تازه خبرونه
آلمان له ترکیې سره د کاري اړیکو ساتلو ته ژمن دی
د آلمان لومړۍ وزیرې انګلا مرکل ترکیې ته د خپل سفر په بهیر کې د کډوالۍ او نورو مسلو په اړه د همکارۍ پر دوام ټینګار کړی دی.
میرکل ویلي؛ هېواد یې ژمن دی، چې له ترکیې سره کاري اړیکې خوندي کړي.
هغه وایي: د آلمان- ترکیې اړیکې به له ګټو او زیانونو سره سره دوام مومي. هرڅوک پوهیږي، چې زمونږ دواړو امنیت او خپلواکي سره تړلي دي.
هغې زیاته کړې: مونږ غواړو د انساني قاچاق مخه ونیسو. اروپايي ټولنه اړتیا لري، چې په دې برخه کې له ترکیې سره مرسته وکړي.
د جرمني لومړۍ وزیرې زیاته کړې، هېواد یې له ترکیې سره ګډې ګټې لري او راتلونکی حکومت به پدې اړه پرېکړه وکړي.
د ترکیې ولسمشر رجب طیب اردوغان ویلي، چې هېواد یې د مرکل د ښه نیت او له ترکیې سره د مثبتو اړیکو د ساتلو له هڅو درناوی کوي.
اردوغان زیاته کړې: مرکل په ډېرو مسلو کې له نوښت او مسوولیت څخه ډډه نده کړې.
د آلمان لومړۍ وزیره انګلا مرکل د روان کال تر پایه له دندې ګوښه کیږي؛ خو تر هغه وخته پورې به په واک کې پاتې وي، چې یو ائتلافي حکومت جوړ شوی نه وي.