Connect with us

تازه خبرونه

چین د اسلامي امارت غوره شوي افغان ډیپلوماټان مني

Published

 on

(Last Updated On: وری ۱۶, ۱۴۰۱)

د افغانستان د بهرنیو چارو وزارت چارسمبالي مولوي امیرخان متقي چین ته د سفر پر مهال خبریالانو ته ویلي؛ چین په بیجینګ کې د افغانستان سفارت ته د اسلامي امارت لخوا ټاکل شوي ډیپلوماټان منلي دي.

مولوي متقي تېره اوونۍ چین ته د افغانستان په اړه له څو اړخیزې غونډې وروسته دا خبره په ډاګه کړې ده.

مولوي امیر خان متقي په چین کې خبریالانو ته ویلي، چین د افغانستان په سفارت کې زمونږ ډیپلوماټان منلي دي.

هغه زیاته کړې؛ دا هغه هڅې دي، چې د چين د ښه نيت څرګندونه کوي.

د افغانستان اسلامي امارت د تېر کال په اګست میاشت کې یو ځل بیا واک ته ورسېدل؛ خو تر اوسه د امریکا تر مشرۍ لاندې نړیوالې ټولنې د رسمي حکومت په توګه پر رسمیت ندی پېژندلی.

تېره اوونۍ د روسیې د بهرنیو چارو وزیر سرګي لاوروف څرګنده کړه، چې مسکو د افغانستان د اسلامي امارت په مشرۍ لومړنی ډیپلوماټ ومانه.

متقي خبريالانو ته په خپلو څرګندونو کې دا هم وويل چې له لسيزو جګړو وروسته اوس افغانستان خوندي شوى او د اقتصادي بيارغونې لپاره زمينه برابره شوې ده.

امیر خان متقي دغه راز خبریالانو ته ویلي؛ مونږ له افغانستان سره د چین له اقتصادي مرستو مننه کوو. مونږ د افغانستان د تولیداتو د واردولو په اړه د چین له آسانتیاوو ستاینه کوو.

هغه زیاته کړې: د دغه راز آسانتیاوو پر برابرولو به منځنۍ آسيا او جنوبي آسيا د افغانستان له لارې ونښلول شي.

دغه راز نوموړي په هېواد کې د بهرنۍ پانګونې غوښتنه هم وکړه.

مولوي متقي د داعش په اړه، ویلي، چې دا ډله ځپل شوې او د افغانستان پولې تر څارنې لاندې دي.

هغه وایي: په تېرو څلور مياشتو کې داعش ندى توانېدلى، چې په افغانستان کې کوم بريد ترسره کړي. مونږ اوس کولی شو ووایو، چې افغانستان یو خوندي هېواد دی او له نړۍ سره پخپلو ژمنو ولاړ یو او د دې هېواد خاوره به د هیچا پر ضد نه کارول کېږي.

امیرخان متقي دغه راز په چین کې له یو شمېر خبریالانو سره په خبرو کې ټینګار کړی، چې له دی وروسته به افغانستان د سیمې هېوادونو د سیالیو پر ډګر بدل نشي.

دا په داسې حال کې ده، چې اسلامي امارت له تېرو اووه میاشتو راپدیخوا په یو لړ سفرونو کې د نړۍ له هېوادونو سره د اړیکو او تعامل غوښتونکی شوی او هڅه کوي، چې له نړیوالو سره خوندي او برابرې اړیکې ټینګې کړي.

تازه خبرونه

د پیسو د چاپ پر تخنیکي هوکړې کار روان دی- د افغانستان بانک

Published

on

(Last Updated On: زمری ۲۲, ۱۴۰۱)

د افغانستان بانک چارواکو ويلي؛ د نویو بانک نوټونو د چاپ لپاره د یو شمېر هېوادونو او د پیسو د چاپ له دفترونو سره تخنیکي هوکړې ته رسېدلي دي.

د افغانستان بانک مسوولینو د دولتي چارواکو د حساب ورکولو په بهیر کې په ډاګه کړې؛ د افغانۍ د ارزښت د ثبات ساتل، د سوداګریزو بانکونو د فعالیتونو ساتل او دوام، د بانکي خدمتونو وړاندې کول، د بهرنیو راکړو ورکړو آسانتیاوې او د نویو سیستمونو رامنځته کول په تېر کال کې د افغانستان بانک لاسته راوړنې دي.

د افغانستان بانک مشر عبدالقاهر څرګنده کړې؛ د افغانیو د ارزښت د ثبات ساتل، د سوداګریزو بانکونو د پایښت ساتل، د بانکي خدمتونو وړاندې کول، د پولو له لارې د راکړې ورکړې آسانتیا او د نویو سیستمونو رامنځته کول هغه مسایل دي، چې د افغانستان بانک په تېر کال کې ورته پاملرنه کړې ده.

د دغه بانک چارواکي وايي؛ دوی د مندرس او سولیدليو بانکنوټونه راټول او له منځه وړي او د یو شمېر هېوادونو سره د بانک نوټونو او پیسو د چاپولو تخنیکي هوکړې ته رسیدلي دي.

د افغانستان بانک ستر سلاکار لطف الحق نور پسرلی وایي: مونږ زړې پیسې راټولې او وسوځولې، مونږ د پیسو چاپولو له دفترونو او هېوادونو سره هوکړې ته ورسیدو. مونږ هیله من، چې له پلان سره سم پرمخ ولاړ شو او تاسې ته یې پایلې درکړو. مونږ د ملي ګټو پر بنسټ پرمخ ځو او خبرې کوو. هېوادونه او بانکونه له افغانستان سره مرسته کوي.

د دې بانک مسوولینو ويلي، چې د افغانستان د اسعارو د زېرمو د خلاصون لپاره  له اړوند خواوو سره څو کورنۍ او بهرنۍ ناستې شوي او پر تخنیکي مسایلو یې بحثونه کړي دي.

د دغو چارواکو د څرګندونو له مخې، د بانکدارۍ سکتور د ښه والي او د جرمي فعالیتونو د مخنیوي لپاره د ترهګرۍ د تمویل د مخنیوي قانون، د پیسو وینځلو د مخنیوي د اقداماتو تنظیم، د بانکدارۍ سکتور د ستونزې د اوارۍ لپاره د پلان مدیریت او د بانکي سکتور د بیا ژوندي کولو پلان جوړ شوی او د مالي او بانکي سکتور او د بحران د مدیریت پالیسي جوړې شوي او د عملي کیدو په حال کې دي.

دا په داسې حال کې ده، چې د نوبل جایزې ګټونکي په ګډون له اویا يېرو اقتصادي کارپوهانو د امریکا ولسمشر جوبایدن او د دغه هېواد د خزانې وزیر جینت ییلن ته لیک استولی او د افغانستان د اسعارو د زېرمو د خلاصون غوښتنه یې کړې ده.

Continue Reading

تازه خبرونه

زه اوس هم د افغانستان ولسمشر یم

Published

on

(Last Updated On: زمری ۲۰, ۱۴۰۱)

د افغانستان پخواني ولسمشر اشرف غني، چې تېر کال یې د اګست پر ۱۵ له هېواده تېښته کړې؛ په خپلې لومړۍ تلویزیوني مرکه کې وایي: د هېواد د اساسي قانون له مخې اوس هم د هېواد ولسمشر یم.

په راتلونکیو څو ورځو کې د افغانستان د جمهوري نظام د سقوط او له هېواده د پخواني ولسمشر اشرف غني د تېښتې یو کال پوره کېږي.

اشرف غني د جمهوري نظام له سقوط وروسته په خپله لومړنۍ تلویزیوني مرکه کې، چې له A.B.N تلویزیون سره یې کړې؛ ادعا کوي، چې د اساسي قانون له مخې اوس هم د افغانستان ولسمشر ګڼل کېږي او تر هغې، چې د هېواد وګړي په قانوني بڼه بل څوک د ولسمشر په توګه و نه ټاکي، نو پخپل ځای به پاتې وي.

هغه وایي: زه د اساسي قانو پر بنسټ ولسمشر یم او تر هغې، چې د افغانستان خلک په قانوني بڼه بل څوک ونه ټاکي؛ زه ولسمشر یم.

اشرف غني د دې پوښتنې په ځواب کې، چې ولې له افغانستان څخه وتښتېد وايي؛ هغه وروستی کس و، چې له افغانستان څخه ووت. د هغه په خبره؛ دا کار یې، ځکه وکړ، چې د داکتر نجيب الله له برخلیک سره مخ نشي.

هغه زیاته کړې، چې له ده مخکې د ملي دفاع وزير په ګډون د کابينې ډېر غړي له افغانستان څخه تښتېدلي وه.

اشرف غني وایي: زه وروستی کس وم، چې له هېواده ووتم او دا هم د دې لپاره، چې د افغانستان د ولسمشر داکتر نجیب ترخه تجربه تکرار نشي.

دغه راز نوموړي زیاته کړې؛ د نظام په سقوط کې ټولو سیاستوالو ونډه درلوده.

هغه د ملي پخلاینې شورا پخوانی مشر عبدالله عبدالله د جمهوريت د ړنګېدو مسوول بولي او پر زلمی خلیلزاد هم نیوکې کوي.

نوموړی په دې اړه وایي: داکتر عبدالله د جمهوریت د نه ټینګښت مسوول دی. په ځانګړي توګه په وروستیو اووه کلونو کې. دوه یم دا، چې د افغانستان د سولې شورا مسوول وې؛ کوم ګام دې پورته کړ؛ د کاغذ پر مخ دې کومه طرحه وړاندې کړه او یا په عمل کې کله ، چې دوحې ته په ځانګړې الوتکه کې ولاړې او د اختر پر ورځ بېرته راغلې؛ ماته دې وویل، چې طالبان هیځ راز حرکت ته چمتو ندي.

د هېواد یو شمېر وګړي د اشرف غني دغه خبرې د شرم وړ بولي او وايي، چې د اوسنیو ټولو اقتصادي بدمرغیو لامل له افغانستان څخه د اشرف غني وتل دي.

د هېواد یو شمېر نور وګړي بیا وایي؛ اشرف غني د بښنې پر ځای بې ګټې خبرې وکړې، ځکه د ده تېښته د حکومت د سقوط لامل شوه، امنیتي بنسټونه له ماتې سره مخ شول او د نجونو ښوونځي اوس هم تړلي دي.

دوی د اوکراین له ولسمشر زیلینسکي سره د ده د پرتلې په اړه وايي، هغه د یو موټي ولس ولسمشر دی او امر يې د هېواد ټول امنیتي ځواکونه مني.

دا په داسې حال کې ده، چې له افغانستان څخه د اشرف غني له وتلو وروسته د هغه لومړي مرستیال امرالله صالح د افغانستان د اساسي قانون له مخې ځان د ولسمشرۍ مشروع سرپرست اعلان کړی دی.

Continue Reading

تازه خبرونه

اسلامي امارت د حجاب په ګډون د شریعت پلي کولو ته ژمن دی

Published

on

(Last Updated On: زمری ۲۰, ۱۴۰۱)

د امربالمعروف او نهی عن المنکر وزارت چارسمبالي ننګرهار ته د سفر پرمهال يوې جوړې شوې غونډې ته څرګنده کړې؛ د حجاب په ګډون ټول صادرشوي فرمانونه تطبيقوو او د مخنیوي په اړه به د نړیوالې ټولنې فشارونو ته تسلیم نشو.

هغه وایي؛ د نړيوالو هيڅ ډول فشار ته نه تسلیمیږي او ټول صادر شوي فرمانونه به تطبيقوي.

نوموړي له امربالمعروف له غړیو سره همکاري د ولس، ملاامامانو او ټولو مسوولينو ګډ مسووليت وباله او زياتوي، چې په تېرو شل کلونو کې فکري او فزيکي يرغل د افغان ملت راتلوونکي نسل ته سخته صدمه رسولې ده.

شیخ محمد خالد حنفي  ويلي؛ په ټول هېواد او ولسواليو کې کابو ۸ زره هڅاند غړي لري، چې د اجتماعي او فردي اصلاحاتو د راوستو لپاره کار کوي.

هغه همداراز د فرمانونو تطبيق په ولسي او حکومتي کچه عام کار وباله او زياتوي، چې هيڅوک ترې مستثنا ندی.

د نوموړي د څرګندونو له مخې؛ د اسلامي امارت فرمانونه تدريجي تطبيقوي او د تطبيق په برخه کې ټول مسوولين اړ دې، چې د امربالعمروف له کارکوونکیو سره همکاري وکړي.

دغه راز د غونډې ګډونوالو د تشکيل د زياتوالي، ترانسپورت او په نورو برخو کې له وزارت څخه د لازمې همکارۍ غوښتنه هم وکړه.

د امربالعمروف سرپرست همداراز ويلي، چې يو شمېر بهرنۍ کړۍ هڅه کوي، چې د يو شمېر خلکو پر مټ  اسلامي امارت تخريب کړي؛ خو هيڅ په لاس نه ورځي.

هغه ویلي، چې د ښځو حقوقو ته درناوی د تېرو شل کلونو پر پرتله په اسلامي امارت کې ډېر غښتلي او خوندي دي.

Continue Reading

Trending

Copyright © 2022 Ariana News. All rights reserved!