د اماراتو خبري سرچینې (وام) راپور ورکړی، چې د سې شنبې پر ورځ د کورنیو چارو وزارت چارسمبالی سراج الدین حقاني د متحده عربي اماراتو له لومړي وزیر شیخ محمد بن زاید آل نهیان سره وکتل.

دا غونډه د ابوظبي په قصر‌الشاطي کې ترسره شوه او دواړو خواوو په افغانستان کې د وروستیو پرمختګونو په اړه بحث او خبرې وکړې.

دوی د دواړو هېوادونو د متقابلو ګټو لپاره د دوه اړخیزو همکاریو د پیاوړتیا لارې چارې هم وڅېړلې او په ځانګړې توګه یې د اقتصاد او پراختیا پر اړوند برخو یې خبرې وکړې.

دواړو چارواکو د افغانستان د بیارغونې او ثبات د ملاتړ لپاره پر هڅو بیاکتنه وکړه، چې موخه یې د افغانانو لپاره پرمختګ، سوکالي او اقتصادي وده ده.

سراج الدین حقاني د متحده عربي اماراتو او افغانستان ترمنځ له همکارۍ ستاینه وکړه او له افغانانو سره یې د متحده عربي اماراتو د بشري مرستو ستاینه هم وکړه.

د اسلامي امارت ویاند ذبیح الله مجاهد ویلي، چې د اسلامي امارت د استخباراتو عمومي رییس عبدالحق وثیق هم په دې سفر کې له حقاني سره مل دی.

د افغانستان د چارو لپاره د پاکستان ځانګړي استازي محمد صادق ویلي، چې هغه له خپل ایراني سیال سره د نړیوال جیوپولیتیک وضعیت او د دواړو هېوادونو پر وړاندې د سیمه‌ییزو ننګونو په اړه خبرې وکړې.

د لویدیځې آسیا لپاره د ایران د بهرنیو چارو وزارت دعمومي رییس او د افغانستان لپاره د دې هېواد د ځانګړي استازي پر مشرۍ یو پلاوي پاکستان ته سفر وکړ او د هغه هېواد د بهرنیو چارو وزارت له چارواکو سره د نړیوال جیوپولیتیک وضعیت او د دواړو هېوادونو د سیمه‌ییزو ننګونو په اړه خبرې وکړې. پاکستاني سرچینو ويلي، چې پاکستان هڅه کوي په کابل کې د هېوادونو د ځانګړو استازو پر ګډون یوه غونډه جوړه کړي.

محمد صادق زیاته کړې، چې دوی د لویدیځې آسیا لپاره د ایران د بهرنیو چارو وزارت له عمومي رییس او د افغانستان لپاره د هغه هېواد له ځانګړي استازي سره هوکړه کړې، چې دې ننګونو ته به ګډه رسېدنه کوي.

د افغانستان لپاره د پاکستان استازی هم ټاکل شوې؛ روسیې او چین ته سفر وکړي، چې د دغو هېوادونو له چارواکو سره د افغانستان په اړه خبرې وکړي.

د کارپوهانو د څرګندونو له مخې؛ افغانستان باید له پاکستان سره متقابلې اړیکې ولري او کابل باید په سیمه‌ییزو مسلو کې فعال رول ولوبوي.

اسلامي امارت پدې باور دی، چې کابل له ټولو ګاونډیو او سیمه‌ییزو هېوادونو سره ښې اړیکې غواړي او هیله کوي، چې د اقتصاد پر بنسټ د پالیسیو له تعقیب سره خپلې اړیکې پیاوړې کړي.