تازه خبرونه
چک جمهوریت له افغان ژباړونکیو څخه د مرستې پروګرام تصویب کړ
اسوشیټیډ پریس راپور ورکړی، چې د چک جمهوري حکومت پرون جمعه د زمري ۸ له خپلو افغان کارمندانو څخه د ملاتړ او مرستې لپاره یو پروګرام منظور کړی دی.
د چک حکومت دفاع وزیر لوبومیر متنار ویلي؛ په دې برنامه کې د ځای بدلول او له افغان کارکوونکیو سره مالي مرسته ده، چې له چکي سرتېرو سره یې ګډ کار کړی دی.
هغه زیاته کړه، چې د دې پروګرام موخه د افغان ژباړونکیو او د هغوی د کورنیو له خوندیتوب ډاډ دی.
د راپور له مخې؛ چکانو دغه پروګرام په داسې حال کې تر لاس لاندې نیولی، چې په دې هېواد کې یو شمېر سرتېرو او د بشري حقونو هڅاندو له خپل حکومت څخه افغان ژباړونکیو ته د پناه غوښتنه کړې ده.
د چک ولسمشر میلو زمان تېره پنجشنبه د چک له حکومت غوښتي وه، چې په افغانستان کې د امنیت له ویجاړېدو سره دا پروګرام ژر تر ژره تصویب کړي.
د چک چارواکو پدې اړه نور جزئیات ندي ورکړي.
دا په داسې حال کې ده، چې د چک جمهوریت په جون میاشت کې له افغانستان څخه خپل ټول سرتېري ایستلي دي.