د تورخم دروازه له ۲۶ ورځو وروسته د ټرانسپورټ لپاره پرانیستل شوه او ټاکل شوې، چې د جمعې پر ورځ د مسافرو پر مخ پرانیستل شي.

د ننګرهار امنیه قومندانۍ ویلي؛ د افغان او پاکستاني کمیسارانو ترمنځ له هوکړې وروسته د تورخم دروازه د چارشنبې ورځې د مازیګر پر ۴ بجو له ۲۶ ورځو تړل کېدو وروسته د ټرانزیټ او ناروغانو لپاره پرانیستل شوه او  ټاکل شوې، چې د جمعې پر ورځ نورو مسافرو ته هم د تګ راتګ اجازه ورکړ شي.

د ننګرهار د سوداګرۍ خونې غړو ويلي، چې د دروازې د بیا پرانیستلو لپاره د دواړو خواوو د خصوصي سکټورونو ترمنځ څو پړاوه خبرې اترې وشوې؛ خو دا دی په تورخم کې افغان او پاکستاني کمیسارانو د دې سوداګریزې لارې پر پرانستلو هوکړه وکړه. 

د ننګرهار د سوداګرۍ خونې د دارلانشا رییس زیاته کړې، افغان سوداګرو په دې موده کې هره ورځ لږ تر لږه یو میلیون ډالر زیان لیدلی دی.

د نوموړي د څرګندونو له مخې؛ د دې دوروازې  د پرانستلو په اړه د خصوصي سکټور د غړو ترمنځ څو پړاوه خبرې اترې ترسره شوې وې.

د تورخم  دروازې تړل کېدو دواړو خواوو سوداګرو ته لوی مالي زیانونه اړولي دي.

د ننګرهار د سوداګرۍ خونې ويلي، چې سوداګرو هره ورځ لږ تر لږه یو میلیون ډالر زیان یې ګاللی دی.

د کابل او اسلام‌آباد سوداګر غواړي، چې سوداګریزې مسلې له سیاست څخه دډې ته شي؛ ځکه، چې د کړکېچ یوازنی حل خبرې اترې دي؛ نه د لارې بندول.

د تورخم دروازه ۲۶ ورځې مخکې د اسلامي امارت د تاسیساتو د جوړولو په غبرګون کې د پاکستان له لوري وتړل شوه او د دواړو خواوو ترمنځ څو نښتې هم وشوې.

د هلمند ولایت په مرکز لښکرګاه ښار کې د لومړي ځل لپاره یوه هلمندي پانګوال د ۵۲ ډولونه وحشي ژوو او مرغانو د روزلو او پاللو لپاره د شپږ سوه زره امریکایي ډالرو پر لګښت یو ژوبڼ جوړ کړ.

د ژوبڼ مسوول عبدالسلام وایې؛ موخه مو د سیلانیانو لپاره د تفریحي ځای برابرول او د وحشي ژوو د نسل روزنه ده، چې اوسمهال په دې ولایت کې د ورکیدلو په حال کې دي.

د هلمند سیمه‌ییزو چارواکي ويلي؛ هڅه کوي، چې په دې ولایت کې د نادره مرغیو د ورکېدو مخه ونیسي. د هلمند اوسېدونکي وايي، چې حکومت باید ځنګلي ژوند ته ځانګړې پاملرنه وکړي.

مسوولانو ویلې، چې موخه یې له دې کار څخه هلمندیانوته د سیل ځای برابرول او د حیواناتو نسلي روزنه ده.

د هلمند د چاپېریال ساتنې رییس محمد عیسی اغا د دې ډول وحشي ژویو ساتنه د طبیعت لپاره خورا اړینه ګڼي او وایي؛ په تېرو ۴۰ کلونو کې طبیعي ځنګلونه له منځه تللي، وحشي مرغان او ژوي ورک او مهاجر شوي وه، چې اوسمهال یې د بېرته راګرځیدو هڅې کیږي.

د هلمند ولایت اوسیدونکي په داسې حال کې، چې له دې کارهرکلی کوي؛ له خلکو د دې ولایت د ځنګلي ژوند ته د پاملرنې غوښتنه کوي.

د هلمند د چاپېریال ساتنې ریاست د معلوماتو له مخې؛ د اسلامي امارت له بیا واک ته رسیدو وروسته په دې ولایت کې د طبیعي ځنګلونو د ونو پرې کول، د وحشي مرغانو، کبانو او څارویو ښکار په بشپړ ډول بند شوی او لسګونه هغه وحشي حیوانات یې چاپېریال ته خوشې کړي، چې د خلکو لخوا نیول شوي وه.

د اوبو او انرژي وزارت چارسمبالي( سرپرست) عبداللطیف منصور په کابل کې د دغه وزارت د یو شمېر ریيسانو په شتون کې  د ترکمنستان له سفیر خواجه عوضوف سره وکتل .

د اوبو او انرژي وزارت چارسمبالي د دواړو هېوادونو ترمنځ د ښو اړیکو مخینې ته په نغوته(اشاره ) کې د دواړو لورو ترمنځ دوه اړخیزې همکارۍ وستایلې او د ټاپ پروژې د عملي چارو پر چټکتیا یې ټینګار وکړ .

دغه راز د ترکمنستان سفیر د ټاپ پروژې چارو او نورو همغږیو ته په نغوته کې د دغې پروژې د لارې د نقشې د شریکولو غوښتنه هم وکړه.

د اوبو او انرژي وزارت چارسمبالي د ترکمنستان هېواد سفیر ته ډاډ ورکړ، چې د دغې پروژې د لارې نقشه د دې وزارت له لوري وروستۍ شوې او ډېر ژر به له ترکمنستان هېواد سره شریکه شي.

ویل کیږي، چې د دې لیدنې په پای کې د دغې پروژې د چارو د چټکتیا لپاره د دواړو لورو د تخنیکي ډلو ترمنځ پر لیکه( انلاین) د غونډو پر ترسره کولو ټینګار وشو.