سیمه ییز خبرونه
آیا د ولسمشرۍ ټاکنې به دوهم پړاو ته ولاړې شي
د مشرانو جرگې یو شمیر غړي د ولسمشرۍ له مخكښو كانديدانو غواړي چې ايتلاف او جوړجاړى د خلكو رايو ته بې احترامي ده او روانې ستونزې نه شي حل كولى.
دوى وايي چې مخكښ كانديدان بايد د ټاكنو خپلواك كميسيون پرېكړو ته درناوى وكړي او كه ټاكنې دوهم پړاو ته تلونكې وي، نو بايد د ګډون لپاره ورته ځان چمتو كړي.
د مشرانو جرګې ځينې غړي وايي داسې ګنګوسې شته چې مخكښ د كانديدانو د ايتلافي حكومت لپاره پر جوړجاړې بوخت دي. دوى د جوړجاړې له مخې د حكومت جوړښت هيواد ته خطرناك ګڼې.
بل خوا د مشرانو جرګې رئيس فضل الهادي مسلميار وايي چې د هيواد امنيتي او اقتصادي حالت ته په كتو د ملي مشاركت پر بنسټ د حكومت د رامنځته كولو لپاره د هڅو هركلى باید وشي.
قوي احتمال شته چې د ولسمشرۍ ټاكنې دوهم پړاو ته ولاړې شي. د لومړنيو پايلو پر بنسټ چې د سلو فيصدو شمېرل شويو رايو له مخې اعلان شوې، هيڅ يو كانديد هم د ۵۰+۱ فيصدو رايو په تر لاسه كولو بريالى شوى نه دى.