Connect with us

تازه خبرونه

کابل او اسلام آباد به سرحدي ستونزې د خبرو له لارې حل کړي

Published

 on

(Last Updated On: مرغومی ۱۵, ۱۴۰۰)

د افغانستان د بهرنیو چارو وزارت ویلي؛ له څه وخت راپدیخوا د ډیورنډ کرښې په یو شمېر سیمو کې د افغانستان اسلامي امارت او پاکستانيو ځواکونو تر منځ شخړې پېښې شوي، چې اړتیا ده د اړوند مسئلې پر حل خبرې وشي.

په روانه اوونۍ کې داسې راپورونه خپاره شول، چې افغان سرحدي ځواکونو د پاکستان له لوري غزول شوی اغزن تار راټول کړی او له ځان سره یې راوړی دی، چې دې کار د دواړو لوریو ناندرې راپارولي د دواړو لوریو ترمنځ د کړکېچ د زیاتېدو لامل شوی دی.

د بهرنیو چارو وزارت ویاند عبدالقهار بلخي پر پوله د اغزن تار د لګولو په اړه د پاکستان هڅې ته په نغوته کې ټویټ کړی او څرګندوي؛ اسلامي امارت هیله من دی، چې ستونزه د همغږۍ، خبرو او ښه ګاونډیتوب د باور له مخې حل او په دې اړه له پاکستان سره خبرې وکړي.

د پاکستان د بهرنیو چارو وزیر شاه محمود قریشي اوړمه ورځ یوې خبري غونډې ته د اغزن تار پر غزولو ټینګار وړاندې کړی او وایي، چې له اسلامي امارت سره به د مسلې پر ډیپلوماټیک حل خبرې وکړي.

د پاکستان د ډان ورځپاڼې د قریشي د څرګندونو له مخې ویلي: مونږ پر پوله اغزن تار لګولی او د اغزن تار لګولو به روان وساتو.

د افغانستان تېر حکومت هم له دې کړنې سره مخالفت کړی و.

افغانستان د ډیورنډ کرښه، چې پاکستان او افغانستان سره بېلوي، د نړیوالې پولې په توګه پر رسمیت نه پېژني.

د افغانستان د دفاع وزارت ویاند عنایت الله خوارزمي په دې وروستیو کې ویلي؛ پاکستان حق نلري، چې پر اغزن دیوال جوړ کړي؛ ځکه دا ډول کړنې نامناسبې او قانوني بڼه نلري.

خو د پاکستان د بهرنیو چارو وزیر په یوه تازه بیان کې د اسلامي امارت له لوري د سرحدي کټارو ړنګول پاروونکی بللی او ویلي یې دي چې دا مسئله به له ډیپلوماتیکو لارو هواره کړي.

د یادونې ده، چې دغه اغزن تار پاکستاني لوري د ۲۰۱۷ زېږدیز کال په دوبي کې له افغانستان سره پر ډیورنډ کرښه لګول پیل کړل. ویل کیږي، چې د دې پروژې نږدې ۹۰ سلنه چارې بشپړې شوي دي.

تازه خبرونه

د امریکا استازي او پاکستانيو چارواکو د اسلامي امارت د ښځینه‌وو پر بندیزونو خبرې وکړې

Published

on

(Last Updated On: سلواغه ۱۲, ۱۴۰۱)

د افغانستان لپاره د امریکا ځانګړي استازي توماس ویست پاکستان ته په دوه ورځني ( د سلواغې ۱۰ – ۱۱ ) سفر کې د جنرال سید عاصم منیر په ګډون له لوړ پوړیو چارواکو سره د ترهګرۍ او د اسلامي امارت د ښخینه‌وو پر تعلیمي بندیزونو خبرې کړي دي.

د امریکا سفیر د سې شنبې پر ورځ تویت کړی او د افغانستان په اړه یې د دوه ورځنیو ګټورو غونډو په لړ کې د پاکستان میلمه پالنه ستایلې ده.

ویست څرګندوي؛ هغه د پاکستان د پوځ له مشر جنرال عاصم منیر، سفیر محمد صادق او د بهرنیو چارو له سکرتر اسد مجید خان سره لیده کاته کړي دي.

د دې لیدنو په لړ کې توماس ویست ویلي، چې دوی د تروریزم او امنیتي وضعیت، نړیوال یووالي اړتیا او د میلیونونو افغانانو حیاتي مرستو او تعلیم ته د لاسرسي په اړه د طالبانو ( اسلامي امارت) خطرناکو اغېزو په اړه خبرې وکړې.

د امریکا یاد استازي د ملګرو ملتونو دا کار مهم ګڼلی او له پلي کوونکیو څخه یې د ملاتړ غوښتنه هم کړې، چې د ښځینه مرستندویه کارکوونکیو او ښځینه زده‌کړې په اړه د اسلامي امارت د بندیزونو د لغو کولو غوښتنه وکړه.

هغه ټینګار کړی، چې: له زړورو افغان ښځو سره مې وکتل؛ هغوی مهمې غوښتنې او نیوکې وړاندې کړې. په افغانستان کې چارسمبالې ښځې له کړاوونو سره مخ دي او نړیواله ټولنه باید د هغو اړتیاوو ته لومړیتوب ورکړي.

ویست ویلي؛ ښځې او نجونې، چې په کورونو کې محدودې دي، له سختو ذهني او رواني فشارونو سره مخ دي.

ویست پر زده‌ګړو ‌او کار بندیزونه بې رحمانه برید ګڼلی او ډاډ ورکوي، چې د پاکستان ترڅنګ ولاړ یوو.

هغه دغه راز په پېښور کې د تروريستي بريد له کبله د زياتو بې ګناه خلکو پر وژل کيدو هم ژوره خواشيني څرګنده کړې ده.

دا په داسې حال کې ده، چې د اسلامي امارت د رسنیو پر خپرونو د څار مشر عبدالحق حماد ويلي، د نجونو د زده‌کړې مطلق بندول افراط دی او بې چوکاته بریښودل یې تفریط دی. د اسلامي امارت تګلاره د اعتدال پر بنسټ ولاړه ده او افراطیت نه مني.

Continue Reading

تازه خبرونه

د ټیټ کیفیت څلور تانکره دیزل بېرته ایران ته وروګرزول شول

Published

on

(Last Updated On: سلواغه ۱۲, ۱۴۰۱)

د افغانستان د ستندرد ملي ادارې د سې شنبې پر ورځ وویل، چې دې ادارې د ټیټ کیفیت څلور تانکرونه بېرته ایران ته مسترد کړل.

یادې ادارې په ډاګه کړې؛ دوی د هرات ولایت په اسلام‌کلا بندر کې د تېلو د کیفیت له کتنې وروسته څلور تانکره بېرته ایران ته ستانه کړي دي.

د دغې ادارې د څرګندونو له مخې؛ دوی د بې کيفيته تېلو د واردولو د مخنيوي لپاره عملي ګامونه پورته کړي دي.

سربېره پردې دغې ادارې له سوداګرو وغوښتل؛ د وارد شويو توکو پر کیفیت دې خانونه ډاډمن کړي، چې د دې ادارې له معیارونو سره سمون ولري. که نه؛ نو دوی به له ورته پایلو سره مخ شي.

دا لومړی ځل ندی، چې دې ادارې ټیټ کیفیت تیل بېرته مستردوي . د بېلګې په توګه د جنورۍ پر لومړیو کې یې ایران ته د بې کیفیته تېلو ۲۶ ټانکرونه بېرته واستول.

Continue Reading

تازه خبرونه

د پاکستان له زندانونو ۱۲۰ افغان بندیان آزاد شول – د افغانستان سفارت

Published

on

(Last Updated On: سلواغه ۱۳, ۱۴۰۱)

په اسلام‌آباد کې د افغانستان سفارت د پاکستان د سند صوبې له زندانونو څخه د ۱۲۰ افغانانو د خوشي کولو ډاډ څرګند کړ.

افغان سفارت تویت کړی، چې دغه کسان د سې شنبې پر ورځ ( د سلواغې ۱۱ ) خوشي شوي دي.

په اسلام‌آباد کې د افغانستان سفارت د څرګندونو له مخې؛ ټاکل شوې، چې په راتلونکیو ورځو کې ۱۳۰ نور افغان اتباع هم د پاکستان له زندانونو خوشې شي.

دا په داسې حال کې ده، چې په اسلام‌آباد کې د افغانستان سفارت د پاکستان له زندانونو څخه د ۱۳۰۰ افغانانو د خوشي کولو اعلان وکړ.

د پاکستانيو چارواکو د څرګندونو له مخې؛ د دغه هېواد پوليسو د پاکستان په بېلابېلو سيمو کې د ښځو او ماشومانو په ګډون لږ تر لږه ١٢٠٠ افغانان د استوګنې د اسنادو او ويزو د نه لرلو له کبله نيولي او بنديان کړي دي.

په اسلام‌آباد کې د افغانستان سفارت منلې، چې شاوخوا ۱۵۰۰ بې اسناده افغان کډوال په پاکستان کې بندیان دي او د خوشي کولو هڅې یې روانې دي.

د ملګرو ملتونو د مهاجرت ادارې د معلوماتو له مخې؛ دا مهال په پاکستان کې شاوخوا یو اعشاریه ۳ میلیون قانوني افغان کډوال ژوند کوي، خو د اټکل له مخې په سلګونه زره افغان کډوال هم له قانوني اسنادو پرته په پاکستان کې ژوند کوي.

Continue Reading

Trending

Copyright © 2022 Ariana News. All rights reserved!