوو، چې د مهرباني له مخې مرسته وکړئ او مونږ د دې غمیزې د حل لپاره بشپړ ملاتړ ته اړتیا لرو.

Continue Reading

تازه خبرونه

د چين د بهرنيو چارو وزير له زلزله ځپلیو سره د مرستې ژمنه وکړه

Published

on

(Last Updated On: چنګاښ ۷, ۱۴۰۱)

د چین د بهرنیو چارو وزیر وانګ يي د دوشنبې پر ورځ له خپل افغان سیال مولوي امیر خان متقي سره په ټیلیفوني خبرو کې د تېرې اوونۍ د زلزلې له قربانیانو ملاتړ څرګند کړ.

د چين د بهرنيو چارو وزارت د څرګندونو له مخې؛ وانګ يي پر دغه طبیعي ناورین خواشيني څرګنده کړه او وایي؛ چين چمتو دی، چې له افغانستان سره د اړتياوو پر بنسټ پخپل وخت مرستې.

هغه زیاته کړې، د چين له مرکزي او ځايي حکومتونو نيولې تر ټولنيزو بنسټونو او تصديو پورې د چين بېلا بېلو ځواکونو افغانستان ته د بېړنيو بشري مرستو د رسولو او له افغانانو سره د مرستې لپاره وخت پر وخت کار کړی دی.

د وانګ د څرګندونو له مخې؛ د خېمو، کمبلو او نورو توکو لومړۍ ټولګه د چارټر الوتکو له لارې لېږدول شوې او ژر تر ژره به نغدي او نور مرستندويه توکي هم ولېږدول شي.

د افغانستان بهرنیو چارو وزارت هم په ډاګه کړې، چې د دې وزارت چارسمبالي مولوي متقي ترې مننه کړې او وایي، چې د افغانستان اسلامي امارت زلزله ځپلیو ته پخپل وخت خوراکي او طبي مرستې رسولي دي.

د افغانستان د بهرنیو چارو وزارت د څرګندونو له مخې؛ زلزله ځپلي دمګړۍ سرپناه ته بېړنۍ اړتیا لري.

د بهرنیو چارو وزارت په خبرپاڼه کې راغلي، چې دواړو لوریو پر سیاسي اړیکو هم خبرې وکړې.

وانګ يي ويلي، چې پر افغانستان د بنديزونو مخالف دى او زياتوي، چې په بيجينګ کې د افغانستان سفارت ښه فعاليت کوي او په دوه اړخيزو اړيکو کې ښه رول لوبوي.

وانګ يي څرګنده کړې؛ چين به ډېر ژر افغان سوداګرو ته د ويزو ورکولو لړۍ هم پيل کړي او چين ته به د افغان محصلينو د راستنېدو په برخه کې آسانتياوې رامنځته کړي.

هغه دا هم ویلي، چې د افغانستان او چین تر منځ به هوايي دهلېز ژر عملي بڼه خپله کړي.

مولوي متقي د افغانستان په اړه د چین له رغنده پالیسۍ هرکلی وکړ او هیله یې څرګنده کړه، چې له دې سره به د دواړو هېوادونو ترمنځ په ځانګړې توګه د وچو میوو سوداګري پراخه شي.

د تېرې چارشنبې پر ورځ د افغانستان په پکتیکا او خوست ولایتونو کې د ریښتر پر کچه ۶،۱ درجې زلزلې له ۱۰۰۰ ډېر کسان مړه او له ۳۰۰۰ ډېر کورونه ویجاړ کړل.

د چین حکومت پرېکړه کړې، چې د دغې زلزلې له قربانیانو سره به د شاوخوا اووه نیم میلیون ډالرو پر ارزښت بشري مرستې چمتو کړي.

Continue Reading

Trending

Copyright © 2022 Ariana News. All rights reserved!