د افغانستان کرکټ ملي لوبډلې د توپ‌اچونې او توپ‌وهنې په برخو کې پر ځلېدلې لوبې د درې‌اړخیزو سیالیو په پایلوبه کې زیمبابوې ته ماتې ورکړه او د دغو سیالیو اتلولي یې وګټله. دا بریا د ۲۰۲۷ز.کال د کرکټ نړیوال جام او راتلونکو سیالیو ته د افغانستان د چمتووالي لپاره اړین ګام ګڼل کېږي.

د افغانستان کرکټ ملي لوبډلې د افغانستان، زیمبابوې او بنګله‌دېش ترمنځ د ترسره شویو درې‌اړخیزو سیالیو په پایلوبه کې زیمبابوې ته پر پرېکنده ماتې ورکولو د اتلولۍ جام پورته کړ.

د زیمبابوې لوبډلمشر سیکندر رضا لومړی د توپ‌وهنې پرېکړه وکړه؛ خو د افغانستان توپ‌اچوونکو له پیله پر سیالې لوبډلې فشار راوړ. زیمبابوې په لومړیو اووه آورونو کې پر ۲۶ منډو درې ویکټې له لاسه ورکړې.

فضل‌الحق فاروقي او عظمت‌الله عمرزي د لومړنیو ویکټو پر اخیستو د افغانستان د برلاسۍ زمینه برابره کړه. وروسته بلال سامي د زیمبابوې تجربه‌کار توپ‌وهونکی برینډن ټېلر، چې یوازې یې نهه منډې کړې وې؛ وسوځاوه.

سیکندر رضا د ۶۸ او رایان برل د ۳۱ منډو پر جوړولو، د ۶۰ منډو ملګرتیا وکړه او هڅه یې وکړه، چې خپله لوبډله له لومړني کړکېچه وباسي؛ خو په اووه‌ویشتم آور کې د برل له سوځېدا وروسته یو ځل بیا د زیمبابوې د ویکټو د لوېدو لړۍ پیل شوه.

محمد نبي او راشد خان پر اغېزمنې توپ‌اچونې د زیمبابوې د توپ‌وهنې وروستۍ برخه هم له ستونزو سره مخ کړه او دغه لوبډله په پای کې د ۱۶۹ منډو پر جوړولو وسوځېده.

راشد خان د ۴۱ منډو په بدل کې درې ویکټې واخیستې او د افغانستان تر ټولو بریالی توپ‌اچوونکی و. بلال سامي د ۲۷ منډو په بدل کې دوه ویکټې واخیستې او فضل‌الحق فاروقي او محمد نبي هم هر یوه دوه ویکټې ترلاسه کړې.

ابراهیم ځدراڼ د افغانستان د بریا ستوری

د افغانستان په توپ‌وهنه کې ابراهیم ځدراڼ د ۷۰ ناسوځېدلو منډو په جوړولو کې مهم رول ولوباوه.

رحمان‌الله ګربز هم ۳۰ منډې جوړې کړې او د افغانستان د منډو جوړولو لپاره یې ښه پیل برابر کړ. د افغانستان لوبډلې په لسم آور کې خپلې منډې ۶۸ ته ورسولې.

که څه هم د زیمبابوې توپ‌اچوونکو هڅه وکړه، چې په منځنیو آورونو کې د افغانستان د منډو جوړولو مخه ونیسي او صدیق‌الله اتل یې په شپږ منډو وسوځاوه؛ خو ټاکل شوی هدف د افغانستان لپاره د لاسرسي وړ پاتې شو.

د افغانستان لوبډلمشر رحمت شاه ۴۳ منډې جوړې کړې او له ځدراڼ سره یې اغېزناکه ملګرتیا وکړه او د بریا لاره یې اواره کړه. که څه هم رحمت شاه د ویسلي مادهویري له‌خوا وسوځول شو؛ خو افغانستان په پېنځه‌دېرشم آور کې ټاکل شوی هدف پوره کړ او اتلولي یې خپله کړه.

افغانستان له لومړۍ ماتې وروسته پیاوړی بېرته راوګرځېد

افغانستان په داسې حال کې د درې‌اړخیزو سیالیو اتلولي وګټله، چې زیمبابوې سیالۍ له بنګله‌دېش څخه د ۹۹ منډو پر توپیر بریالۍ پیل کړې وه. په هغه لوبه کې کریګ ارواین ۹۳ او برینډن ټېلر ۸۱ منډې جوړې کړې وې.

افغانستان له هغې وروسته زیمبابوې ته د ۱۵۸ منډو پر توپیر ماتې ورکړه او بیا یې بنګله‌دېش ته د اووه ویکټو پر توپیر په ماتې ورکولو پایلوبې ته لاره ومونده.

راشد خان په دغو دواړو بریاوو کې مهم رول درلود او په ټولیز ډول یې اته ویکټې واخیستې. دغو سیالیو ځوانو لوبغاړو؛ بلال سامي او الله‌محمد غضنفر ته هم د ځلېدا ښه فرصت برابر کړ.

افغانستان او زیمبابوې یو ځل بیا په شارجه کې مخامخ کېږي

د اعلان شوي مهالوېش له مخې، افغانستان او زیمبابوې به په راتلونکو سیالیو کې د درې نړیوالو شل آوریزو لوبو لړۍ او ورپسې دوه ټسټ لوبې ترسره کړي. ټاکل شوې، چې ټولې دغه سیالۍ د متحده عربي اماراتو په شارجه ښار کې ترسره شي.

د شل آوریزو سیالیو لومړۍ لوبه د اوکټوبر پر اووه‌ویشتمه، دوه‌یمه د اوکټوبر پر نهه‌ویشتمه او درېیمه د نومبر پر لومړۍ ترسره کېږي.

دغه راز لومړۍ ټسټ لوبه به د نومبر له پېنځمې څخه تر نهمې او دوه‌یمه به د نومبر له دیارلسمې څخه تر اوولسمې ترسره شي.

دغه سیالۍ به دواړو لوبډلو ته یو بل فرصت برابر کړي، چې د خپلو لوبغاړو وړتیاوې وارزوي او د ۲۰۲۷ز.کال د کرکټ نړیوال جام پر ګډون راتلونکو مهمو سیالیو ته ښه چمتووالی ونیسي.

د افغانستان کرکټ ملي لوبډلې په متحده عربي اماراتو کې د درې‌اړخیزو یو ورځنیو سیالیو په لړ کې بنګله‌دېش ته د اووه ویکټو پر توپیر ماتې ورکړه او پایلوبې ته یې لار ومونده. دا په نړیوالو یو ورځنیو سیالیو کې د بنګله‌دېش پر وړاندې د افغانستان پرله‌پسې پېنځمه بریا ده.

افغانستان د ۱۶۱ منډو هدف د درې لوبغاړو پر سوځېدا او په ۳۵.۳آورونو کې پوره کړ. د لوبډلې لوبډلمشر رحمت شاه د ۶۷ منډو پر جوړولو په دې بریا کې مهم رول ولوباوه.

له دې مخکې د افغانستان توپ‌اچوونکو د لوبډلې د بریا زمینه برابره کړې وه.

راشد خان د بنګله‌دېش څلور لوبغاړي وسوځول او یمین احمدزي او عظمت‌الله عمرزي دوه ـ دوه ویکټې واخیستې.

بنګله‌دېش د ټولو لوبغاړو پ سوځېدا ۱۶۰ منډې جوړې کړې.

بنګله‌دېش کمزوری پیل درلود او په لومړیو اووه آورونو کې یې د یوازې ۲۸ منډو په جوړولو څلور لوبغاړي له لاسه ورکړل.

یمین احمدزي تنزیډ حسن او سومیا سرکار په دوه پرله‌پسې توپونو وسوځول او عظمت‌الله عمرزي هم نجم‌الحسین شانټو او توحید هریډووی له ډګره بهر کړل.

له دې کمزوري پیل وروسته، پرویز حسین ایمان او سیف حسن د ۹۳ منډو ملګرتیا جوړه کړه او هڅه یې وکړه، چې د خپلې لوبډلې منډې زیاتې کړي.

ایمان په ۹۶ توپونو د پېنځه څلوریزو او دوه شپږیزو پر مرسته ۷۰ منډې جوړې کړې او د بنګله‌دېش تر ټولو ډېرې منډې جوړوونکی لوبغاړی شو؛ خو راشد خان یې ویکټه واخیسته. سیف حسن ۳۵ منډې جوړې کړې او محمد نبي وسوځاوه.

راشد خان وروسته د بنګله‌دېش د توپ‌وهونکو د وروستۍ برخې لوبغاړي یو پر بل پسې وسوځول او د څلور ویکټو پر اخیستو یې بنګله‌دېش يې په ۱۶۰ منډو کې ورداوه.

افغانستان هم د هدف د پوره کولو په پیل کې له ستونزو سره مخ شو؛ رحمان‌الله ګربز او صدیق‌الله اتل د تسکین احمد پر توپ‌اچونه وسوځېدل، خو ابراهیم ځدراڼ او رحمت شاه د درېیمې ویکټې لپاره د ۵۶ منډو ملګرتیا جوړه کړه او د لوبې بهیر یې د افغانستان پر ګټه بدل کړ. ځدراڼ د مستفیض‌الرحمان له‌خوا له سوځېدا مخکې ۳۴ منډې جوړې کړې وې.

وروسته رحمت شاه او حشمت‌الله شهیدي د ۶۶ منډو ملګرتیا جوړه کړه او افغانستان یې بریا ته ورساوه. شهیدي پر ۵۴ توپونو ۳۶ منډې او رحمت شاه پر ۹۰ توپونو د پېنځه څلوریزو پر مرسته ۶۷ منډې جوړې کړې او تر پایه ونه‌سوځېدل.

له دې بریا سره افغانستان د جمعې پر ورځ د زیمبابوې پر وړاندې پایلوبې ته لار ومونده او بنګله‌دېش له درې‌اړخیزو سیالیو بهر شو.