د اسلامي امارت ویاند وايي، چې په افغانستان کې د ټاپي پروژې کار عملاً پیل شوی دی.

ذبیح الله مجاهد نن دوشنبه (د لیندۍ دولسمه) آریانا نیوز ته ویلي، چې د دغې پروژې له پرانستلو وروسته تر اوسه پورې د پروژې د پلي کولو لپاره اړین تخنیکي وسایل او تجهیزات(د افغانستان او ترکمنستان ترمنځ د صفري نقطې) ته ولېږدول شول او له لېږد وروسته اوس عملي کار پیل شوی دی.

ذبیح الله مجاهد زیاته کړې، چې د دې پروژې په بېلابېلو برخو کې ګڼ شمېر خلک پر کار بوخت دي او لومړی پړاو به یې په راتلونکیو دوه کلونو کې بشپړ شي.

د مجاهد د څرګندونو له مخې؛ د کاسا - ۱۰۰۰ پروژې عملي کار به ډېر ژر پیل شي او د پلان شویو پروژو چارې به هم پیل شي.

د اسلامي امارت ویاند زیاته کړې؛ افغانستان به ورو ورو په پښو ودریږي او د هېوادوالو لپاره به ښه کاري فرصتونه برابر شي.

د اقتصادي چارو کارپوهان هم په دې باور دي، چې دغه پروژه د سیمې د اقتصاد په وده کې مهم رول لوبوي.

د ټاپي پروژې مسوولینو ويلي، د دې پروژې له بشپړېدو سره به په افغانستان کې ۱۲ زره کسانو ته د کار زمینه برابره شي او له دې پروژې څخه به د افغانستان کلنی عاید نږدې یو میلیارد ډالرو ته ورسېږي.

ویل کیږي، چې ټاپي د ۱۸۰۰ کیلومټرو پر اوږدوالي له ترکمنستان څخه د افغانستان او پاکستان له لارې هند ته د طبیعي ګاز د پايپ لېږدولو پروژه ده. افغانستان به له ټاپي پروژې څخه په لومړیو ۱۰ کلونو کې د شاوخوا ۵۰۰ میلیون مټر مکعب ګاز او په راتلونکیو ۲۰ کلونو کې د یو میلیارډ مټر مکعب ګازو په ترلاسه کولو سربېره هر کال د ګاز له لېږد څخه شاوخوا ۴۵۰ میلیون ډالر عواید ترلاسه کړي.

د رویټرز خبري سرچینې څرګنده کړې؛ د امریکا ټاکل شوي ولسمشر ډونالډ ټرمپ د شنبې پر ورځ( د لیندۍ لسمه) د بریکس له غړیو هېوادونو وغوښتل؛ که د ډالرو د بې ارزښته کولو لپاره د بریکس اسعارو د رامنځته کولو هڅه وکړي؛ نو پر وارداتي توکو به یې ۱۰۰ سلنه تعرفه ولګول شي.

د امریکا ټاکل شوي ولسمشر ډونلډ ټرمپ ګواښ کړی، چې که د بریکس هېوادونه  د ډالرو د کمزوري کولو لپاره د بریکس اسعارو د جوړولو هڅه وکړي؛ نو پر وارداتي توکو به یې ۱۰۰ سلنه تعرفه ولګوي.

هغه په ​​یوه پیغام کې لیکلي: هغه نظریه، چې د بریکس هېوادونه هڅه کوي ډالر پرشاوتمبوي او مونږ یې ننداره وکړو؛ پای ته رسېدلې ده.

ټرمپ زیاته کړې: مونږ له دې هېوادونو څخه داسې ژمنې ته اړتیا لرو، چې دوی به نه د بریکس نوی اسعار رامنځته کوي او نه به د نورو هغو پیسو ملاتړ کوي، چې د ډالر ځای ونیسي.

د بریکس هېوادونه، چې اوس مصر، ایران او متحده امارات هم په کې ګډ دي؛ د روان کال د اوکټوبر په میاشت کې د روسیې د کازان پر کوربتوب سرمشریزه جوړه کړه او پر غیر ډالري لیږد او د سیمه‌ییزو اسعارو پر پیاوړتیا یې بحث وکړ.

په دې سرمشریزه کې د اړوند بانکي شبکو د پیاوړتیا او پر سیمه‌ییزو اسعارو د بریکس له هېوادونو سره د تادیاتو نوښت ډاډمن شو.

د یادونې ده، چې د روسیې ولسمشر ولادیمیر پوتین د سرمشریزې په پای کې ویلي، چې د بلجیم له سویفټ مالي سیسټم سره د سیالۍ لپاره تر اوسه کوم بدیل ندی رامنځته شوی.

 د پنجشېر ولایت د رسنیو دفترویلي، چې په دې ولایت کې د سې شنبې پر ورځ( د لړم نهه‌ویشتمه) د داوطلبۍ له لارې ۶۰۰۹ قیراټه زمرد پر ۳۰۵ زره ۹۱۰ امریکايي ډالرو وپلورل شول.

په دې داوطلبۍ کې پر کورنیو پانګوالو سربېره امریکایي پانګوالو هم ګډون درلود، چې یاد زمرد په کې په لوړه بیه وپلورل شول.

د پنجشېر والي محمد اغا حکیم ویلي؛ د زمردو له ازاد پلور سره په پنجشېر که نه یوازې خلکو ته کاري زمینې برابرې شوې دي، بلکه ورسره د ځایي خلکو د سوداګرۍ یوه نوې لړۍ هم پيل شوې، چې پخوا د دې ولایت خلکو ترې بې برخې ول.

دغه راز د دې داوطلبۍ ګډونوالو د اسلامي امارت او په ځانګړي توګه له ولایتي ادارې مننه کړې، چې د پنجشېر زمرد ته یې ښه بازار موندنه کړې ده.

ویل کیږي، چې د پنجشېر ولایتي ادارې د زمردو د استخراج په اړهنه یوازې د نړيوالو پانګوالو او مسلکي وړتياوو د جلب هڅې  کړي، بلکې ولسونه هم خوښ دي، چې ځوانانو ته يې کاري بوختیاوې پیداشوې دي.