ازبکستان په ۲۰۲۶ کال کې هم افغانستان ته برښنا رسونه روانه ساتي

د ازبکستان د انرژۍ وزارت ویلي، چې هېواد به یې په ۲۰۲۶ کال کې هم افغانستان ته برښنا رسونه روانه ساتي.

دا پرېکړه د ازبکستان د انرژۍ وزیر جلابیک میرزامحمدوف او د افغانستان برښنا شرکت د عمومي رییس عبدالباري عمر پر مشرۍ د پلاوي ترمنځ په لاسلیک شوي تړون کې رامنځته شوې، چې په کې د ازبکستان د انرژۍ سکټور لوړ پوړیو چارواکو هم برخه اخیستې وه.

دواړو لوریو یادونه کړې، چې د افغانستان د انرژۍ په سکټور کې څو لویې ګډې پروژې روانې دي او خبرې د لوړ ولټاژ برښنالېږد مزو او سب‌سټیشنونو پر پراختیا او ګړندۍ بشپړېدا راڅرخیږي.

په تېر اګست کې ازبکستان او د افغانستان برښنا شرکت د دې پروژو د ملاتړ لپاره د تمویل تړون لاسلیک کړ. دا پروژې به په راتلونکو ۱۸ میاشتو کې بشپړې شي او افغانستان ته به اجازه ورکړي، چې له ۸۰۰ څخه تر ۱۰۰۰ میګاواټه پورې برښنا وارد کړي.

په دې همکارۍ کې څلور اصلي پروژې شاملې دي:

• له ۱۰۰۰ میګاواټه ظرفیت سره د ۵۰۰ کیلو ولټه سرخان-دشت-الوان د لېږد‌مزي جوړول

• له ۸۰۰ میګاواټه ظرفیت سره د ارغندي سب‌سټیشن پراخول

• له ۸۰۰ میګاواټه ظرفیت سره د ۲۲۰ کیلو ولټه کابل-شیخ مصري د لېږد‌مزي جوړول

• په ننګرهار ولایت کې له ۱۲۶ میګاواټه ظرفیت سره د شیخ مصري سب‌سټیشن جوړول

دغه راز تمه ده، چې دا نوښتونه به د افغانستان د انرژۍ زیربنا پیاوړې او د دواړو هېوادونو ترمنځ به دوه اړخیزه همکاري ژوره کړي.

د افغانستان انرژۍ سکټور د لسیزو جګړو، پانګونې نشتوالي او زړو زیربناوو له کبله له روانو ننګونو سره مخ دی. د کور دننه برښنا تولید محدود دی او یوازې اوبیزه، حرارتي، ګازي او نوې کیدونکې لمریزې انرژۍ کارخونې شته، چې لږ برښنا چمتو کوي. ډېری سیمې په ځانګړي توګه لرې پراته ولایتونه د برښنا د پرله‌پسې بندېدو سره مخ دي؛ کورنۍ او سوداګر پر ګرانو یا بې ثباته سرچینو تکیه کوي.

دمګړۍ افغانستان د مخ پر ودې اړتیاوو د پوره کولو او د اقتصادي پراختیا د ملاتړ لپاره افغانستان د ګاونډ هېوادونو په ګډون له ازبکستان، ترکمنستان او ایران څخه د برښنا پر وارداتو تکیه کوي.

ویل کیږي، چې دا واردات د ملي برښنا له ثبات، برښنا چمتو کولو او روغتونونو، ښوونځیو او صنایعو ته ورته له اړینو خدماتو ملاتړ کوي؛ پر وارداتو تکیه نه یوازې هېواد له سیمه‌ییزو جیوپولیتیک پرمختګونو سره مخ کوي، بلکې د کورني انرژۍ په وړتیاوو کې د پانګونې اړتیا هم راڅرګندوي.